Cúmplense 15 años de la fundación de la compañía teatral "Nun Tris", años vivíos cola intensidá d'un teatru profesional de calidá y afitáu nel trabayu de dos persones fundamentales nel grupu como son Inma Rodríguez y Toño Caamaño (dambos con cursos d'Interpretación, nel ITAE; Dirección d'Escena, nel ESAD; Antropoloxía y un máster n'Artes Escéniques en Madrid, d'Inma, y d'Historia y Análisis Sociocultural de Toño, que prepara'l Doctoráu n'Artes Escéniques en Vigo) y la collaboración nesti tiempu de más de 80 actores y actrices, amás d'un númberu importante de directores d'escena, cantantes, bailarines, malabaristes, animadores, intérpretes musicales y otros.

Nesti tiempu fueron más de 40 les obres representaes: dalgo más de venti n'asturianu -con cerque de 400 funciones-, y cásique otres tantes en castellanu. El grupu especializóse progresivamente nel teatru asturianu, un teatru de calidá que cásique nadie fai -a lo menos nun lo fai de forma continuada o seria-. Non porque nun se faga teatru en bable, que se fai, sinon pol cataxe costumbrista d'eses obres. Porque n'asturiano escribióse, muncho, desque Antón de Marirreguera estableciere, nel siglu XVII -posiblemente ya antes, anque nun llegaríen hasta nós aquellos trazos primeros d'esi teatru-, un teatru popular basáu n'obres mitolóxiques cultes mui adecuaes pa satisfacer los gustos barrocos d'aquella época, hasta prácticamente l'actualidá -o ensin practicamente- con dalgún certame de xéneru, dellos escritores mozos, grupos que faen esti tipu de teatru -fundamentalmente amateur-.

En realidá esti teatru popular ye una especie de comedia del arte, a l'asturiana, que se formó a lo llargo del sieglu XIX y el XX, en tornu a un folletón decimonónicu que caltrió, y de dalguna forma sigue caltriando, los escenarios teatrales asturianos. Ye un teatru que cumplió una función, evidentemente: en tornu a 1910 surdió la idea d'impulsar l'idioma al través de la creación d'un Teatro Rexonal -que de dalguna forma ya esistía-; surden autores, danse conferencies, créense premios, búsquense apoyos y aparecen grupos como la Compañia Asturiana, fundada en 1915, y que sigue esistiendo milagrosamente, faciendo les comedies de siempre con gran ésitu de públicu. Pero'l propiu teatru -qu'arrebalga la sociedá asturiana pa representanse en Madrid y n'América: Carlos Ciaño, los hermanos Barredo, etc- ye discutíu ya entós como ferramienta lliteraria válida, sin embargu autores bablistes de la calidá de Pepín de Pría "manchen" la so trayectoria con estes obres que nun-yos aporten nin un migayu de fama, más bien lo contrario, rebaxen-yos la validez d'una obra importante.

Tamos nel sieglu XXI, y anque parezca mentira n'Asturies siguen representándose, con bastante ésitu por ciertu, les obres de Caravera, Constantino Cabal, Malgor, Eladio Verde, Napoleón Acebal, Emilio Palacios, Antón de la Braña, Eduardo Yuppo, Emilio Robles, Manuel Antonio Arias, Xosé Peláez, etcétera.

En total son más de 400 títulos costumbristes a disposición d'un teatru que, pesie a la so apabullante presencia nos coliseos asturianos, la esistencia d'un públicu fiel, anque actualmente nótase la falta de renovación, que fai pensar nun agotamientu d'esi discursu, un discursu falsu -al mio entender-, probetón, simplayu, que nun ufierta más que confusión a la escena asturiana, sapozando cada vez más les principales formes racionales de progresu del teatru asturianu, que tien que ser plural necesariamente, ricu, vivu, qu'identifique convenientemente a la sociedá actual, o bien una güeyada retrospectiva diferente, "vintage" de la realidá.

"Nun Tris" topóse con esta disyuntiva: facer teatru asturianu, qué conlleva. Pues conlleva adaptase, en primer llugar, a un públicu seroñu qu'espera sorprendese col bable sin escaecer del tou la comedia costumbrista, y a un públicu nuevu al que nun-y presta migaya, más bien resúlta-y inintelixible y caducu esi tipu d'obres. Puede facese comedia sin cayer necesariamente nesi foyeru costumbrista, entamando por creese los propios actores lo que faen, como diz Caamaño "van tomándose en seriu'l fechu de facer montaxes en llingua asturiana, siendo respetuosos con ella, y nun tomándola como una frikada".

Facer teatru en castellán nun conlleva atopáse con llendes nel camín. En bable ya resulta un poco más complicao, les llendes son variaes y emprunes. "Nun Tris" apostó fuerte cola primera y magnífica ópera n'asturiano "Los amorinos de Bastián y Bastiana", una historia mozariana, tresportada a l'Asturies del sieglu XIX. "El caballeru de la murnia figura" descúbrenos les andances d'un caballeru, el famosu D. Alonso Quixano, dende ñeñu hasta la muerte, que según los espertos ye una historia de materia artúrica o d'orixe celta. "Los remedios de la vixigona" y "La vixigona nun tien remediu" que son obres de la comedia del arte, con actores que representen a Pantalone, Arlequín, y demás. De la mesma triba ye la magnífica obra "El criáu de dos amos" de Carlo Goldoni. "Los socedíos de Nelón" de Adolfo Camilo qu'engarcia lo antiguo y lo moderno en monólogos que representen lo meyor d'una continuidá na que l'autor cree.

L'añu pasáu, coincidiendo cola Selmana de les Lletres, interpretaron la "Fábula de Píramo y Tisbe" de Benito de l'Auxa, un de les persones recordaos nesa fecha. Trátase d'una fábula babilónica d'Ovidio a la qu'emplega Shakespeare nuna escena de "El suañu d'una nueche de branu". En febreru de 2013 "Nun Tris" estrenó en Feten el cuentu de "El pelegrín valiente", una historia d'aición y aventura. N'agostu d'esti añu estrenó en Villaviciosa la pieza cubana "Xuanón namoráu", escrita en 1900 pol cubanu Federico Viloch dientro de la "farsa" cubana. "A la gueta l'ayalga", "Detente ñube", "Brenga", etc. avérense a la realidá más auténtica de la mitoloxía asturiana.

"K", en castellán, ye una versión de la novela "El proceso" de Kafka, premiáu al meyor espectáculu estranxeru pola Universidá de Bonos Aires. "Runa" una recopilación de dramaturxia basada en cuentos de cinco continentes... "Iphigenia", de Jean Racine, traducida por Xovellanos sobre un mitu griegu, dirixida con verdadera maestría por Toño Caamaño.

El casu ye que "Nun Tris" sigue navegando, faciendo que'l Teatru, con mayúscules, alie nel asta d'una bandera con brenga, oxalá dacuando se cree oficialmente esa compañía teatral asturiana que nos represente, pero mientres tantu'l papel de grupos como esti ye fundamental pa los intereses de la cultura y el pueblu asturianu.