Balance

un quiero desaxerar pero foron miles los mails, llamaes, cartes, sms y ropa interior de muyer y de paisano que recibí tres d'acabar de publicar la ya clásica serie dedicada a los síndromes que definíen a los asturianos. Lo afinao de les reflexiones, el nivel lliterariu y llingüísticu y, por qué nun lo reconocer, la pertinencia de les faltosaes (d)escrites con xuvenil enfotu marcaron un enantes y un depués na prensa escrito que hasta los más fans de Cascos, Gustavo Bueno Jr (el piquiñucu, vamos) y Villa siguieron con preste. «Dolfu Camilo ye gilipolles», diz unu de los mails entesacaos de la montonera recibíos, «l'autor d'estos desatinos apellídase "mamón"», diz otra de les amables cartes y hasta se recuerden de bona parte de la familia del firmante. «Tnín q t dnunciar, kbrón», remata un sms. Too ello anima al autor a seguir aprofiando nesa llinia, dao que la Seguridá Social, de momentu, cubre bona parte de les ferides y machaques qu'unu puea recibir, en quitando lo del cambiu de sexu, y eso da un aquel de garantía.

Llevamos seis meses de temporada de «La Nueva Quintana» y ye bon momentu pa la reflexión, mirar debes y haberes nun momentu interesante pa los asturianos, incluso pa les «drag-queens» asturianes. En menos de dos meses hai elecciones y los políticos tán revueltos. Si ficieren una cuarta parte de la mitá de lo que prometen nestos surreales períodos, too sedría distinto. Montaríemos nel Ave en Xixón y taríemos en Madrid en tres hores; Morala y Carnero taríen nel tayu y non nel banquillu, Comba o Zapico (d'ente más otros: el mesmu país), nun taríen persiguíos por facer usu de la so fala materna y vendríen munchos emigrantes p'Asturies porque veríen futuru. Nun ye asina y la esperanza dase y acábase a dos meses de les elecciones. Declaremos l'Estáu d'Eleición Permanente.

Dalgo güel a podre nel Estáu; ye más, atufa a invasión alieníxena, pero, a la que te descuides, tírente incienso y métente'l cepillu (dinero negru?) pelos güeyosÉ Lleven más de 2.000 años marcando'l destín, condenando y salvando, casando y descasando, xenerando mieos y culpes, bebiendo vinu y dando hosties. Son ellos. Sí. Acoyonen, paecen imposibles, entes anacrónicos, distopíes, pero sonlo, tán ehí. Dalgo nun se fizo bien, cuando una democracia (por burguesa que seya) cambia'l ruíu los sables pol ruíu les sotanes. Ente ellos y la vanguardia selvaxe del cavernarismu patriu recreen un infiernu en vida, una Sodoma enllena Zapateros y Llamazares y etarres. Y non. Como ciudadanu, con una fía de siete años que tien la vida, la de verdá, l'alegría, la de verdá, y el futuru, el de verdá, blincando ente los sos güeyinos, niégome a esi diariu insultu, a esa diaria logorrea desquiciada, a esi frikismu radiofónicu y de calle tomada (¿homenaxe a esi Cortazar, al que nunca nun lleeron, nin los más pedantes d'ente ellos, que diba «tomando» los cuartos d'una casa hasta dexar a los sos ocupantes prisioneros d'ellos mesmos?). Non. Niégome. Como diría Chesterton, hasta la provocación de los fatos tien un límite. Pos eso.

La llingua va tar otra vez en tolos programes políticos pa les próximes eleciones. Y demientres, ente qu'unu tien una ocurrencia y l'otru la contraria, la mayor parte d'ellos, de tar na poltrona, incumplirán les sos mesmes lleis, ordenamientos, salvaguardies de mentira pa una llingua que, día ente día, pierde falantes, pallabres, ilusiónÉ Nuna hemorraxa ensin acabu chiscada poles mentires institucionales y la falta d'una visión de país tan siquiera coherente. Dependiendo del nuestru nivel d'argullu ciudadanu, decidiremos en consecuencia.

Los meses dexen artículos memorables de González Arias, Xuan BelloÉ Poemes inolvidables de Vanesa Gutiérrez, Marián Suárez; noveles pa siempre de Ricardo Menéndez Salmón, Xandru Fernández, Xulio VixilÉ Imáxines pa nun esborrar de Ramón Lluís Bande, cantares de «Dixebra», Anabel SantiagoÉ y el besu secretu d'una enigmática muyer de güeyos marrones, que ríe como si los versos-y nacieren de la boca.

Aporta la primavera; ya fierve'l sangre, miramos pal nuevu tiempu, Mordor, la posible lluzÉ Sabemos delletrear la pallabra barricada. Y facenos acreedores a más misiles (perdón, quixi dicir misives) de los más sensibles lletores.
{