Escultura, obra espacial, que non estatua. La estatua ye imitación del natural, partiendo d'un modelu, espeyando persones o conceutos alegóricos. La estatuaria cinca a representación de figura. Ye'l casu de la personificación figurativa de les estatues de la dómina de Gabino n'Uviéu, tan personales que namás falta la suya, en cualesquier de les sos modalidaes: propia, ecuestre, xacente, orante o ufriente. Agora que l'alcalde abandona l'Ayuntamientu y dexa atrás la so estatua de sal, la pieza d'Alba pasa de la Sodoma del gabinismu a la Gomorra del posgabinismu. Torna otra vuelta y nun topa col PP, sinón cola torga de Foro, que nun entiende gota lo que ye la escultura pública.
Nun querría dar otra vegada razones artístiques, urbanístiques o conceutuales. Diéronse abondes nuna reunión na Escuela d'Arte d'Uviéu. La xuntanza de políticos con profesionales del arte nun yera pa posar o facer bustos d'escayola, yera pa falar de los argumentos qu'afitaben la reubicación de la escultura y presentar una moción en Plenu. Dos grupos políticos municipales, IX y PSOE, tovieron presentes; los otros dos, Foro y PP, ausentes. Criterios, ocasión hubo pa esponelos. Na Escuela tuvo l'autor de la pieza, y alcordóse por unanimidá proponer Llamaquique como llugar adecuáu. De Foro nun dixeron res. ¿Ocúrrese-yos agora salir cola estatua pal vial de Les Campes?...
La Corredoria, Les Campes, tan desnortiada una propuesta como la otra. Un vial ye por definición un non llugar, un espaciu de circulación que va d'un sitiu a otru, ensin más que ser un vector de movilidá urbana. Na teoría de Marc Augé los non llugares son espacios ensin personalidá, unos iguales a otros. Los vecinos de Les Campes nagüen con toa xusticia pol vial de comunicación, pero la vía urbana nun pue ser un aparcamientu d'escultures güérfanes. Les razones que descarten ellí la pieza son les mesmes que pa una retonda: son espacios de tránsitu automovilísticu onde nun cabe la contemplación serena, pola velocidá.
Dende que s'instalara nel barriu Ventanielles, ensin iguar l'espaciu de la plaza, como yera'l proyeutu d'orixe, espardióse esa pantasma de la pieza peligrosa pa los neños, una cantinela pa xustificar la falta criterios polos que se quitaba. Con esti cuentu anecien a echala pa otru llugar. Pero la escultura urbana de Fernando Alba ye de contemplación, non de xuegu. De fechu, los guah.es xueguen sueltos pelos barrios, con más llibertá; nel centru, los espacios de xuegos tán acutaos y los neños avezaos al güeyu proteutor de la familia. Nun hai mieu qu'invadan la escultura. Si la educación vial los enseñaa cruzar la cai en verde pel pasu cebra, tampoco ye imposible que los rapacinos deprendan a respetar una obra d'arte asitiada nel espaciu verde. Nun sería malo que la obra toviere una función pública más: la d'educar a neños y grandes na perceición visual. Enseñar a ver tamién ye función social del arte.
Por si nun abastara con ésta, entra otra pieza en danza. Apaez agora una obra de Camín en figura de Cirineo p'acostinar cola cruz del espoliu. Una escultura que taba nel palacete'l Sanatorio Miñor, nel patiu la desapaecida y recuperada Fundación Municipal de Cultura, reconvertida a Fundación particular. Tampoco foi del preste'l rexidor, pol pecáu de ser contemporánea. Condergada al ostracismu, con meyor suerte que la d'Alba a,cabó asilada nel parque escultóricu del Muséu Antón de Candás.
La de Camín ye una pieza horizontal de fierro, de menor tamañu qu'aquella, con planches allongaes que xeneren un espaciu pa dos ángulos abiertos. Una pieza pa mirar de cerca, dende arriba, dialogando col xardín, necesita un espaciu afayadizo y non tar al abertal. Tan malo sería un vial pa esta escultura como pa la otra. Tampoco merez esi tratu la obra de Joaquín Rubio Camín, otru gran escultor asturianu del sieglu XX.
La ubicación de les dos pieces nel mesmu espaciu nun ye más qu'una estratexa de llexitimación pa tapecer l'agresión a la escultura d'Alba y pasar el tragu de reponela. Pero esto nun ye una esposición coleutiva al aire llibre. Ye rescatar una obra artística que sufrió un atentáu y tornala a la so integridá espacial. Una obra inxustamente retirada del patrimoniu de la ciudá.
La siella de conceyal nun da diploma d'escultura. ¿Qué criterios estéticos vamos esperar cuando a güeyu de tratante deciden costos y llugares los conceyales, los alcaldes pedáneos y hasta Perico de los Palotes?... Toos y toes, menos l'autor. Ensin debate nin criterios profesionales, asegún-yos pete a los opinólogos, echen la llingua a pacer, proponen el llugar al so bedríu y usurpen el del escultor. Pel vial al vía crucis, van pa diecisiete años mareando la perdiz. Otra vuelta a la retonda, d'equí p'allá cola obra, que sí, que non, la danza de la usurpación. La escultura nun importa cosa. Les claves d'esta danzaina política nada tienen que ver cola función del arte.
¿En qué ciudá d'Europa veríemos esti procesu kafkianu cola pieza d'un reconocíu escultor?... Trátase de reparar pal arte d'Asturies un crime cultural, l'articidiu en qu'incurrió l'Ayuntamientu d'Uviéu. De tornar al estáu d'espresión anicial la obra qu'una alcaldada censuró cola represión. Lo que cueste nun ye cosa de puya pública, ye obligación llegal arreglar l'estrozu de la obra, más los drechos artísticos y morales del autor. Y será poles buenes, o pela vía xudicial, como tenga de ser el vial.
Dalgo vamos avanzando. De primeres nun queríen la pieza, agora yá falen de poner la escultura. Entá falta'l diálogu col autor. Pa la reposición de la escultura de Fernando Alba el respetu al escultor y a la pieza son imprescindibles. El nuevu alcalde, si ye más sensible al arte, tien ocasión de rectificar. Ye menester otra sensibilidá del Conceyu pa coles artes actuales y la penuria d'esta pieza ye símbolu d'una torga cultural a superar. Somos munchos los ciudadanos y ciudadanes d'Uviéu que naguamos pola solución. Quousque tandem, que diría Oteiza.
