Alredor de 1974 yera creencia xeneralizao que la lliteratura asturiana nun tenía prosa lliteraria. Conceyu Bable poníase en marcha como asociación cultural reivindicativa cola idea de qu'había que la facer, pero en 1981 tovía nun se consolidara una producción cuantitativa destacable, y cuando García Arias edita la so «Antoloxía de prosa bable» esi añu nun fai recuentu lliterariu, cabe nella too lo que tuviera en prosa: el cuentu, l'artículu, la traducción, un testamentu, un documentu de compraventa medieval... Conceyu Bable nun supo ver la importancia excepcional que tenía una autora como Enriqueta González Rubín, una muyer desconocida que nos años sesenta del sieglu XIX inauguraba con una novela'l xéneru narrativu pa la lliteratura asturiana (la primera catalana de la Renaixença publícase en 1862, y la primera gallega en 1880). Les proses de Pachín de Melás o de Fabricio (les d'esti tovía agora mui mal conocíes) entendíense como curiosidaes d'escasa calidá lliteraria, ensin valorar l'enorme esfuerzu que suponía a primeros del sieglu XX romper la tradición asturiana de narrar en versu.

La posguerra marca'l puntu más baxu de producción narrativa, siempre de limitáu desarrollu na nuesa historia lliteraria, cuando namás se publicaron con continuidá cuentos asturianos na emigración americana, de la mano d'Enrique Pérez y de José Antonio Naves, los dos na Arxentina. Pero a finales de los años sesenta entama un lentu procesu de recuperación; en 1968 el recién creáu Muséu del Pueblu d'Asturies de Xixón convoca'l primer concursu de cuentos de la historia lliteraria asturiana, que va ganar un narrador de posguerra, César Rubín, de llarga y desigual obra n'asturianu. Ye nesa época cuando empezamos a topar, publicaos pela prensa d'esi tiempu, cuentos escritos por Llorienzu Novo Mier, Xulín de Lluza, Pepe Campo y otros autores que vivieron la posguerra. Pero esta producción narrativa, continuadora de la poética, que fala de l'Asturies rural y bebe directamente de la tradición oral, tenía mui poco interés pa los promotores de l'asociación Conceyu Bable.

La nueva narrativa tenía que ser tamién social y comprometida, tenía qu'anunciar un tiempu nuevu que rompiera cola mal conocida tradición. Llega de la mano de concursos variaos, como los qu'entamen l'Institutu Jerónimo González de La Felguera o la propia asociación Conceyu Bable, y que se van publicar en llibru a partir de 1976. Los ganadores de les primeres convocatories, Vicente García Oliva y Miguel Solís Santos, son dos de los principales narradores d'esti tiempu. Otros son Andrés Solar, Xosé Álvarez, el tamién cantautor Carlos Rubiera, Roberto González-Quevedo y l'activu Xuan Xosé Sánchez Vicente. Pero la creación d'una prosa lliteraria nueva resultó más complicao de lo que se barruntaba en 1974, abondo más que la poesía. Hasta l'entamu de la década de los ochenta nun hai otra narrativa a disposición del públicu llector que les cinco publicaciones conxuntes de les obres premiaes y de les finalistes nesos dos concursos qu'acabamos citar. Hasta 1980 nun se publica'l primer llibru de cuentos d'un autor, Xosé Álvarez, escritu amás na variante occidental de la llingua. Tamién nesi añu aparez un llibru excepcional, el «Montesín» de María Josefa Canellada, escritora de posguerra de curtia y intensa obra lliteraria. Hai qu'esperar a 1982 pa que s'edite la primer novela curtia, «Les llamuergues doraes», de Miguel Solís Santos.

Nun existe una etiqueta que pueda definir en xunto la prosa lliteraria de finales de los años setenta, si quitamos una denominación xenérica como «narrativa del primer Surdimientu». La falta d'una tradición consolidada fexo que cada autor s'enfrentara al cuentu d'una manera estremada y dende una posición llingüística distinta, y nun me refiero namás al usu de determinaos dialectos del asturianu. Dalgunos autores (Xosé Álvarez, Andrés Solar, Carlos Rubiera, Roberto González-Quevedo) tomen de la tradición oral, del cuentu popular, el modelu a siguir pa los sos primeros relatos; otros bieben na narrativa hispanoamericana (García Oliva) y en dalgún otru, como Solís Santos, puen restrexase influencies mui variaes, dende la novela hispanoamericana a los esistencialistes franceses, pasando per Galdós.

