Blog 
Filazón
RSS - Blog de MªEsther  García López

Archivo

  • 19
    Enero
    2014

    Comenta

    Comparte

    Twitea

    Violencia Social

     

    Tresfondos violentos na sociedá, nes instituciones y nel exerciciu de la política.
     


    Violencia social ye nun llegar a fin de mes. Violencia que ta castigándonos dende'l poder, cuando nun estáu de democracia nun s'escucha nin se consulta col pueblu los asuntos que-y afeuten. Violencia ye la qu'exercen dalgunos gobernantes una vez que tan nel poder. Una vez que se sienten na poltrona entra-yos l'amnesia de tolo que prometieron. "Prometer hasta meter". Y namás tenemos que ver lo que ta pasando col gobiernu central. Reforma tres reforma, recortes, rebaxes y rebaxes. Acabar cuanto antes col estáu de bienestar y privatízalo too. Y nun foi precisamente eso lo que nos prometíen antes de les eleiciones. A ver hasta onde llegamos.

    Munchos gobernantes tán na creyencia, porque-yos combién, de que la democracia ye que la ciudadanía vaya a votar cada cuatro años, y darréu d'ello escaécense de programes y promeses. La democracia hai qu'exercela día a día. Los ciudadanos tienen drechu a que se-yos informe y se-yos consulte sobre les decisiones importantes que -yos afeuten direutamente.

    Un exemplu tenémoslu en Burgos. Una cosa ye facer política y otra ye modificar una calle qu'afeuta a los vecinos ensin contar con ellos, ente otres coses, quitándo-yos l'aparcamientu y obligándolos a pagar poles nueves places del "parking" cuasi 20.000 euros, que, nos tiempos que cuerren, son munches perres. Y asina fartos d'estos dictadores, los burgaleses del barriu de Gamonal encendiéronse y xuniéronse pa torgar que s'avanzara nesta obra descomanada. Quién sabe qué martingaes habría detrás. Un barriu obreru al que pensaron que diben poder imponer el so autoritarismu. Esto ye violencia social. Los vecinos anduvieron llistos porque a poco que se descuidasen yá tendríen la obra fecha, mientres esperaben a que los políticos los recibieren. Y asina los pueblos y ciudaes tán enllenos de barbaridaes arquitectóniques, de construcciones innecesaries feches ensin pensar nel futuru. Y nun fai falta ser mui observador: aeropuertos ensin aviones, autopistes, centros d'interpretación ensin usu, edificios en sitios protexíos y un llargu etcétera.

    L'Alcalde de Burgos como otros munchos perdió'l norte y escaeció que tamos en democracia. Y eso "d'ordeno y mando" pasó a la historia. Pienso que ye'l momentu d'entamar una reflexón fonda. De ver a quién se da'l votu. Hai que facer memoria de toles promeses que se ficieron y que se tresformaron nun tris n'engañifes polítiques.

    Los burgaleses que se tán llanzando a la calle estos díes son valientes, y ya fueron apoyaos por otros coleutivos en distintes ciudaes. Eso ye lo que tenemos que facer, salir a la calle en tropel y torga-yos que nos sigan atropellando y acabando con tolo que teníamos consiguió nel terrén social. Llegó'l momentu de reivindicar una democracia real. Y por muncho que nos quieran reprimir les manifestaciones, ye la única forma que tenemos los ciudadanos y ciudadanes de que se nos escuche. Yá ta bien de violencia institucional.
        

     

      


     

     

    Compartir en Twitter
    Compartir en Facebook