La revista «Lliteratura», que dirixe Xosé Bolado, acaba de doblar el cabu de les dos décades, y failo publicando una nueva entrega, un númberu d'ochenta páxines ordenáu por secciones: narrativa, poesía, entrevista, ensayu, traducción, crítica y varia. A lo llargo d'estos más de venti años esta publicación supo mantenese fiel al espíritu integrador del so director y de los miembros del comité de redacción, resalvando les tensiones que se dieron ente distintes maneres de ver y d'interpretar el fechu lliterariu asturianu. El balance ye positivu: cientos de páxines que recueyen la mayor parte de los escritores que conformen la historia de la lliteratura asturiana, na que ye fácil decatase de les preferencies estétiques o nominales de los qu'organicen la publicación, porque hai autores que se repiten con bastante frecuencia.

Nesta entrega, la númberu 29, na que tamién salen n'asturianu unos cuantos poemes d'autores norteamericanos, son cinco los narradores que nos ofrecen relatos na primer sección. Por supuestu, destaca la entrega de Xosé Manuel Valdés Costales, un escritor que publica mui de ralu en ralu, pero que nunca defrauda. Marisa López Diz y Pablo Rodríguez Medina publiquen, respectivamente, los relatos finalista y ganador del IV Premiu «Arbidel» de Relatos Eróticos que convoca l'Ayuntamientu de Ribesella. Vladimiro Suárez ye un autor del que lleemos per primer vez un cuentu, e Iris Díaz Trancho ofrez una de les sos proses breves y intenses. L'apartáu de poesía permítenos lleer obra nuevo de Lourdes Álvarez, Rubén d'Areñes, Berto García y Xosé Bolado.

Paz Fonticiella entrevista a Pablo Texón Castañón baxo'l titular «Pallabra sentida». Déxanos conocer dalgunes de les pulsiones lliteraries d'esti escritor que forma parte de los cuatro o cinco nomes imprescindibles de la lliteratura asturiana más viva. Da igual que nos enseñe'l so talentu como poeta, glosando unes semeyes, faciendo lletres de cantares p'Alfredo González o traduciendo a Raymond Carver. Pela so parte, Vicente García Oliva fai recuentu, na sección d'ensayu, del 75.º aniversariu de la revista «Hora de España», ofreciendo una breve antoloxía con poemes de Bergamín, Garfias, Alberti, Paz o Vallejo.

Herme G. Donis reseña, col conocimientu de causa de quien vio nacer y medrar al llau d'ella la poesía del Surdimientu, l'antoloxía bilingüe Toma de tierra, Poetas en lengua asturiana (1975-2010), preparada por José Luis Argüelles y editada por Trea en 2010, y que ta sirviendo pa que la poesía asturiana se difunda per España y Portugal como nunca se fixera hasta agora. La revista remata con un textu breve de Pepe Monteserín. Pero sería inxustu nun se terminar referiendo a les semeyes qu'ilustren esti númberu, obra del fotográfu y poeta madrileñu José Javier González, que pertenecen a la serie «Esperas». Inquietantes, minimalistes unes y exhuberantes otres, namás s'echa en falta que'l llector nun pueda disfrutar del color naquelles que González decidió que nun fueran en blanco y negro.