Los primeros relatos, los escritos nos años setenta, suelen ser mui curtios, mui cenciellos nel plantexamientu y na mayor parte de les ocasiones falen de crisis existencial, d'estrañamientu social, de la guerra o la posguerra. A lo primero hai un intentu consciente d'afuxir de lo rural, pero nun se pue dicir que se llograra facer una narrativa urbana. Si tuviéramos que definir cómo ye, dende'l puntu de vista llingüísticu, la prosa que se ta faciendo, tendríemos que dicir que difícil. Los primeros textos, los de mediaos de los años setenta, tovía caltienen un averamientu al asturianu oral nel que se nota'l posu castellán, pero a midida qu'entramos nos ochenta, en cuenta d'afondar nes posibilidaes expresives de la llingua, nos recursos sintácticos, quier estremase l'asturianu del castellán a base de «tapecer» el léxicu, que yera la consigna del momentu. Fueron los escritores de procedencia rural los que meyor consiguieron resalvar esti pilancu (Xosé Álvarez y Roberto González-Quevedo dende l'asturianu occidental y Andrés Solar y Carlos Rubiera dende'l central).

Cola creación de l'Academia de la Llingua Asturiana, que se fai en 1980, pero qu'entama a funcionar a mediaos de 1981, el panorama lliterariu va arriquecese cuantitativa y cualitativamente. A través de la sección (o faza) lliteraria del boletín oficial de la institución, la revista «Lletres Asturianes», que saca'l primer númberu en mayu de 1982, la publicación de lliteratura nueva empieza a ser una constante. Les colaboraciones lliteraries d'esi primer númberu xunten pasáu, presente y futuru: tres xeneraciones d'escritores representaes por Llorienzu Novo Mier, el más activu de los escritores de posguerra, Xuan Xosé Sánchez Vicente, ún de los promotores de Conceyu Bable y de la propia Academia, y Xuan Bello, l'escritor más mozu naquel momentu. Los tres publiquen poemes. De fechu, la nueva narrativa tarda n'aparecer nesta revista. Nel númberu 3 del boletín publícase un cuentu pa rapacinos d'Urbano Rodríguez; nel 4, dos cuentos de dos autores de posguerra (María Josefa Canellada y Pilar Junco) y hasta'l 5 (de febreru de 1983) nun se publica un relatu, digamos, d'espíritu renovador, nesti casu del yá citáu Xuan Bello, que se titula «Falcatrúa mortal». A partir d'esi añu, «Lletres Asturianes» vien dedicando a la creación lliteraria un númberu al añu, el que coincide cola celebración del Día de les Lletres, en mayu.

En 1980, la tovía existente Diputación d'Asturies, de la mano de Xuan Xosé Sánchez Vicente, institúi'l Día de les Lletres Asturianes, que se celebra esi añu nel salón d'actos del Muséu de Belles Artes d'Asturies, d'Uviéu, a mediaos de mayo, con un recital de los nuevos poetes. La mesma Diputación, a finales de 1980 y tamién de la mano de Sánchez Vicente, convoca un premiu de narraciones curties que va llamase «Xosefa de Xovellanos» a partir de la cuarta convocatoria. Esti premiu, que sigue convocándose na actualidá, foi nel so momentu la referencia narrativa pa la llingua asturiana. Ente los sos primeros ganadores topamos a Miguel Solís Santos, Andrés Solar, Xuan Xosé Sánchez Vicente, Carlos Rubiera y Roberto González-Quevedo, unos cuantos de los nomes que conformaron, xunto con Vicente García Oliva y Xosé Álvarez, los primeros pasos de la nuesa prosa lliteraria. Cuando en 1986 gana esi premiu Adolfo Camilo Díaz cola novela «Añada pa un güeyu muertu» ábrese una nueva etapa na narrativa asturiana.