César Feito, poeta de la braña

Pero nun quiero falar agora d'esi nenu que declaró mui esfotáu querer ser escritor y que nos sos planes entraba escribir un cuentu más llargu y vendelu, sinón del poeta que da nome al certame, esa solombra que se llama César Feito y que nun aparez en nengún manual de lliteratura asturiana. Nun voi ser yo quien-y quite la condición de poeta apócrifu, pero non por eso dexa de ser un escritor con biografía y obra escrita, poco conocida, que dalgún día taba bien recuperar.

La primer noticia que llega a nós sobre César Feito aparez publicada, precisamente, nel diariu LA NUEVA ESPAÑA del 21 de xunetu de 1985. Firmada por María Isabel López, ye una crónica que cuenta la so biografía al cumplise una década del accidente de tráficu que terminó con él, el 19 de xunetu de 1975 na carretera nacional 620, llegando a Alaejos, en Valladolid. Cruzaba España nuna moto de cilindrada potente cola que viaxaba naquel tiempu, diendo de Francia a Portugal, onde llevaba establecíu una temporada disfrutando de la Revolución de los Claveles. María Isabel López cuenta los datos esenciales d'esta vida escurridiza: «Naciera en 1926 nel llugar de Brañicán, braña («caserío» diz ella) güei abandonada del conceyu de Tinéu, fíu de llabradores qu'ensiguida emigraron hacia la capital d'España en busca de meyor fortuna. Establecíos con un conocíu restaurante hasta la Guerra Civil, por razones polítiques ausentáronse d'España al finalizar ésta, viaxando per Francia, Bélxica y finalmente Cuba. César Feito regresó pronto a España, onde terminó los sos estudios de Filosofía y Lletres (anque, añado yo, parez ser qu'esti datu nun ye comprobable) y trabayó nos más variaos oficios nuna especie de vida bohemia que lu llevó a percorrer tola xeografía peninsular: estibador na Coruña, empleáu de los coches cama de la Renfe, camareru, dependiente en dalgunes llibreríes...».

López sigue nel so artículu contándonos la escasa relación del poeta con Asturies, a la que vuelve en mui contaes ocasiones, y la so amistá col filólogu Manuel Menéndez García, que ye quien lu emburria a reflexar nos sos versos la tierra campesina de los sos mayores y quien lu ayuda a recuperar un asturianu heredáu, pero poco practicáu seguramente (y tal vez quien-y corrixe los orixinales). Tamién nos explica l'autora d'esi artículu que César Feito conoció la obra del Padre Galo, quién sabe si a través de Carlos Rico-Avello, el primer editor de los poemes del flaire de Cadavéu que vivía en Madrid. Ella mesma nos da'l títulu del llibru nel que trabayó'l poeta bona parte de la so vida: «Poemas de la garabata», del que nos ofrez una amuesa que reproducimos equí al llau.

Amás d'esos cientos de nenos que se presenten al concursu que lleva'l nome del poeta de Brañicán, amás del pequeñu Daniel Prisacar, asturianu de Moldavia, el conceyu de Tinéu tien una nómina curiosa d'escritores n'asturianu: Tino Pérez del Rufo, Manuel Fernández de la Cera, Rafael Lorenzo, Alfonso Velázquez, Miguel Rojo, Sabela Fernández, Xuan Bello, Lluis Fernández..., por citar namás a los más conocíos. Hasta Jesús Evaristo Casariego, nacíu na villa, tien dalgún sonetu y dalgún cuentu no qu'él llamaba «la arcaica y entrañable fala de la tierra de Tineo». Sicasí, pocos conceyos habrá que cuenten amás con una nómina tan alta de poetes apócrifos, y menos van ser los que dean el nome d'ún d'ellos a un concursu. A César Feito, que lleva quince años designando'l certame del Ayuntamientu de Tinéu, hai qu'añadir otru poeta de la mesma triba, Xuan Martín (Tinéu, 1960), autor d'ún «Cartafueyu portugués» (editáu en 1983), d'ún inéditu «Cartafueyu italianu» y d'ún de los poemes más intensos publicaos n'asturianu: «Defensa énte Simón».

CANTA LA FONTIQUINA

Canta la fontaniella

ya anque la canción ia d'ella

tien una cousa mía

pola que podu entendella.

Otros dos poemes del mesmu llibru:

LA FUEYA DEL SALGUEIRU

Ia amarga cumu la flen;

l'amor de la mia amada

ia tan duce cumu el miel.

TIERRA

El curazón ia augua

ya de verde el paxellu

cun que s'afata el monte.

Falu duna tierra

de cangas ya fontes.

Amás d'estos poemes de la tierra, cercanos a la poesía popular, César Feito ye autor d'otra obra influenciada pola escritura surrealista, que foi evolucionando hacia'l figurativismu. Dos exemplos:

BRAÑICÁN

Volvu pul camín

del polvu

del barru

l'augua nus todiellus.

Sei que al caminar vein terminandu

envueltos en palabras torpes

abondus sentimientus

anotáus

al marxe de la sombra.

Xa recorrí los estantes

pousadamente

ya cosí a lus goyales lus botones

qu'abotonan cada llibru.

Xa fui abriendo las puertas de salida.

Fuera, nas bistechas,

pinga l'augua fría.

DESIERTA XA QUEDÓU L'ALCOBA

De la vida, escura comu tierra

la piel amable que arañóu

la manu de la muerte.

Chegóu anueite, peru xa viniera,

outras veces más s'aproximara

aduces, mirandu crecer la yerba

de lus praus que la primavera

bien regaba. El vientu la beisaba.