La etiqueta d'obra que forma parte d'un nuevu costumismu parez pinta-y bien a Yoni y yo, el primer llibru de cuentos que publica Pablo X. Suárez (Orviz, Siero, 1981), na yá imprescindible colección «Mecánica popular» de Suburbia Ediciones. Nesti llibru de relatos alcontramos, n'efectu, eso que los maestros hispanoamericanos del costumismu postulaben pal xéneru: «la descripción del ser humanu nel so ambiente». Pero, si en cuenta de sacalos agora, Suárez publicara estos cuentos nos ochenta, la etiqueta sería la de realismu gochu, como se dixo ente nós, cuando Carver empezaba a descubrinos una nueva manera de contar, non mui alloñada del estilu desenfadáu y atentu de Pablo X. Suárez. El realismu suciu nun yera tanto cuestión d'escenarios cutres, nin d'hixene corporal o mental, como de técnica narrativa (cenciellez descriptiva ensin moralina) pa contar la vida corriente de ciudadanos anónimos. D'eso se nutren los personaxes d'esti llibru, como Yoni, el protagonista de la primer parte, «un puntu zumbáu y argadiellu» que diría Alfonso Velázquez. Na segunda parte, nos relatos en primera persona, hai mayor variedá d'escenarios y personaxes, ensin perder del too l'aire de familia.

Pablo X. Suárez pon, como quería Stendhal, l'espeyu en mediu del camín. Lo que reflexa nun ye complaciente: xente que s'arrastra hasta una tasca p'apurar un tragu, que s'alimenta de pinchos, que busca dalgo que metese. Ello nun quita pa que quieran o sufran, pa que-yos preste sentir música tecno o xugar a dalgún videoxuegu. Pablo X. Suárez espeya esos ambientes marxinales, los sos personaxes muévense a menudu pelos araxales de la civilización, pero la so técnica narrativa ye bien depurada, como esos pintores que tienen deprendida la llección del realismu enantes de dedicase a la pintura xestual. Quiciabis abuse un poco de les mayúscules (¿influencia del llinguaxe d'internet?), pero nestos cuentos, abiertos, Suárez sorprende al llector con un relatu de lo cotidiano qu'amuesa lo evidente (por exemplu, que les pizzes tienen «esi calor amigable igual al del foliu de fotocopia acabante salir de la máquina»), coses que nun supimos ver hasta qu'él nos lo enseña ensin aparranos con técniques sorprendentes nin alardes culturalistes, anque ensin renunciar a ellos.

Porque Pablo X. Suárez ye un autor cultu, perspicaz, agudu, intelixente y que lleva años construyendo un mundu lliterariu propiu. Nun-y da más que dalguién confunda al escritor colos personaxes de les sos histories: eso quier dicir que la so manera d'escribir funciona. Y quien llea esti estupendu llibru de cuentos daráse cuenta de lo bien que funciona.