Contaba Balbina Suárez, vecina de Cadavéu, cómo Casimiro Cienfuegos llegara a visitar en plena guerra (cuando yá cayera Asturies) a un doliente Padre Galo, echáu na so chaise longue de bambú, pocu tiempu enantes de qu'esti ingresara nel Hospital Asilu de Villar, onde diba morrer. Cienfuegos apareció vistíu con un traxe que-y fixeren les tíes en casa, compendiu de lo que yera'l llamáu Movimientu Nacional: camisa azul falanxista, corbata negra, chaqueta blanca a lo Serrano Suñer, correaxe militar y boina colorada de los requetés. El Padre Galo, que firmaba lliterariamente como Fernán-Coronas, animóse cola visita y pidió-y la boina, qu'apretó contra'l pechu y dixo: «¡Qué pena, eh Mirín, qué pena!». ¿El Padre Galo simpatizante carlista? Nesi momentu guapamente sí, muncho más que falanxista o nacional sindicalista, novedaes ideolóxiques que nun diríen gran cosa a quien s'identificaba como conservador y monárquicu alfonsín, quiciabes más d'Alfonso III el Magnu que d'Alfonso XIII, al que vio con pena marchar al exiliu.

A esta anécdota, que s'interpretaba como un llamentu por que la simboloxía carlista se sumiera nel Movimientu, referíame yo cuando nuna conferencia apuntaba de pasada la simpatía de Fernán-Coronas pol tradicionalismu, y ye lo que-y permite a Javier Cubero de Vicente incluir a esti poeta nel so llibru Del Romanticismu al Rexonalismu: escritores carlistes na lliteratura asturiana, premiu «Fierro Botas» d'Ensayu. Los otros escritores estudiaos son Xuan María Acebal, Manuel Fernández Castro y Enrique Gra-Rendueles. Carlista o non, la presencia de Fernán-Coronas nesta obra dexa a Javier Cubero redondear una brillante aproximación al carlismu asturianu, esa suma de diverses ideoloxíes que se definen conxuntamente pola so oposición al lliberalismu triunfante y a que l'Estáu dexara de ser confesional. La obra d'estos autores, esenciales nel desarrollu de la lliteratura asturiana, tócase nesti llibru namás de pasada (anque n'apéndiz s'ofrez una breve antoloxía de poemes de los cuatro), pero sirve a Cubero de Vicente (Xixón, 1986) p'armar una interesante y actualizada síntesis de lo poco qu'entá se conoz sobre esa ideoloxía, atendiendo más a la socioloxía política qu'a la cultural.

El carlismu asturianu pide a gritos un detalláu estudiu de conxuntu, y ye posible que Javier Cubero, xoven historiador con muncho camín andáu nesi tarrén, pudiera ser la persona indicada pa entamar un trabayu que la historiografía asturiana agradecería. En primer llugar, porque diba desvelanos una realidá mui rica que llega tapecida y parcial, pero tamién pa evitar cayer en mistificaciones. A fin de cuentes, ún de los responsables de la ocultación de la obra de Fernán-Coronas foi un tradicionalista, Jesús Evaristo Casariego, que, pa facer más complexa la rede na que nos desenvolvemos, quixo dexar testimoniu de la so asturianidá escribiendo n'asturianu (y publicando) unos cuentos, dos sonetos y la traducción del poema «Engellieder» de Rilke.