Pa ilustrar la cabecera del so blog, "Cuadernu de rayes", l'escritor Miguel Allende escoyó ún d'aquellos cuadernos de caligrafía de los años sesenta, con una elefanta y la so cría na cubierta. Había una fauna variada naquelles llibretes: llobos, lleones, xirafes... La elefanta, que representa na nuesa tradición la memoria, encartia bien colos escritos del poeta llavianés, fechos na mayor parte sobre l'alcordanza. D'ente los materiales qu'a lo llargo de varios años foi subiendo Allende pa esi blog, selecciona y publica agora nun tomu col mesmu títulu, Cuadernu de rayes, los escritos más lliterarios, aquellos nos que pesa más la ficción que'l desafuegu.

Acierta plenamente'l prologuista de la obra, Alfonso López Alfonso, cuando sitúa a Miguel Allende (Llaviana, 1960) ente los escritores de la Segunda Promoción del Surdimientu, la que-y correspuende por edá. Qu'esti poeta, autor de Güelgues de gallón (2009) o de Pastoral en sol mayor (2010), nun se diera a conocer públicamente hasta'l 2004, cuando aparez Pallabres de payaso, nun quita pa que seya un xenuinu representante d'esi grupu, participando activamente nes movilizaciones estudiantiles de la Universidá d'Uviéu a finales de los setenta o na vida lliteraria del valle del Nalón. López Alfonso señala qu'Allende, "como todo auténtico poeta, canta lo que se pierde con la conciencia implacable de que es tan inútil su labor como intentar que permanezcan indelebles las huellas que dejamos sobre la nieve". La so xeneración vivió d'emprestao, creyendo ser protagonista, les (r)evoluciones de finales del sieglu XX: la Transición que fixeron los sos hermanos mayores de la mano del franquismu de cara amable, un europeísmu que nun foi más allá del mercáu común, l'españíu asturianista que punxo, pel mesmu tiempu, de focicos y d'uñes a la sociedá pensante y sensata...

Anque participara na acción política o na llingüística, la güelga que dexa Allende sobre la nieve de la vida ye la de la lliteratura n'asturianu, una revolución triunfante a la que s'enfrenta con ciertu escepticismu. Igual que los sos compañeros de xeneración, acarreta pal asturianu un avalumáu equipaxe cultural bien heteroxeniu, como podrá comprobar el llector del llibru: los escritores de cerca casa al par de los grandes maestros rusos o alemanes, el relatu oral de los tiempos de la guerra y los viaxes per esa Europa que se siente como propia. El profesor Miguel Allende construye les sos histories sobre la memoria, nun territoriu que se mueve ente'l trabayu de la tierra (sentáu a la mesa col Abá del Monesteriu del Mont Saint Michel ponse a falar con él de les oveyes, como un paisanu), la historia heredada de los mayores (especialmente'l relatu de la guerra y la posguerra), lo lleío, lo vivío y lo misterioso. Nun sé si nos cuadernos de rayes nos que deprendíemos a llevar les lletres pel riegu de la caligrafía les había, pero de nun usar un elefante como emblema nel so blog, Allende podía usar les abeyes, de les qu'escribe: "Nunca muerren, son el testigu sonoru que repite los recuerdos de tolo que fuimos una vez". Xustamente eso ye'l so Cuadernu de rayes.