Blog 
Filazón
RSS - Blog de MªEsther  García López

Archivo

  • 06
    Julio
    2017

    Comenta

    Comparte

    Twitea

    Oviedo asturias

    Velea festiva

     

    A veces ye difícil asimilar el pasu'l tiempu

    m.ª esther garcía 06.07.2017 | 03:45

    Velea festiva

    Amanez el día la fiesta. L'alborecer musical llámame pela ventana. Les calles duermen la cogorza de la verbena. El barrenderu guía la máquina de llimpieza que suerbe papeles, vasos rotos, botelles y otros restos nocherniegos mientres refresca l'asfaltu con una ducha matinal. Dos gaiteros soplen con puxu la gaita. Caleyen per toles calles de Piedrasblancas anunciando la folixa. Dende los balcones, dende les ventanes, les miraes y aplausos de los madrugadores qu'escuchen los sones temblorosos de la gaita. Tolos años se repite la música, el paséu. ¿Los mesmos gaiteros?¿Los mesmos traxes? ¿Los mesmos sones...? ¿Les ventanes? ¿Los balcones? Como si'l tiempu nun avieyare.

    Asómome a la ventana y escucho la gaita, emocionada. ¡Los mesmos sones! Sé de memoria la calle, el trayeutu, los requexos, los adornos, la música...Too idéntico cada añu nesta calle engalanada...Y nun sé si ye esti añu o l'anterior, o fai un sieglu... Como si'l tiempu nun avieyare. Nun sé si soi la neña, o la moza, o la madre o la güela... Escucho los mesmos sones, la mesma gaita. Nun sé si pasó o nun pasó'l tiempu. Nun sé si'l tiempu ye un inventu.

    Nun hai naide al mio alredor, toi sola na casa, y duldo si yo soi la mesma del añu pasáu, y del anterior, y del otru, y del otru... Fui pal mio cuartu desconcertada. Los recuerdos, les miraes, los ximíos de la gaita. Nun sé si ye esti añu o l'anterior, o hai venti años o si vivo'l presente o toi suañando. Nun sé si les cames tán revueltes o vacíes, si tienen colches nueves o tán cubiertes de nada. Nun hai naide nesta casa. Hai silenciu en tolos cuartos. Nun se siente una pallabra.

    Siento l'ecu de la gaita. Los recuerdos, les miraes, los retratos de la sala, los balcones, les ventanes. La memoria atacada.

    Quiciabes too seya una una velea.

    Como si'l tiempu nun avieyare. Como si'l tiempu me xugare una mala pasada.

     

    Compartir en Twitter
    Compartir en Facebook