Les bicicletes

Treslladémonos al branu del trenta y seis. Estal.la la guerra ya, ante'l desconciertu xeneral, nel senu de cualquier familia cenciel.la de puelu o ciudá, cabe pensar que se trata d'una revuelta pasaxera ya que más ceo que tarde tornará la calma a los l.lares. L.lueu, ye lóxico que munches camentaren que lo único que-ys quedaba yera esperar. Pos bien, esti mesmu plantegamientu amósase en «Las bicicletas son para el verano», el más reconocíu textu teatral del singular home de teatru ya l.letres Fernando Fernán-Gómez, onde una familia madrilana comparte la cotidianiedá de la guerra cola criada ya los vecinos. Ya socede que'l fíu -Luisito-, a pesar de que suspendiera nos estudios, pretende que'l so pa-y merque una bicicleta. Pero los fechos, cada vez más foscos ya empel.lizaos, obliguen a retrasar la compra. Tristemente pa toos, tamién pa Luisito, el branu esperáu acabó por retrasase abondo, entardando en llegar tres l.largos años.

Cola guerra, ya tres la guerra, lleganon tiempos de miseria, d'escasez ya de fame; ya les bicicletes, les poques que circulaben peles cais ya carreteres, constituyíen más un mediu vidal de tresporte que de disfrute como se concibe agora. Falar de bicicletes d'aquel.la dómina ye falar de piñón únicu d'unos venti dientes, radios rotos enbilortaos per riba los otros, cámares dafechu emparchaes, cubiertes repletes de manchones, frenos a base d'espetar la suela'l zapatu ente la rueda ya'l guardabarros, reventones sospresivos, ya acompañantes montaos enriba la barra cuando non enriba'l maniyar. Falar de bicicletes agora ye falar de ochocientos millones d'unidaes en tol mundu -el doble que coches-, de desarrollos de ventitantes marches, cuadru d'aluminiu, sistemes d'amortiguación, frenos de discu, cubiertes d'estrena, cámares nueves del trinque, ya la fin de modernidaes d'altes prestaciones. Modernidaes que s'echen de menos nes ciudaes del nuesu entornu más prósimu dificultando l'usu de les bicicletes peles sos cais de miente cotidiana. Ya sin embargu, les ventaxes, amás del disfrute, son perclares: aforru enerxéticu, nun xeneren contaminación, son dafechu silencioses, mermen los conflictos d'aparcamientu ya, si tenemos en cuenta que la velocidá media del tresporte públicu de superficie nes grandes urbes ye d'unos doce quilómetros a la hora, inclusu posibiliten desplazamientos tanto o más rápidos. De xuru que sobro eses bases, nes décades de 1960 ya 1970 en importantes ciudaes europees cola grave crisis del petroliu, promovienon l'usu de la bicicleta. En consonancia cola iniciativa, establecieron carriles ya rutes propies pa ciclistes, lo que fixo aumentar enforma la so popularidá ya'l so tráficu pel interior de los nucleos urbanos.

Pensemos agora nes nueses ciudaes, au gociamos d'una orografía ya un clima normemente favoratible pal usu de la bicicleta. Pensemos tamién nel gran crecimientu urbanísticu ya del tráficu automovilísticu de les últimes decades colo qu'eso conlleva. Ya sin embargu, los alcaldes ya demás representantes de los ciudadanos, quiciabes abondo ocupaos n'importantes operaciones inmobiliaries, amiren pa otru llau a la hora d'implantar infraestructures afayadices qu'impulsen l'usu de les bicicletes pel centru d'eses ciudaes a les que representen. Nin siquiera precisen estruyase los sesos tratando d'esmucir idegues novedoses. Basta que copien, como tantes veces fain, de los proyeutos implantaos acuantayá n'Austria, Holanda o Dinamarca. Lo mesmo el.los, embaxo los influxos del textu teatral de Fernando Fernán-Gómez, tamién piensen que les bicicletes son pal branu; pa un branu tardiegu que naide columbra nel horizonte ya que, poles ficies, parez qu'entovía entardará delles convocatories electorales en llegar. De tal modu que, como cuando estal.ló la guerra, lo único que nos queda ye esperar.