Delantre de la publicación d'un llibru de partitures, los que nada sabemos de notación musical poco más podríemos dicir que señalar la satisfacción de que se componga música basada nos poemes de los escritores clásicos asturianos, y de que s'edite con bon gustu, de manera que los cantantes o los coros puedan acceder a estes composiciones pa incorporales al so repertoriu. Por suerte, l'Album de canciones de Manuel Fernández Avello (Trevías, 1947) publícase a la par qu'un cd, colo que los analfabetos musicales podemos facenos una idea completa de lo que nos ofrez l'actual director del Conservatoriu Superior de Música d'Uviéu.
Son siete los cantares a los que pon música, tres pa voz y pianu sobre textos de Fernán-Coronas (1884-1939) y cuatro pa coru de voces mixtes y pianu, sobre dos poemes de Pepín de Pría (1864-1928), ún de Xuan María Acebal (1815-1895) y otru del mesmu Fernán-Coronas. El llibru, y polo tanto tamién el discu, ofrez variedá, modernidá y tradición. Oise Asturies n'él ensin que les composiciones suenen a conocíes, nun sé si porque Fernández Avello aprovecha bien la llición que nos deprenden los cancioneros tradicionales asturianos, o porque unes lletres n'asturianu averen cualquier música a esta tierra. Esti trabayu ábrese con una guapa añada, «Durme nenu», que foi tamién la pieza qu'allá pel 1991 punxo en marcha les inquietúes compositives d'Avello. Yá en 1993, nes celebraciones de la Selmana de les Lletres Asturianes dedicaes a Fernán-Coronas, estrenó los tres cantares pa voz. Nesti discu destaca la interpretación que fai de los temes solistes la sopranu Beatriz Díaz (Bo, 1981), cantante de proyección internacional, con una voz maraviosa. La dicción y la expresión resulten técnicamente impecables, pero tamién destaca'l sentimientu. Nun se diz na biografía qu'acompaña'l llibretu del discu, pero a esa emoción, a la entrega que pon Beatriz Díaz, dalgo pue que contribuya'l so empiezu como cantante de tonada: naide pue negar a estos intérpretes de la tradición musical una xenerosa identificación cola cultura d'Asturies.
A la mesma altura tán la Camerata Revillagigedo, baxo la dirección de José Fernández Avello, y la pianista Rosario Álvarez, colo que'l discu ye una pequeña xoya de la música asturiana. Yá lo señalamos más arriba; Manuel Fernández Avello aprovecha los recursos de la tradición musical asturiana, pero tamién los sos conocimientos de la evolución de la música culta, pa ofrecer excelencia, variedá y un interesante camín autóctonu na evolución del históricu lied.
