Un rapaz metíu a política

XAIME ARANDA Roberto Colunga Fernández (Xixón, 1970) ye'l secretariu xeneral del Bloque por Asturies dende la so fundación y yera'l siete na llista elleutoral de la coalición IU-BA-LV, el siguiente a Francisco Valledor. Esta selmana estrenóse na Xunta Xeneral como diputáu, en sustitución de Francisco Valledor. Va ser el primer diputáu nacionalista d'izquierdes del Parllamentu asturianu. Dempués de tantos años y tantes vivencies xuntos, préstame dicir dalgunes coses sobre Rober.

Nun lu conozo dende hai tantos años como otros vieyos collacios d'él como Moke, Noval o Balbuena, pero si la memoria nun me falla yá va pa 15 años que nos conocemos y como unos 12 que compartimos militancia política y dalgunes cuantes coses más.

Entamemos la militancia compartía allá pol añu 98, cuando tábemos na organización recién formada Izquierda Nacionaliega d'Asturies (INA), y los medios que tiníemos yeren tan probes qu'hasta teníemos qu'aconceyar n'El Merucu, rexentáu por Miguel, compañeru d'aquella na organización xunto con otros vieyos collacios como El Rusu, Gely o Montse. Foi curtia la esperiencia en solitariu d'INA, yá qu'al poco d'entamar xuntámonos con Izquierda Asturiana y'l Partíu Comunista de los Pueblos d'España pa formar lo que dio en llamase Bloque de la Izquierda Asturiana, que duró hasta 2003, cuando por diverses razones rompió en cachos y parte de los que militábemos nel BIA pasemos a formar parte del Bloque por Asturies, organización na que, como toos y toes persaben, siguimos militando anguañu.

Quién nos diba dicir naquellos conceyos de chigre que Rober diba acabar ocupando un güecu na Xunta Xeneral...

Si dalgo caracterizó a Rober en toos estos años foi la perseverancia y'l compromisu, el tar siempres el primeru en tolo que necesitaren les distintes organizaciones peles que pasemos, el tar siempres d'equí p'allá col so inseparable Xsara, faciendo kilómetros y kilómetros en beneficiu de la organización de turnu, n'echar tiempu, salú y perres pa lo que ficiere falta. Y asina sigue güei, dempués de pasar pela conceyalía de Llingua Asturiana y Cultura Tradicional del conceyu Xixón, nel Parllamentu asturianu. Col so inseparable Xsara diendo al nueu tayu na Xunta Xeneral, echando tiempu, salú y perres pa demostrar qu'él nun ye un «políticu» al usu, que ye un rapaz metíu a política y comprometíu colo que cree, que nun llegó a onde llegó dempués d'escalar peldaños nesto de la política, sinón que llegó pa demostrar qu'otra manera de facer política ye posible.

Si hubiere que pone-y dos calificativos al mi collaciu Colunga, son los de noble y polifacéticu. Noble porque esti rapaz, al que nunca nun-y dixe en persona (agora va dase'l famosu «manda narices que tenga qu'enterame pola prensa?») que lu considero casi como un hermanu mayor, ye d'esos que nun tien mal rollu con naide, o polo menos con naide que nun lo mereza. Ye d'estes persones que se lleven bien con tol mundiu, al que nun se-y conocen enemigos y que cuando vas con él pela cai quedes plasmáu de la cantidá de xente que lu saluda, siempres con una sorrisa na cara.

Y polifacéticu porque, aparte de la so vida política, tien, que yo sepa, otres dos, la d'hosteleru y la d'apasionáu del fúbol. Dempués de pasar pel barriu d'El Llano y debutar col chigre La Gaita, dende hai más de 15 años rexenta'l conocíu chigre musical La Folixa, referente de la nuechi en Cimavilla y que dende va cosa d'añu y mediu tien un álter ego na zona'l Náuticu.

Y apasionáu del fúbol como siguidor del Sporting y como ex xugador de les sus categoríes inferiores pa dempués pasar a percorrer media xeografía asturiana, Lenense, Titánico, Santiago d'Ayer, Ceares? como delanteru goleador al más puru estilu inglés. Tres colgar les botes, sigue n'activo como entrenador de fúbol base en Xixón, carrera que se ve interrumpida en cierta manera poles circustancies actuales, pero que de xuru siguirá nel futuru la so meteórica carrera.

Oxalá lu veamos dalgún día como entrenador del Sporting en Primera División, porque yá ye una persona y un diputáu d'esa categoría. Ánimu y suerte na to nueva andadura, compañeru.

Xaime Aranda es miembro del Bloque por Asturies