Prestábame escribir de Pelayo, el rei primeru de los asturianos, pero lo que tengo na cabeza ye una pareya de danzantes y nun puedo quitar la so espléndida coreografía del maxín. Resulta fascinante. Son mozos, un home y una muyer, y la fiesta paró pa velos movese cola solemnidá que merez esa danza de Tuña que llamaben el Puntu, güei yá perdida, pero que puedo describir porque me contaron d'ella los últimos que llegaron a vela baillar, dirá pa un sieglu. Mio padre dicía que yera una especie de minué de cortexu na qu'una única pareya baillaba en círculos. La muyer tenía una actitú dalgo pasiva, manteniéndose siempre irguida y moviéndose con pasos curtios pela pista, colos brazos non mui separaos del cuerpu y xirando a veces sobre ella mesma. De magar, el mozu movía los brazos llevantándolos y baxándolos alternativamente, acercándose a la moza mientres texía pasos colos pies y alloñándose d'ella p'atrás con una especie de curiosu zapateáu, de patadines rápides y curties en suelu. Tamién xiraba sobre él. A veces encarábense mozu y moza y danzaben pegadinos, pero nunca llegaben a tocase. Mui raramente yera la gaita l'instrumentu d'esta danza, que nun tenía lletra que cantar; tocábase con vigulín o flauta, con un ritmu cadenciosu y lentu, ceremoniosu, y nunca la acompañaba nenguna percusión.
Quien la ta danzando pa min son xente que yá morrió nel sieglu XIX. Ella ye una muyer que llamen la Monina, Ramona la de la casa d'Arriba, y el que xira alredor d'ella ye'l señoritu del palaciu'l Barreiru, que namás se digna baillar esta pieza una vez al añu. Son los meyores danzantes del país. Y yo, que quería escribir de don Pelayo, sé qu'enantes d'empezar cola historia d'aquel rei tendría de contar otres coses, como la historia de la Torre de la Meisón de Tuña. Asina vuelvo otra vuelta a la Monina, porque esta muyer de la danza tamién yera la más soberbia contadora de sucesos qu'hubo en pueblu. Tenía cásique tolo que me falta a min: una memoria prodixosa, una capacidá de fabulación estraordinaria, y un talentu natural pa la versificación.
Nun puedo dicir que fuera escritora, porque nunca punxo en papel una lletra de lo que la so cabeza ideaba, anque supiera lleer y escribir. Ella componía de memoria y sobremanera improvisaba a la midida del momentu. Como Hilario, el padre de Tina la Campa, un llabrador de la Veiga Quintana al que conocí, la Monina llevaba'l rexistru mental de tolos sucedíos, non solo del pueblu, sinón del Cuartu la Riera: feches de nacimientu, casoriu y defunción, deldes y pagos, noticies varies, del so tiempu y d'abondo enantes de qu'ella naciera... Quiciabis la Monina tuviera mayor méritu qu'Hilario, porque nun disponía de nengún almanaque y yera quien a convertir de memoria eses feches a cualquiera de los cuatro calendarios que manexaba y qu'ella llamaba l'antigu, el paganu, el cristianu y el católicu.
Esta muyer, Ramona, yera una fervorosa creyente, lo que nun quitaba pa que fuera tamién dalgo bruxa, benigna, especialista en desempanamientos, maldegüeyu, fervinchos y bálsamos. Nada que deseara mal a naide, y too siempre acristianao con rezos y cruces de la igresia católica. De moza fuera una gran bailladora, como queda dicho, pero d'ella ponderaben sobremanera dos coses: les infinites histories que sabía y los versos qu'improvisaba pa cada ocasión. D'estos últimos los más celebraos yeren los que componíen aquel romance nel que diba repasando cada pueblu. Dicía, si la memoria nun traicionó a los que me lu contaron: «Para peniel.los en Tuña / redondos como fogazas, / en Pousada cebol.lín, / en Santianes la hortelana, / en Soutu los cagayones / que d'eso tienen la fama. / Las bruxas, de Pontecastru, / qu'al.lí salen a menadas. / Para penas en Casares / que las tienen bien mediatas...". Al parecer continuaba pueblu a pueblu, nun fairá falta dicir que siempre n'asturianu, pero naide hubo que me recitara más.
La mayor parte de les histories que contaba la Monina yá quedaron enterraes nel olvidu. Yo pudi rescatar delles, mui poques, atendiendo más al espíritu qu'a la lletra. D'esi olvidu mio padre echaba la culpa al so buelu, a Milio, aquel home de poques palabres, porque cortara'l filu de la tradición oral y dexara a los sos nietos ensin memoria. De nenos, dicía mio padre, cuando l'hibiernu aullaba fuera y toos se recoyíen al par de la llariega prendida, en cuenta de facer el relatu de los tiempos pasaos, Milio García de Castañéu sentábase mirando cómo ardía'l fueu y nun soltaba palabra. Si dicía dalgo yera siempre pa riñir y parez ser que nun-y prestaba nada aquella vieya, la Monina, pariente de la muyer, porque dende'l so pensamientu cristianu vía nella una verdadera bruxa. La buela Ramona, la muyer de Milio que yera sobrina de la Monina, morriera enantes de que los sos nietos alcanzaran a conocela, asina que la de Moruecu terminó siendo una familia con poca historia que tresmitir.
