Xurde Fernández (Candás, 1975) ye un de los narradores más prolíficos d'estos cinco últimos años, entregando a los llectores, na práctica, más d'un llibru al añu. Dende l'inicial El color del escaezu, publicáu en 2007, a comuña con Marián García, nun dexaron de salir novedaes: Volver (2007), La espera (novela, 2008), Díes d'inviernu (2009), Ucrania y otros nomes de muyer (2009), amás de dalgún títulu de lliteratura infantil o d'investigación toponímica o didáctica. El llibru que traemos equí ye una ambiciosa novela de más de cuatrocientes páxines, Intentu d'escritura. Son varios los aspectos d'esta obra que llamen prestosamente l'atención al posible llector: que seya una novela negra, la variedá tipográfica que diferencia les estremaes voces que vamos topar nella, o les ilustraciones, les manches del test de Rorschach, que s'usa n'análisis psicolóxicos. Tamién la trama abulta interesante, porque miez una investigación criminal con pingarates de novela psicolóxica. Sabemos dende'l primer momentu que la obra va xirar alredor del asesinatu d'Ágata, apuñalada violentamente na so casa. Esa muerte pon en marcha a los distintos personaxes, dende'l forense qu'examina'l cadabre y que tuvo cola muyer una importante relación, pasando peles amigues de la fallecida, María y Carme o Ana, hasta los investigadores Hernán y Salvador... Alternando'l relatu de les peripecies vitales d'unos y otros n'estilu indirectu, y con diferente tipografía como yá diximos, entecállase una voz en primer persona, la d'un escritor alcoholizáu que reflexiona sobre la so vida, hasta qu'al final de la novela conflúin entrambes narraciones.

Pero enantes de llegar a esi remate, el llector yá se da cuenta de que la novela nun funciona. L'autor nun consigue trazar de manera diferenciada'l perfil psicolóxicu de los sos personaxes, que necesitaben mayor elaboración, y que tal y como se presenten podíen intercambiar vides ensin que lu notáramos. La historia avanza y retrocede acumulando información externa (qué comen, cómo viaxen, qué música escuchen...) pero ensin que se remate la construcción moral de nengún d'ellos, nin tan siquiera del asesín o de la víctima, quedando'l relatu nun llargu catálogu d'actividaes.

La falta d'un estilu narrativu eficaz nesta novela, sorprendente nun autor yá experimentáu, contribuye al desaciertu. N'Intentu d'escritura Xurde Fernández narra torgando l'avance de la llectura a base d'enxertar un paréntesis (y a vegaes dientro d'él otru paréntesis) na oración principal, na que se dan sucintes descripciones del buizu diariu de los personaxes. Termina ún cola impresión de qu'esta novela necesitaba que se desarrollara'l conteníu d'esos paréntesis, nos que se tropieza.