Lo malo de publicar a un poeta escelente nuna revista ye l'abismu que s'abre ente él y los demás colaboradores. Ye lo que pasa nesti númberu 12 de la revista Formientu. Abre Laura García Calvo, nacida n'Avilés en 2002, con un cuentu y dos poemes que son lo esperable a los once años que cumplió, anque sorprende más que na nota biográfica se nos diga que yá tien editáu un llibru, nesti casu n'español. Anque falta saber si da en poeta o n'adulta, empezando a publicar de tan mocina muncha obra va tener que refugar en llegando a la primer madurez creativa. Darréu vienen cuatro poemes de Jaime Martínez (Uviéu, 1993), que ye al que nos referíamos al empiezu: un poeta del que conocemos yá una amplia obra n'asturianu y castellanu, y que se nos presenta como un poeta lúcidu, divertíu cuando quier, intelixente, que conoz bien l'oficiu y que sabe comunicar: "Vendrá una vuelta más / el desagüe lentísimu del alba / y la tinta la nueche / dirá pa otros llugares muncho más / afayadizos pal conxuru de les sombres", empieza'l so poema "Shakespeare".

Hai más colaboraciones valioses nesta revista. Nella descubrimos autores pa tener en cuenta: a dos poetes, María García (Uviéu, 1992) y Andrés Astur Treceño (Uviéu, 1992), y a un narrador, Fonsu Suárez (Xixón, 1991), que caltién na rede un blog mui recomendable, "Cultura d'a perrona". En dellos poetes apreciamos autenticidá, sentimientu y corrección (Cristina Menéndez), n'otros poca reflesión sobre'l llinguaxe lliterariu, repitiendo clixés normativos que suenen conocíos, cuando non gastaos: Nayar Crespo, Pablo M. Testa, Xurde Álvarez Antón o Alba Llaneza. En munchos nótase una fuerte influencia de la música contemporania, contra lo que nada tenemos siempre que nun seya la única "llectura" nun deprendiz d'escritor. N'Alberto Cla (Cangues d'Onís, 1992) los sos poemes funcionen meyor a ritmu de rap; los de Naomi Suárez (La Pola Siero, 1989) yá son directamente cantares. Nesti númberu (como n'anteriores entregues) échase en falta mayor desixencia estética nos que firmen poesía, a los que podía pidíse-yos menos espontaneidá y mayor condensación y síntesis. A los narradores, más ambición y oficiu.

Blanca Fernández Quintana (Bimenes, 1994) publica un llargu cuentu que desaprovecha; olvidóse nél de narrar. Constrúi'l relatu con diálogos, metiendo de xemes en cuando l'acotación de quién tien la palabra pa que'l llector pueda siguir l'argumentu, pero nótase cierta desgana, cuando ye evidente que podía sacar meyor partíu de la historia desenvolviendo situaciones y arriqueciendo personaxes: narrando, en definitiva. La revista, atenta a lo que se va faciendo nos territorios históricos de fala asturiana, publica poemes de dos autores, ún nacíu en Salamanca (David Carrasco) y otru n'Estremadura (Ismael Carmona), con más valor testimonial que lliterariu. Complétase esti númberu con espléndides fotografíes de Pablo Casanueva (Ardines, 1995), l'autor de Bernabé, un llargumetraxe n'asturianu. Formientu ye una revista d'iniciación, d'avanzada, ensin dexar de ser, como diz nel "Entamu" el so director, Inaciu Galán, un "espaciu ampliu y abiertu de creación". Pero ye, sobre too, una revista qu'acarreta siempre munches y prestoses novedaes.