Llevaba José Ángel Gayol ensin publicar poesía desque'l llibru "Con el velo de una sonrisa" (2006) ganara'l premiu "Asturias Joven". Agora, nun breve espaciu de tiempu, fai dos entregues a los sos llectores, les dos n'asturianu: Los poemes del oriental y El llibru de les coses misterioses. Publicaos por Trabe, lleguen arropaos por dos premios de mui distinta consideración. El llibru de les coses misterioses ganó'l "Xuan María Acebal" de 2012, mientres que Los poemes del oriental féxose col gallardón n'asturianu del "Elvira Castañón" qu'organiza l'Ayuntamientu d'Ayer, ún d'esos premios de los que'l patrocinador nun s'ocupa gran cosa, editándose namás si dalgún editor s'interesa nello. Los dos llibros de Gayol son tamién distintos n'intención y resultáu.

Los poemes del oriental da la impresión de ser una recopilación pequeña, dalgo aleatoria, de diecinueve poemes con varia intención. Nellos predomina la experiencia personal, pero lo que'l llibru pudiera tener de volcáu de sentimientos autobiográficos suel quedar velao tres d'aquello sobre lo que Gayol quier que fixemos l'atención. Tenemos qu'apartar los guantes de la mesa o guardar la llóndriga na so pallera pa saber qu'esos poemes falen del deséu; nos versos onde suena la música del oriental na parada d'Atocha ye evidente la imposibilidá de comunicase con otru ser humanu, anque l'instrumentu de cuerda que toca, y el propiu poema, afalen hacia l'allegría y la esperanza. Quiciabes se trate d'axustar les espectatives a lo que la vida trai, como nesi poema, "Nomes de familia", onde nos retrata a un güelu "que non siempre foi bonu" imaxinando que la muerte-y llega con un sorrisa, porque "esi ye'l retratu / más apode pal recuerdu d'un güelu".

Bien distintu ye l'otru volume, El llibru de les coses misterioses, un sabiu homenaxe a la vida a través d'un viaxe pela lliteratura. La obra, compacta, preséntasenos dividida en cuatro partes, nes que'l poema inicial, col mesmu títulu del llibru, intenta dar respuesta a quien se fai preguntes al final del camín, mientres que l'últimu poema funciona como apéndiz, zarrando con una reflexión sobre'l "destín inciertu" qu'espera a too lo humano. Nel mediu, "Metafísica de les costumes", un títulu kantianu pa dieciséis poemes mayores nos que l'autor da vueltes alredor de los fundamentos de la vida, al que sigue "Física de les ciudaes perdíes", onde la memoria de lo urbano funciona como emblema de civilización, el marcu nel que se desenvuelve lo cotidiano, como si'l llibru quixera responder a les grandes preguntes de la existencia celebrando lo vivío, diendo de lo xeneral a lo concreto. Hai nesta poesía de sensaciones un cantu a la vida y un homenaxe a los sos maestros lliterarios (Pessoa, Vallejo, la lírica inglesa del XIX..., porque "la poesía ye un préstamu constante, una marañuela d'engaños"). Pero la clave del llibru ye'l tonu, el llinguaxe, la retórica conceptual cola que se viste Gayol y que lu alloña del sentimentalismu pa construir una obra poderosa, ensin una escesiva esposición d'intimidaes, na que la emoción estética naz tocada pol misteriu pa compartir con nós les respuestes qu'atopa.