El del teatru costumista asturianu ye un casu bien interesante de conexión ente públicu, creadores y argumentos. Con más de cien años enriba (en 1907 l'actor Pedro Granda propón crear un Teatru Rexonal Asturianu, anque yá en 1905 Marcos del Torniello s'adelanta a la fórmula que diba triunfar cola obra «La esfoyeta»), esti teatru popular sobrevive con envidiable salú a la movida historia del sieglu XX y al cambiu de mileniu. A diferencia del restu de la lliteratura que s'escribe n'asturianu, nel teatru costumista Conceyu Bable nun consiguió nenguna ruptura: nin siquiera la propunxo. Nes époques nes que nun había creadores nuevos, les compañíes d'aficionaos reponíen una y otra vuelta les obres clásiques del xéneru, onde Eladio Verde yera'l maestru indiscutible. Y consiguíen enllenar una y otra vuelta los pequeños escenarios de toa Asturies.

Na última década, sicasí, esti teatru ta anovándose: dende les propies compañíes van saliendo dalgunos escritores (Carmen Duarte, José Ramón López, Carmen Campo, Carmen López...) que s'atreven a dar el pasu de crear textos nuevos, asemeyaos a una tradición de la que se sienten parte. Ente estos escritores, el más prolíficu, el más innovador y tamién seguramente'l más capaz ye José Ramón Oliva (Gargantada, 1966), que lleva dende 1991 al frente de la Compañía de Teatru Carbayín y abondos más años (dende los catorce) vinculáu al mundu del teatru popular. Oliva yá tien publicaos unos cuantos llibros que recueyen obra teatral propia, pero agora participa, xunto con José Neira (Xixón, 1962) y Sergio Manuel Buelga (Xixón, 1979), na iniciativa editorial que dende hai años vien sacando Feteas, l'activa Federación de Grupos de Teatru Amateur del Principáu d'Asturies.

Nel volume Teatru n'asturianu 2010 ofrecen estos autores una amuesa de lo que supón esa renovación teatral, cada vegada menos costumista, menos falsamente típica y más realista, pero ensin perder frescura nin garra popular. Asilu por compasión, la obra d'Oliva, fai un retratu de la vida nuna residencia d'ancianos; Como les bicicletes, de Neira, fala de la memoria histórica; y La pita, de Buelga, tien un argumentu más averáu al enredu amorosu tradicional. Les tres obres son un bon exemplu del llabor que les numberoses compañíes d'aficionaos echen per toa Asturies, abandonando poco a poco los arquetipos y la mirada bondadosa a la quintana como esencia arcádica d'asturianía (que namás existió na alcordanza señaldiosa de dalgunos autores), pa dir faciendo un retratu social cada vez más axustáu a la realidá asturiana. De la vieya escuela de teatru popular caltiénse'l favor del públicu, cada vegada más mozu, el compromisu asturianu y la llingua, un méritu indiscutible de toa esta xente que vive pal teatru por amor al arte.