Madrid

Polo que sea, cada vez más, hai que dir a Madrid. Nun queda más remediu. Nun ye sólo que tean ellí más de la mitá de los fíos de los amigos que tuvieron que marchar fuera (la otra mitá tan pa Barcelona y la costa mediterránea). Ye que tamién hai pocos asuntos de trabayu en xeneral que nun tengan que ver con Madrid. Sigue siendo la capital d'España. El sitiu onde se van manifestar tolos que reivindiquen que la llana d'oveya puea siguir acoyéndose a les subvenciones europees. Tamién que'l nuevu trazáu del AVE a nun sé onde nun destroce nun sé qué parque natural. Y, siempre, ta claro, contra'l Gobiernu.

Nun ye cosa d'agora. Cuando Aznar, que nun fue hai tanto, Madrid taba tomao por otros. Nun sé si en dalgún casu, polos mesmos. Igual lo de les oveyes lleva menos tiempu ensin arreglar que lo del AVE, pero descarao que lleva polo menos tanto como lo de los oveyes d'ETA. Que nun tienen llana, pero son igual d'oveyes.

El casu ye que, como quiera que sea, Madrid ta siempre tomao. A ello siempre echa una mano l'alcalde de turnu, nesti casu Gallardón. Y apurre'l granín d'arena la presidenta de la Comunidá, que ye como la Mariquina la Galana del PP. Dicho sea con toa consideración pa Mariquina la Galana.

Diz la xente que Mieres ta too entero pates arriba. Que nun hai onde aparcar. Pues, igual que Mieres, pero a lo bestia, Madrid. Salvando la diferencia de que en Mieres ta too a un andar. Madrid ye como Turón, que nun sabes onde empieza y menos onde termina. Un modelu magníficu que quier siguir la Ciudá Llinial del Nalón. Peor pa ellos.

La verdá, ta mediu país pates arriba. Refiérome al país d'equí y al país de fuera. Nótense yá les elecciones cercanes. Hasta'l conceyal más burru quier inaugurar una rede d'alcantarilles. Lo que sea, con tal de que lleve cementu. ¡Qué tendrá'l cementu que tanto-yos presta a los inquilinos de los ayuntamientos!

Lo de Marbella yá ta hasta pasao de moda. Agora la estrella ye Telde, un pueblu del tamañu d'Avilés. Tan imputaos l'alcalde y tolos conceyales del PP menos ún. Canaries ta que lo vierte. L'alcalde de Santa Cruz de Tenerife con querella por prevaricación y malversación de fondos públicos. El de Castellón por tráficu d'influencies. Hasta los alcaldes de pueblinos de mierda nel mapa, como Catral, n'Alicante, tuvieron dalgún asuntín relacionáu cola ordenación del territoriu a la midida de dalgún constructor.

Vuelvo a Madrid. Cola disculpa de Fitur. Pero nin siquiera tuve tiempu a averame per ellí. Ente l'atascazu de la entrada, les obres de la plaza la Victoria y les cais que dan a ella. La disculpa de que tenía que facer enantes una visita. El que depués, con una cervecina delantre, parez que s'aborrez tener que dir de feria. Una tapa calamares y adiós feria. Otra cerveza y ¡quién s'alcuerda d'ella! La mala fama que tien ún de folgar, que siempre se me dio más bien que nada.

Depués vien lo peor. ¿Cómo xustifico'l viaxe del baldre? ¡El que nun fice nada en un día enteru! Ehí ye onde intervién l'arte, la maestría que te dan los años, la destreza de saber que d'esta tengo que salir. Lo que siempre se fai: emití un informe. ¿Cómo? Favorable. ¿Sobre qué?

¿Qué tonteríes preguntes? ¿Sobre qué son los informes? Sobre nada. ¿Pa qué van ser sobre dalgo? ¿Tu conoces a dalguién que llea un informe sobre dalgo? ¿Tu qué pienses, que la xente ye bobo? Parez mentira pa ti.

De toles formes, Madrid ta quedando guapo. Como Mieres. Tando la cerveza buena, la terraza cómoda y el camareru amable, ¡cómo nun van ser guapes! ¡Y la envidia que nos tienen los d'Uviéu!