La polémica qu'enfrenta al fútbol cola cultura resulta tan vieya como inútil. Suelen ser los detractores del deporte (de cualquier deporte, posiblemente) los que lleven cásique sieglu y mediu alimentando la idea de que ver a ventidós persones en ropa interior corriendo tres d'un balón revela falta de gustu estéticu. Dizque'l primeru en manifestase nesi sentíu foi Kipling allá per 1880, cuando'l balompié taba empezando a rodar ente'l barru y cadecía de les maneres aristocrátiques del boxéu. Frente a quien desprecia lo qu'ignora (Borges ta ente los que ridiculizaben al fútbol), siempre quedan Camus o Pasolini. El novelista francés, Premiu Nobel de Lliteratura, xugó de porteru na so mocedá nel Racing d'Arxel y siempre dixo que cuanto sabía de moralidá y de compromisu lu debía al fútbol. Pasolini, que yera poeta, foi un poco más allá. Dicen que dixo que'l máximu goleador yera'l meyor poeta de la temporada.

Ente nós el fútbol quedó tocáu, como tantes otres coses, pola manipulación que sufrió nel franquismu, y tengo yo pa min que tovía nun superó totalmente aquella etapa, a la que se sumó nestos años la del mercantilismu escuru de les sociedaes anónimes deportives, que convirtieron a la mayor parte de los clubes históricos (referentes d'una ciudá) en moneda de cambiu. Pero hai otra manera de facer fútbol, y ye nos clubes modestos onde se va recuperando la idea de devolver a esti deporte los valores esenciales que nunca debió perder: pasión por unos colores y un nome, ensin qu'importe si ye un club grande o modestu, asociativismu, cantera, y aquella moralidá a la que se refería Camus.

De too ello sabe bastante l'Unión Club Ceares desque en 2011, terminada la etapa empresarial al frente del club, tuvo a puntu de desaparecer. Un grupu d'aficionaos bastante mozos garraron les sos riendes pa salvalu y demostrar que les coses se puen facer d'otra manera. Por exemplu, convocando un concursu de relatos curtios que contó con una bona participación. Sal agora'l llibru, «Entre líneas», que recueye los tres cuentos ganadores ex aequo (los sos autores son Pablo Texón n'asturianu y Mar Álvarez y Igor Paskual n'español) amás d'otros nueve cuentos que'l xuráu encamentó pa la so publicación. Al frente van sendos prólogos d'Íñigo Arza y Kiko Amat. Sorprende l'alta calidá que llogra un concursu lliterariu ensin dotación económica y con tema dau, fútbol y vida. Pero sorprendería menos si se supiera qu'ente los xugadores del Ceares, allá pelos años sesenta, aliniaron a un tal Valdés, qu'andando'l tiempu llegó a ser llibreru anticuariu de referencia n'Uviéu, nel Campillín, y ún de los poetes más intensos y destacaos de la lliteratura asturiana.