La música de l´alma

ANTÓN GARCÍA Nesti discu, Mapi Quintana míranos dende la cubierta tresmitiendo fuerza, serenidá y formosura. Ye una bona manera de convidanos a entrar, porque ye lo que topamos dientro: una voz cálida y suave, a la manera d'Ella Fitzgerald, que funde les raíces na tradición asturiana. Pero tamién una música de jazz impecable, que-y da'l contrapuntu a esa voz versátil y actualiza cantares tradicionales, como «Que m'escurez», «Puertu Ventana» o la «Xota Payares», nos que rescamplen los arreglos de Quintana: nun suenen como siempre, suenen meyor. Van alternando eses pieces tradicionales con otres compuestes por ella, que canta y toca dellos instrumentos. El primer cantar, «Les alpargates de mio güela», arranca como una tonada pa dilise adulces en músiques del mundu ensin perder el raigañu asturianu. Y eso ye esti discu de Mapi Quintana: un homenaxe a los soníos asturianos de quien anduvo tocando pela tierra ancha de la música profesional col so Mapi Quintana Quintet y otros grupos, y vuelve a casa sabida y amorosa depués d'atropar oficiu pelos escenarios.


Esti discu va facer les delicies de los amantes del jazz y de los siguidores de los sones asturianos, pero tamién de los que gusten sentir bona música, ensin adxetivos. Cuando les editoriales dicen que nun paga la pena invertir en producción, El sonar de les semeyes ta fechu con procuru: grabáu o mecíu n'estudios d'Ámsterdam, Madrid y Piedrasblancas, participen nél ventisiete persones, ente músicos y voces, y curia tanto los aspectos musicales como la presentación. Nuna de les pieces fain los coros la madre y otres muyeres de la familia de la compositora, nel más puru estilu popular, pero n'otros temes arrópenla músicos non asturianos, ente los que destaca la gaita irlandesa.


Asina, lo que nos propón Quintana ye un paséu pela banda sonora d'una parte de la so vida, peles músiques que-y suenen cuando repasa l'álbum familiar, col qu'ilustra'l llibrín: una ausencia que mira por ella («Nana»), un pariente («Quintana»), o les fotos camín de la fosa común de fusilaos del cementeriu d'Uviéu («11 de mayo»). Músiques que nacen d'Asturies pa caminar hacia la samba (hai un homenaxe a Chico Buarque) o'l jazz. Nel tema «Londres», de los mios favoritos, Quintana dexa claro porqué cuando hai años punxo voz al anunciu de Nokia 6131 mediu mundu quería saber quién cantaba.