Comer y contar

ANTÓN GARCÍA Dende'l 2007 la TPA vien ofreciendo, los miércoles, un programa de cocina. Milio'l del Nido, conocíu cuentacuentos y activista de la cultura, pon el mandil y esplica a los espectadores cómo se fai un platu, aprovechando pa contar dalguna historia: quién-y deprendió una receta, cuál ye'l meyor sitiu onde se cocina esto o aquello... Amás del mandil, Milio pon lo qu'elli llama la «montera figona», la tradicional montera picona asturiana, pero de color blancu, que lu identifica como cocineru del país.


Milio'l del Nido, amás de profesional de la cocina, ye una persona bien conocida dientro de la cultura d'Asturies. Empezó vinculáu a los grupos de baille, pa dir ensiguida ampliando'l radiu d'acción: investigación etnográfica, balonmano, radio n'asturianu, conceyu de gaiteros, celebraciones del 25 de mayo, la danza prima na plaza del Paragües... En 2001 exploró una nueva faceta, la d'escritor, xuntando en Contáronmelo pa que lo contara dalgunos de los cuentos que venía relatando.


Va poco, delles de les recetes ofrecíes na TPA recoyóles nun llibru que tien el mesmu títulu que'l programa: Recetes con cuentu. La presentación d'esi volume ye clásica, siguiendo l'esquema d' «Entraes», «Carnes», «Pescaos y mariscos» y «Postres». El programa de la TPA suel ser bastante viaxeru, ofreciendo recetes del restu d'España, de Portugal, de Francia, de Cuba y de dalgún otru país. El llibru, por contra, céntrase sobre too na cocina asturiana (callos a la manera d'Uviéu, bacaláu con nata estilu Paniceiros, pitu a La Camocha, panchón del conceyu Ayer, carajillos de Salas...), anque de xemes en cuando viaxe: magret de coríu al estilu del País Vascu francés o merluza a la manera de Vigo.


El recetariu, ilustráu con dibuxos de Blanca Fumanal, enllenos d'humor, ofreznos el meyor Milio: amante de la cocina y de los productos naturales, consigue tresmitir tanto la pasión por cocinar bien como por comer, disfrutando siempre de la compañía de quien sepa dar conversación, yá seya un ciudadanu anónimu, un amigu o un artista. Quien llea estes Recetes con cuentu tendrá les claves del bon humor de Milio: amor por Asturies y pol llabor bien fechu, comer bien ensin necesidá de grandes sofisticaciones, curiosidá por too cuanto lu arrodia y ganes de compartir la so sabiduría colos demás. D'eso trata'l llibru y eso ye lo que Milio nos cuenta nél.