Cuando un artista, con una llarga traxectoria detrás, fai una incursión creativa nun tarrén non habitual cuesta nun poner en relación esa obra nueva cola conocida. Ye'l casu d'Ánxel Nava (Uviéu, 1953), escultor y artista plásticu de difícil clasificación, qu'en 2009 sorprendía ganando'l Teodoro Cuesta de poesía. Hasta esi momentu l'Ánxel Nava lliterariu limitárase a sirvir de voceru a dalgún de los sos personaxes, como Mariquina la Galana, la pega lliteraria que paseó per xuntes d'escritores y actos reivindicativos varios. Ganar esi premiu suponía un pasu alantre pa Nava, al llograr el respaldu del xuráu del premiu con mayor prestixu ente les lletres asturianes.

Esta primer entrega poética, Cilurnión, pue ponese en relación cola so creación plástica. Si la base de la obra escultórica y accionista de Nava ye per un llau la intervención del ser humanu sobre la naturaleza, per otru la memoria de la tierra y la historia, y tamién el compromisu social, Cilurnión participa d'esos mesmos elementos, anque cambiando los materiales (minerales, vexetales, agua, fueu... de les sos acciones artístiques) por palabres, tamién recuperaes d'ente les ruines de la desmemoria. El nome que da títulu al llibru sería'l de la hipotética ciudá (que s'identifica cola Campa Torres, en Xixón) de los cilúrnigos, ún de los pueblos que toparon los romanos cuando llegaron al Cantábrico na so conquista d'Hispania. Dizque yeren metalúrxicos (hai quien apunta que «cilurnum» significa calderu), lo que permite a Nava establecer una analoxía ente aquellos guerreros que resistíen al imperiu y los obreros del Naval, a los que se rinde homenaxe lliterariu nestes páxines.

De la mesma manera que se manda del surrealista «obxetu atopáu» pa construir el so discursu artísticu (ensin perder por eso les referencies a un tiempu y a un llugar concretos), el poeta Ánxel Nava tamién s'avera al surrealismu; présta-y trabayar sobre l'acumulación d'imáxenes en llargos párrafos, ensin patrones métricos, usando un llinguaxe mui buscáu (nun sé si debería dicir «atopáu») que lu acerca a los sos compañeros de xeneración y nel que nun falten nin un variáu vocabulariu d'oficios nin la precisión expresiva popular y ensembre. La so poética ye rica en connotaciones y ta desnuda de tou sentimentalismu; demórase en delles constantes: la naturaleza, les creencies d'una tradición asturiana fondamente atlántica, referencies mítiques (cultes, populares o propies), el trabayu rexenerador, noticies d'actualidá elevaes a la categoría de símbolos culturales... Ánxel Nava remata ún de los sos poemes con estos versos: «dafechu toa poesía | toa esperanza tornóse cantar de la destruición.» Asina entiende'l fechu creativu: en cayendo les muries de la resistencia flui «l'islán de la memoria» y empieza l'arte.