D´oca en oca

L'infiernu ta atacáu de constructores y asaltatumbes. Enantes de dicilo yo dixéralo Benito Pérez Galdós, al que les artes de rufianería diéran-y bien d'argumentos pa los sos «Episodios Nacionales».

Nun sé si vistis una película de Tom Hanks que se titulaba «Esta casa es una ruina». Dicen que ye una comedia. Ye mentira. Ye cine neorrealista. Al más puru estilu italianu de la época. Pue parecer un esperpentu. Pero cualquiera al que-y toque sufrir na so propia carne la presencia d'un constructor, los silencios d'un arquitectu o la llección maxistral d'un albañil sabe de qué toi falando.

Y el que diz la casa propia diz la nuestra ciudá, que ye tamién por estensión la nuestra casa. En tiempu normal, les coses van mal. En llegando los periodos electorales, les coses complíquense enforma. Cámbiennos aceres que naide sabe por qué les cambien. Tarden la de so madre pa cuatro baldoses. Agora la moda son les faroles. Cuantes más faroles, meyor. Cuanto más fierro, más que meyor. A naide importa la lluz, importa'l pegote de fierro en medio l'acera. Too ye inaugurar. O primeres piedres. O visites d'obra.

El constructor ye un arquitectu frustráu, con perres. L'arquitectu ye un constructor estudiáu, ensin elles. Ente los dos formen un tándem magníficu. Los que-yos rellenen los furacos son un exércitu enteru d'albañiles, carpinteros, fontaneros, encofradores... que bastante tienen coles tochures de los arquitectos y les racaneríes de los constructores. Y la priesa de los políticos.

Nesti tiempu vamos d'oca en oca. Salimos d'una obra y metémonos notra. D'una mal entregada a otra nun acabada. D'una a medies por facer a otra a medies por terminar. Si namás les mires per fuera parecen guapes. Pero si cuentes con tiempu como yo pa folgar, que siempre se me dio más bien que nada, date tiempu a reparar nos detalles.

Diz la xente: ye un problema de los políticos, que tienen ganes d'inaugurar porque lleguen les elecciones. Ye una verdá a medies. Nin siquiera a medies: a tercies. Enantes de ser un problema políticu, ye un problema d'arquitectos. Y de constructores.

Los arquitectos, por naturaleza, sábense a la diestra de Dios padre. Nun se sienten na obligación de tener que dar esplicaciones a los simples mortales. Son capaces de diseñar una piscina ensin canalizaciones d'agua a les duches. O una iglesia col altar mirando pa La Meca. O un teatru ensin peine de vares pa poder facer teatru. A ellos que más-yos da. Eso son minucies de los probes mortales.

Los constructores son como personaxes d'una canción de «Camela». De los que visiten nel Audi les obres. De traxe caru, pero que nun-yos lu dexa llucir la barriga. Con pinta mafiosos de película italiana barata. Intentando tapar con perres lo que namás la educación da con años de práctica. En Mieres Benito Pérez Galdós tendría pa escribir cien «Episodios Nacionales» más. Non sólo porque tengamos arquitectos y constructores, sinon porque tamién tenemos asaltatumbes. A la hora de la verdá, de tener qu'escoyer, prefiero a estos últimos. Polo menos nun incomoden a los vivos.

D'equí a final de mayu vamos siguir d'oca en oca, de bache en bache, de bistechu en bistechu. Los xitanos solíamos dicir: que tengas xuicios y que los ganes. Agora dicimos: que tengas obres y que l'arquitectu sea buenu. Y que'l constructor t'aparezca dalgún día pola obra. Anque sea en Audi.