Hasta que Xabiero Cayarga nun nos ofreció na revista «Lliteratura» (baxo'l títulu «La tímida guapura de les cosiquines», númberu 24, 2007) una amuesa significativa de la poesía d'Hugo von Hofmannsthal, confieso qu'esti poeta yera pa min poco más qu'un nome en dalgunes antoloxíes en llingua alemana, a camín ente la gloria romántica de Heine y la contemporania de Rilke. Ye posible que pa los melómanos nun resultara un desconocíu. Hofmannsthal, miembru de l'aristocracia vienesa, d'ascendencia xudía, foi ún de los fundadores del Festival de Salzburgo y llibretista del compositor Richard Strauss, col que fexo delles óperes, ente otres Electra (1908), El caballeru de la rosa (1910) o Ariadna en Naxos (1912). Hugo von Hofmannsthal, que naz en Viena en 1874 y muerre en 1929, vio cómo en 1918 se desfacía l'Imperiu austro-húngaro. Frente al camín excluyente que diba tomar la Europa d'enteguerres cola ascensión del nazismu, del panxermanismu y los asesinatos en masa, Hofmannsthal defende Austria como un llugar d'integración, cree na existencia d'una Europa común, d'una mesma cultura.

Foi un conocíu dramaturgu qu'inició'l so averamientu a esti xéneru adaptando obres de Sófocles, Molière o Calderón. Baxo la influencia del autor español tán escrites dos de les sos obres teatrales esenciales, La torre (1911) y El gran teatru del mundu de Salzburgo (1922). Pero enantes de l'actividá musical o teatral, de les sos noveles o ensayos, Hugo von Hofmannsthal diose a conocer como poeta.

Lleendo esta curiada edición bilingüe de la so poesía, enterámonos de que Hofmannsthal foi un poeta precoz. A los 17 años yá publicara los primeros poemes, y a los 26, hacia 1901, pensó que yá nun tenía más nada que dicir y nun volvió a escribir poesía. Pa xustificar esi silenciu poéticu publica un ensayu que titula La carta (1902), más conocíu agora como La carta de lord Chandos. Trátase d'una supuesta carta que'l xoven escritor Philip, lord Chandos, escribe en 1603 a Francis Bacon anunciándo-y la so renuncia a toa actividá lliteraria; en realidá, ye una refexión sobre la so propia experiencia creativa, sobre la incapacidá que sufre'l poeta de poner en relación el sentimientu íntimu que-y produz un obxetu y la so expresión.

Hofmannsthal ye d'esi tipu d'autores mui xóvenes que de xemes en cuando broten con una voz fecha, ensin que precisen períodu de maduración. Por ello la so obra, anque xuvenil, influyó notablemente nos sos contemporanios (George, Hauptmann, Rilke...) qu'aspiraben a renovar la lliteratura centroeuropea. Pero anque nun escribiera más poesía, lo lírico (entendío nél como la busca d'armonía) impregna'l restu de la so obra. Hai quien lu etiqueta como un poeta románticu impresionista, igual porque los sos versos tienden a la malenconía, buscando reflexionar sobre l'apariencia y la realidá más que reflexar el yo emocional: lo subxetivo parez quedar relegao a un segundu planu en favor d'una especie d'experiencia espiritual, un misticismu más estéticu que relixosu. La de Hofmannsthal ye una obra poética que tien muncho de simbolista, pero tamién tien puntos de xuntura col modernismu hispanu nesa pasión confesada pola sonoridá de les palabres: a Xabiero Cayarga parez-y sentir nesta poesía, de ralo en ralo, una musicalidá que tamién alcuentra na obra de Pepín de Pría, col que compartió un mesmu tiempu históricu, anque los estímulos culturales y los resultaos seyan bien distintos.