Blog 
Filazón
RSS - Blog de MªEsther  García López

Archivo

  • 12
    Octubre
    2012

    Comenta

    Comparte

    Twitea

    WEB Real

     

    Ye de xusticia que na páxina de la Casa Real tea presente la llingua asturiana.

    Nestos tiempos de la era dixital, cuásique caleyamos más per internet que pela calle.Y caleyando, caleyando, atopéme na páxina de la Casa Real. Hasta la fecha nun me cuadrara entrar nesti llugar tan noble, enllenu de semeyes con glamur, de noticies d'actos oficiales y too eso que ye propiu de la Corona. Pero, darréu, nesti espaciu sentí sensación de despreciu. Despreciu a la llingua y cultura asturiana por parte de la Casa Real. Pudi comprobar que na web Real tán presentes tolos idiomes del Estáu español, menos l'asturianu. ¡Y tenemos «Príncipe d'Asturies» y Princesa asturiana de nacencia! Nun entiendo cómo'l nuesu Príncipe nun tien un poco más de consideranza cola llingua propia de los asturianos. Anque inda nun consiguiéremos la reconocencia de llingua oficial, non por falta de reivindícalo. L'asturianu ye una llingua que yá cuenta con toles ferramientes que dignifiquen el so usu. D. Felipe, de xuru que sabe que munchos asturianos non solo falamos asturianu, si non que vivimos y hasta suañamos n'asturianu y que güei más que nunca (cola que ta cayendo) ye perimportante suañar ¿En qué idioma suañará doña Leticzia?


    Sentí al Príncipe espresase en catalán y n'euskera cuando va a les respeutives autonomíes. Sin embargu vien a Asturies, y ¿nun merecemos siquiera que nos salude n'asturianu?¿Pa cuándo tendrá l'asturianu la mesma categoría que les demás llingües del Estáu? Seique-y podremos echar la culpa a la crisis. Y ye que la nuesa llingua sufre crisis dende cuantayá. Debida sobre too a la crisis de mollera y a los prexuicios que sufren munchos políticos gobernantes que lleven años y más años na poltrona y apegóse-yos el culu a ella, inclusive cuando yá tán quemaos, como se suel dicir. Y asina nos va, non sólo en cuestiones llingüístiques, sinón n'otres munches estayes sociales.


    Agora que s'acerca l'actu d'entrega de los premios «Príncipe d'Asturies», recordámos-y una vez más al Príncipe don Felipe que tenga en consideranza la cultura asturiana, pero ensin despreciar nengún de los sos elementos. Nun ye sólo l'horru, y les madreñes, y la gaita (y el «pueblu exemplar»), siendo toos ellos bien importantes y prestosos. Detrás de too esto hai daqué importante onde se sofita tola nuesa cultura: la llingua asturiana. Que sirve pa nomar y rellacionar estos y otros munchos elementos: gastronomía, cantares, arquitectura, lliteratura y demás. Pero, sobre too, porque espresa la forma d'entender el mundu los asturianos.


    D'otra miente, quiero sofitar la propuesta unviada a la Real Academia Española pol coleutivu «Iniciativa pol asturianu», sofitada por munches instituciones y persones, de que la definición de los vocablos «asturiano» y «bable» nel Diccionariu de la RAE, seya rectificada, tanto na so definición como na so categoría gramatical. Nun s'entiende cómo esta Institución, que ye miembru d'honor de l'Academia de la Llingua Asturiana, sigue con esa contradicción nes páxines del so diccionariu. A los asturianos siempres nos pasen estes coses. ¿Será que lo merecemos?
     

     

     

    Compartir en Twitter
    Compartir en Facebook