Necesité vencer dellos prexuicios personales pa meteme dientro d'un discu que se titula asina, (Nuevos) cantares de chigre. A mediaos de los noventa yá saliera Cantares de sidra y chigre, onde la tonada (Jorge Tuya, Mariluz Cristóbal, Ismael Tomás, Luis Estrada...) cruciaba garrada de la mano de gaiteros y coros pela tradición, yá fuera popular, yá de Sergio Domingo o de Torroba, compositores que supieron interpretar l'alma d'Asturies fecha música. Pero, anque'l títulu pareza indicar lo contrario, los (Nuevos) cantares de chigre que saca Algamar, la casa que lu produz, tienen mui poco que ver cola vieya propuesta de Fono Astur. Eso sí, coinciden en repetir dalgunos temes, como "La romería de San Andrés" (qu'arregla equí Cilvrnigans), "Chalaneru" (na versión de Fe de Ratas) o "Soi de Verdiciu" (a cuenta de Skama la Rede).

Foi precisamente la variedá de grupos y voces que visiten estos temes "de siempre" la que me fexo vencer los prexuicios iniciales y meteme no que ye una verdadera y feliz propuesta d'editor: quince grupos o solistes que van del rock al cantautor pasando pela música pop y el folk, reinterpretando otros tantos temes de la tradición asturiana, faciéndolos sonar como propios. Asina, Pablo Moro da una vuelta al popular "Inés, Inés" dexándonos una pieza intimista y doliente; Crudo, el grupu de rock puru de Xixón que punxo na cai Cicatrices hai un par d'años, fai una versión novedosa de "Baxaben cuatro ayeranos", ensin que'l cantar pierda la so esencia nin el grupu la etiqueta rockera.

Hai xente con tradición musical detrás: Alfredo González ocúpase de "Nel campu nacen flores"; Bacotexo usa una lletra de Conrado Villar Loza pa cantar, en gallego-asturianu, "Chufa Xixón a sua playa"; Spanta la Xente pon marcha a "Dicen que van a poner" y Duerna toca "Gasta la molinera". La Tarrancha miez munchos temes populares a bon ritmu en "De Tazones a Candás". Dos voces de muyer suenen particularmente bien: Helena Gil, que forma parte de La M de Matilde y canta "Ayer vite na fonte", y Tania Pereira, qu'empresta la so voz yá madura y versátil pa "Carretera d'Avilés". Otros grupos son desconocíos pa min: Seu, que s'ocupa de "La barca marinera", Psycho Rubia de "Pastor que tas nel monte" y Bueno de "Santa Bárbara Bendita". Toles pieces tienen curiaos arreglos (a veces mui acertaos y sorprendentes, dacuando discutibles, anque nello entre sobremanera'l gustu personal), pero toes tán grabaes con procuru y calidá instrumental. Dellos grupos actualicen con aportaciones propies les lletres, nun exerciciu que s'agradez y que permite superar la fosilización temática que sufre esta tradición.

Quiciabes por ello choque más que les lletres que s'ofrecen nel llibretu qu'acompaña'l cedé nun reflexen siempre nin les pieces tradicionales (sería una opción) nin les que canten los grupos, trescribiendo a veces estrofes que nun tán y omitiendo otres que sí canten. Tampoco parez lóxico, nuna producción tan curiada y detallista como esta, que se siga diciendo que "Soi de Verdicio" ye tradicional, cuando sabemos que la popular lletra ye de Marcos del Torniello, "Gozoniega", una parodia llograda de l'anónima cubana "Yo soy guajira": "nací en Melena/ en el ingenio del Curubey./ Quince años tengo, me llamo Elena/ soy dulce y blanda como el mamey...".