El síndrome «Vientos d´agua» (I)

Los asturianos tamos enllenos de síndromes. Ye más: l'asturianu, dende presupuestos clínicos, cívicos y hasta sexuales, ye un síndrome enllenu de «sindrominos», ello ye que hai más «síndromes asturianos» qu'asturianos. Un síndrome, como ya lo saben los siguidores de Gustavo Bueno Jr. (el piquiñucu, l'otru non) significa «concursu» y vien, de mui atrás, vamos, del griegu, claro. Ello ye, fala d'una riestra de síntomes, nicios, datos, que se dan a la vez y que despliquen un determináu estáu morbosu. Tú garres, que se yo, a un bretón -tipu y al meyor salin-y venti síndromes. Eso vien ser una media europea razonable. Si pilles a un vascu, la cosa, como ye más primaria, rebáxase la de dios. Al meyor la media sindromática d'un vascu nun llega nin a unu, y ye un síndrome primordial, que namás que lo tienen los xudíos y, dependiendo del vascu, dalgún qu'otru talibán. Si pilles a un gallegu, la cosa complícase y salin-yos 112 o 123 síndromes. Pero si llegamos a los asturianos nin Alberto Coto, la calculadora humana ye quien  pa contalos nin cola ayuda de tolos ordenadores de la NASA. Un asturianu, de mano, siempre son dos. Parez contradictorio, pero non. Un asturianu ye él y el «so otru yo» col que se lleva mal porque s'escindió o porque nun lleva que'l «so yo» seya d'Uviéu y el «so otru yo», de Xixón. Y eso ye un síndrome claru qu'axunta a la vez munchos síndromes. Clínicamente llámase «síndrome d'Archer o de la Escisión» y ye una esquizofrenia, pero a lo burro. Hai munchos síndromes, menos que partíos asturianistes pero munchos más qu'asturianistes. Podríemos falar de toos pero nun lo vamos facer porque LA NUEVA ESPAÑA tien limitaciones espaciales que lo impiden. Entós, escoyimos cincu síndromes que nos despliquen como pueblu, que nos enseñen como colectivu y que nos definen como unidá clínica de destín no universal. Los cinco síndromes que nos caractericen son los d'Asperger, el de Cotard, el del «estantín irritable», el d'Estocolmu y el de «Vientos d'agua». Y vamos teorizar sobre ellos enantes que nos tome la delantera GB Jr. (el piquiñucu, tou un síndrome él solu), siguiendo un orde alfabéticu.

1- Agua, síndrome de «Vientos d'agua». Nel Festival de Valladolid del 2005 Tele 5 (la gran cadena, de televisión y hasta de báter, según la hora) presentaba'l pilotu de «Vientos de agua», teleserie dirixida por Juan José Campanella y protagonizada por Ernesto y Héctor Alterio, d'ente más otros. Ello ye: un repartu de chispón, un director esllumante y un argumentu atractivu que nos afectaba: el drama d'un emigrante asturianu, José Olaya, contada a dos voces, la del pasáu y la d'un descendiente. La serie estrenose en xineru del 2006 con tol rococó del mundu y, con alevosía y nocturnidá (a les tres selmanes ya la taben programando a les dos de la mañana) esapaeció de la cadena, p'apaecer más tarde nos quioscos y ser un éxitu de ventes en formatu DVD. Si d'aquella unu miraba los datos de delles empreses de medición d'audiencies per comunidaes, tocantes a esta produción, descubría con bien de plasmu qu'Asturies nun yera'l territoriu onde más se veía, cosa rara al tratase del país protagónicu del argumentu, pero significativa y qu'avanza esti primer síndrome. La serie ye un productu (Risto Mejido dixit) magníficu, de lo meyor que tien pasao pela televisión n'años. ¿Qué pasó entós pa que esi fracasu se produciera y más n'Asturies?: el síndrome. Campanella («El hijo de la novia»É) contó con xente asturiano pa facer localizaciones y facer un poco del casting (gracies a Nacho Carballo, ente otros) y tuvo'l detallazu de, consciente como ye de que esiste una llingua propia n'Asturies, respetar xiros que-y dieren sinceridá a la serieÉ Ye más: con soníu directu y pensando nel mercáu llatinuamericanu, fizo l'esfuerzu de sotitular cuando interveníen los asturianos, anque fuera munches de veces pa repetir castellanismos asturianizaos. Eso nun ye lo sustancial. Pos bien. La crítica asturiana, presuntos asturianistes y ciudadanos col síndrome eleváu a la enésima, lloñe d'agradecer el llabor, nun tuvieron meyor cosa que facer que crucificar la serie precisamente por tener esos detalles pa colos asturianosÉ Anque acoyone, esi transfer d'autoodiu, prexuiciu y estulticia, desplica'l síndrome «Vientos d'agua»É (Ha siguir).
{