La Nueva España

La Nueva España

Contenido exclusivo para suscriptores digitales

Uncal, un poeta escaecíu

El gran escritor de Caravia marchó a los 13 años pa Cuba, onde se formó nes aules del Centru Asturianu, y per aquella época escribió los primeros versos en bable

Acción del Centru Asturianu de L'Habana.

José María Uncal nació na parte baxa del conceyu de Caravia en 1902, y muerre en 1970, nel so pueblu fizo estudios elementales. En 1915 emigra a L'Habana incorporándose al mundu del comerciu, per aquella dómina ingresa nes aules del Centru Asturianu naquella capital. Estudió l'oficiu de tipógrafu, trabayando nos periódicos que se publicaben nesa época, yera un gran llector y fue maureciendo nél la vocación d'escritor. D'esa dómina son los sos primeros versos escritos en bable, que nunca vieron la lluz.

La vida yera dura en Cuba, y cuando llevaba malpenes seis años na emigración, decide volver a España colo que tenía aforrao. Viaxó per tola península faciendo versos, pero llegó'l nuevu desengañu, y decide volver a la capital caribeña onde aquel añu pública´l so primer llibru, una de les principales composiciones del autor, "Frondas silentes", nuna dómina en que yera abegoso atopar papel na isla.

Pero aquel llibru, que fue bien acoyíu pola crítica, nun yera lo que quería realmente l'autor. Entamó a lleer llibros d'autores modernos españoles, franceses o americanos, hasta que topó lo que-y interesaba: la so poesía sentimental daba pasu a otra más oxetiva que yeren los temes del mar. Uncal, que nació a la vera de la mar oriental asturiana y de la Playa de la Espasa, descubrió la so gran musa que yera la mar con mayúscules, y asina publica'l que sería´l so meyor llibru: "Poemas cantábricos".

En 1923 abandonan la tipografía definitivamente, y decide dedicase al periodismu profesional. Trabaya sucesivamente nes redacciones de l'"Heraldo de Cuba", el "Diario Español", que dirixera Nicolas Rivero antes d'entrar nel "Diario de la Marina", pal que tamién trabayó'l nuestru autor dando un gran reblagu que sería definitivu. El "Diario" yera'l primer periódicu de Cuba prácticamente hasta 1960, en qu'una turba revolucionaria dio por terminada la vida del mediu enterrándolu -nunca meyor dicho- pa siempre. Nun actu, xunto a la Universidá de L'Habana, dirixíu ente otros comandantes de la xerra por un xovenzucu Raúl Castro, los revolucionarios ficieron del periódicu un feretru de papel, que fue enterráu dafechu, y los sos dirixentes, con Ignacio Rivero al frente, marcharon al esiliu americanu; el periódicu nun volvería a salir.

Collabora coles meyores revistes habaneres como son "Carteles", "Social" y "Bohemia" -que sigue saliendo como revista cultural-, y funda otres dos de non mui llarga vida: "Juvencia" y "Athenea". En dos años gana unos xuegos florales, publica dos llibros de poemes, "Argonautas" y "Rumbos soberanos", y dos noveles curties: "El hombre de la pipa" y "Barro".

Na importante obra los "Argonautas", publicada en 1924, figura una importante nómina d'escritores astures que representen la cuarta parte del total, como son: Valentín Varas, Secundino Díaz Jardón, Salvador Rodrígues, Teresa Fernández-Getino, Prudencio Fernández, Benjamín García, Emilio Martínez, Ragael Suárez Solis, Anselmo Vega, J. R. Moré, Carlos Ciaño, y el propiu autor. Del restu publiquense poemes de: Andalucía, Canarias, Castilla la Nueva, Castila la Vieya, Cataluña, Estremadura, Galicia, Lleón y Vasconia. En total son 52 autores los que figuren na antoloxía poética.

El propiu Uncal se quexa nel prólogu del pocu interés que despierten na península los autores latinos, que ye lo que bien, de dalguna manera, a intentar solucionar esti llibru: "En España se editan anualmente antologías de poetas españoles, buenos y malos, y nunca hemos visto ni un solo gesto en ellos ni un solo poeta de los que ruedan, triunfan y fracasan por esta virgen América latina". La esperiencia ye buena, anque "En Cuba, la literatura española nunca estuvo mui boyante".

De Ciaño Canto, diz que "el verso y la pluma se rinden humildemente a sus plantas", según Uncal, aparecen tres composiciones, siendo la más llarga una magnífica obra titulada "La guitarra", que fala de les ensoñaciones y del pasáu.

En 1926 regresa por segunda vez -y definitivamente- a España, con tan mala suerte que'l barcu naufraga frente a les costes de Galicia, la llamada Costa da Morte. Collabora en prosa y versu nos diarios uvieínos "Región" y "El Carbayón" y más tardi nos santanderinos "Atalaya" y "Voz de Cantabria". Escosu de pesos asiéntase en Madrid, onde "pasa las de Caín", en frase suya. Fai vida de bohemiu.

Regresa a Asturies, trabayando de linotipista nel diariu "Región" y a la vez collabora con distintos periódicos asturianos y de fuera de la rexón. Monta una imprenta propia que ye un fracasu estrepitósu. Publica la novela corta "Umbrales rojos", y el llibru de versos tituláu "La ruta de Cipango".

En 1931 Uncal establezse de nueves en Madrid, trabayando como linotipista, produciendo continuamente proses y versos. Así en 1949 publica "Tajamar", que lu consagra como gran poeta de les lletres asturianes, inclusu per enrriba -según dalgunos especialistes- d'autores de la sonadía -tamién, de dalguna forma emigrantes- d'Alfonso Camín y Celso Amieva, lo que nun quita que Uncal seya un escritor escaecíu, sacando na so Caravia natal.

Compartir el artículo

stats