Empezar a publicar tarde n'asturianu aforró-y a Xosé Bolado, como a Pablo Ardisana o a Xosé Manuel Valdés (tres nomes indispensables d'esta poesía), andar tantiguando en busca d'un llinguaxe poéticu modernu y eficaz. Foi de los primeros que se sumó, con entusiasmu críticu, a la renovación temática y llingüística que proponía la revista Adréi nos años ochenta, y colos sos trabayos como antólogu fixó los nomes del nuevu grupu lliterariu. Bolado (Uviéu, 1946) nun publica'l primer llibru nesta llingua (nos años ochenta fixéralo n'español) hasta'l 2002, arrancando con una entrega mayor, Conxura contra la decadencia, onde reflexiona sobre'l pasu del tiempu, la memoria de lo cotidiano y la naturaleza como marcación pela que cuerren la vida, l'amistá y la cultura. Na estación de los relevos, en 2006, continuaba la llinia del anterior, quiciabes con mayor desesperanza, y anque nos ufiertaba unos pocos poemes mui breves, la mayoría yeren discursivos.

La tercer entrega n'asturianu de Bolado ye un llibru bilingüe de poemes en prosa, La bona intención / La buena intención. La nota d'agradecimientos, al frente, arranca con una declaración de principios: «L'archivu de la memoria, suxetivu ya emocional nel so gobiernu de les pallabres secretes, sirvió de fonte a estes páxines». Memoria, emoción contenida y un sabiu manexu de la tensión poética ensin renunciar a la narratividá son característiques d'esta entrega yá dende'l primer textu, el que lleva'l títulu del llibru. Bolado aprovecha esa historia de posguerra (dos muyeres que viven soles nuna casa na qu'aparez en tendal ropa d'home, de lo que tienen que responder ante la guardia civil) pa ofrecer al llector una reflexión sobre'l conceptu filosóficu de la intencionalidá, la relación ente conciencia y mundu.

Esi «archivu de la memoria» nun ye solo de vivencies personales, da la impresión de que necesitara, amás de dar cuenta de la so propia experiencia, emprestar la so voz a la comunidá, arriqueciendo'l llibru con otros acentos. La madre que pierde al fíu y topa baxo un almariu una onza de chicolate comida pol nenu, la vieya qu'apiella a los pas na UCI d'un hospital, la terrible relación del güelu col pan nos tiempos de la fame... son escenes con gran impactu emocional qu'alternen cola traxectoria más intimista del personaxe principal, qu'opta por guardar una obxetiva distancia, apoyándose na naturaleza, nos obxetos cotidianos, n'elementos clave que conocíamos de la so poesía anterior, como'l soníu de la sirena del pozu mineru. La memoria, les referencies culturales y lliteraries de les que se manda, xunto colos afectos, sirven a Bolado p'abellugar de les inclemencies del pasu del tiempu «igual qu'un ta recubiertu pola piel», como diz el poeta surrealista Scutenaire na cita qu'abre esti llibru trespasáu de matices, contención y vida.