Pero dalgo siempre queda de cuanto s'echa a rodar pel mundu, y puedo rescatar dalgunes coses de les que contaba aquella muyer. Pa la Monina, tres yeren los grandes protagonistes de la historia: Pelayo, Catalina Suari y Rafael del Riego. De Riego nun fai falta que volvamos falar agora. Sí paga la pena posar un momentu en Catalina, una d'estes muyeres bragaes y recies de les que nun suelen falar les cróniques escrites, pero de les que queda memoria pol so comportamientu singular. Vivió en Tuña na primer mitá del sieglu XIV y d'ella vien, según parez, la casa de Cabolríu. Casó con Diego García de Tineo, infanzón qu'anduvo grandes temporaes pel sur d'España batallando contra los moros, pela parte d'Alxecires, asina qu'ella foi siempre sola. Pero nun quedó alcordanza d'ella por eses razones. Yera una muyer avezada a llevar el ramal de la casa, ensin que nada se-y punxera per delantre. Igual mandaba aforcar a un lladrón qu'ella mesma disparaba cola ballesta, lo que nos da a entender que tenía bastante fuerza, porque yera a tensar la cuerda (poner la ballesta, dicíen) ensin rabil nengún.
Pero lo más ablucante que contaba Ramona d'esta Catalina foi que llegó a matar un osu coles sos propies manes. Ocurrió una vez que diba a caballu, con más xente de casa, a visitar unos parientes que tenía pa L.leiguarda. Al baxar pela zona del Estel.leiru toparon nel mediu del camín un osu de considerable tamañu. Les caballeríes y los criaos que la acompañaben espantáronse y salieron a escape, armándose tal zurreburre que'l caballu nel que diba ella llevantóse y, anque bona encabalgando, Catalina terminó en suelu. L'osu, tamién asustáu, enfiló pa onde taba la muyer tirada y alzóse imponente p'atacala. La de Tuña, ensin pensalo, revolvióse en suelu, púnxose de pies d'un blincu y de manera inesperada arrancó en dirección al osu sacando d'ente la ropa una almarada que siempre llevaba, un puñal llargu ensin filu, que namás pincha. Enantes de que naide pudiera dase cuenta bien de lo que pasaba, nin tan siquiera l'osu, taba amarrada al cuerpu del bichu mientres-y clavaba l'espetu ente les costielles, rectu al corazón. L'animal intentó mordela na cabeza, pero lo único que llogró foi engancha-y el moñu altu que llevaba, espelurciándola. Nada sé yo d'osos, pero los cazadores qu'hubo na mio familia dicíen que'l puntu débil d'esi animal ye'l cuerpu a cuerpu una vez que consigues apegate a él. Nun tien nin brazos nin garres aviaos pa refugar nada que se-y agarre al cuerpu, experiencia qu'aprovechaben los cazadores antiguos pa cobrase a cuchiellu esta pieza de caza mayor.
Volviendo a la Monina, los últimos años de la so vida, cuando yera una vieyina revenida y diminuta, dio en pensar nos calendarios que siempre manexara con tanta soltura y llegó a la conclusión de qu'andaba la Biblia confundida tocante a los años que vivieran los antiguos, Matusalén, Lamec, Noé y toa aquella familia de la que se diz que vivió cientos y cientos d'años. Mandó llamar al cura pa falar d'ello, pero Juan Martínez, el párrocu, nun quería discutir con aquella muyer que tenía fama de bruxa asuntos bíblicos nos qu'elli, la verdá, nun yera mui dueitu, y diba dándo-y llargues. Hasta que la vieyina se punxo mala y pareció a toos que diba morrer. Cuando'l cura se presentó na casa d'Arriba pa da-y la extremaunción, abrió un güeyu la Monina y empezó a dici-y que la Biblia taba confundida, que contaba como años les llunes y que por eso falaba de que Matusalén viviera 969 años. El cura pañó nun pulaire los santos óleos que llevaba, la estola y el crucifixu, y marchó reburdiando camín de la igresia.
Ramona, aquella vieya contadora d'histories y facedora de versos, la meyor danzante de Puntu que conocieron los tiempos modernos, diba vivir abondos años más. Queda pa otra vez contar la historia de la Meisón y dalgunos de les fechos de Pelayo y d'Allebrando, aquel embaxador que según esta muyer yera de Tuña. Pero agora quédame facer el relatu de cómo cuenten que morrió la Monina. Dicen que-y costó, que se metió na cama y, anque nun probaba bocáu nin movía músculu, siguía alendando mientres parecía apagase poconín a poco, ensin qu'acabara de pasar a la otra vida. Parecía que la muerte s'olvidara d'ella, y andaben los que la queríen dalgo esmolecíos porque sufriera tanto, que yá s'allargaba pordemás aquel momentu, cuando dalguién dio nel quiz p'axudala nel trance. ¿Nun dicíen que yera bruxa? A ún de casa Xepe ocurrióse-y un remediu qu'oyera a los vieyos y que podía venir bien pal casu, y mandó que-y metieran na cama una escoba. Asina lo fixeron, y punxeron la barredera del fornu, fecha de xiniestes, echada al par d'ella. Y sería por eso, o porque-y llegara la hora a la Monina, pero al amanecerín del día siguiente la Monina morriera. Unos dicen que faltaba la escoba y otros que non.
