Mercáu d´almes

MILIO RODRÍGUEZ CUETO -¿Y l'únicu que merca almes ye'l Diablu? -entrugó'l xeneral Marcelino.


Don Bernardo engurrió la frente:


-¿A cuentu de qué vendrá eso?


-¡Sí, ho! Si a mi da por vender l'alma, ¿namás me la quier el Diablu?


-¡Pero...! ¿qué burrada tas diciendo, animal? ¿Cómo se t'ocurre nin siquiera pensar eses coses? Y, amás, ¿quién diba dar nin siquiera un rial pola to alma?, ¿a quién-y diba interesar tan poca cosa?


-¡Coime, podía tratar con Dios!


-Dios nun tien falta de comprate l'alma, porque toes son d'él.


-Entós, ¿cómo consiente que la xente-y les venda al Diablu?


-¡Nun-y les venden de verdá! Ye una manera de decir qu'acepten condenase a cambiu d'un favor maléficu.


Marcelino sescudió la cabeza, escépticu:


-Non. Les almes véndense y cómprense. Eso sélo yo.


-¡Sí, home, sí! ¡Y sabrás tamién a cómo anda'l mercáu, cuánto más paga'l Malignu pol alma d'un católicu que pola d'un protestante!


-Na, lo de católicos o protestantes nun tien ná que ver. Les almes cómprense al pesu.


-¡Home, esa sí que ye gorda! ¿Y cómo se sabe lo que pesen?


-¡Paez mentira que tea usté estudiáu, don Bernardo! Sábese viendo'l cuerpu que carga con ella. El pesu del alma diz pa col pesu del cuerpu. ¿Cómo va cargar un cuerpu flacu con una alma gorda? Nin al revés: ¿cómo se va aguantar una alma ruina nun cuerpu curiosu? ¡Al primer bote que pegue, azótala pa fuera! Yo d'esto sé abondo, porque tengo un primu de La Fonmermeya que tamién-y vendió l'alma al Diablu. Llámase Ladio y la xente diz-y «el Desalmáu». Cuando yera rapacín, morriéron-y los padrinos por comer mazanes del suelu, y él poníase malu viendo que tol mundu ganaba la pegarata per Pascua menos él. Entós, un día que taba curiando cabres pa La Foz de Cibiellales, garró-y a una la pezuña y besó-yla, y púnxose: «Satanás: si me das pegarata, véndote l'alma.» Entós la cabra contestó-y: «Ta bien. Y, como tas finu y curiosu, voi date pol alma una pegarata con dos güevos duros». Por eso sé que les almes trátense al pesu. Ello fue que'l mio primu Ladio púnxose mui contentu, porque una pegarata de dos güevos duros nun la ganaba naide en tol valle. Y, como al otru día yera Domingu de Ramos, arrincó-y una cañiña a un lloréu pa llevala a bendicir y dá-yla al so padrín, el Diablu...


-¡Calla la boca ya, mentirosu! -enfadóse don Bernardo-. ¿Cómo va querer Satanás que naide-y lleve un ramu benditu, animal? ¡Nun cuentes más que barbaridaes, y si nun blasfemes ye porque nun te da la cabeza nin pa pecar!


-¡Pero... si-y pasó al mio primu Ladio'l Desalmáu!


-¡Que calles! -revolvióse don Bernardo, y tan gafu que'l xeneral Marcelino gachó la oreya, acobardáu.


Anduvimos un ratín los tres murnios, col ríu vecín cantusquiándonos por aquello d'amansar al cura y consolar al soldáu. Los ríos son mui consoladores. Namás hai que pensar nel Jordán, que purificó de la lepra'l cuerpu del xeneral siriu, o naquellos otros cuatro que cuerren pel Edén, que se llamen Pisón, Guijón, Tigris y Éufrates. Pero yo nun los cambio pol mio Nalón, que, agora que te cuento tantes peripecies pasaes, amigu Manolo Tuero, na escuridá secañosa d'esti tren que nos aparta, chucuchú-chucuchú, del puertu de San Lluis y la vera d'esi riyón caudal que llamen Mississippi camín d'otru santu, Francisco, y otru ríu, Sacramento... ¡agora, dígote, naguo yo por un sorbu del Nalón frescu y primaveral como cuenta'l primeru de Cróniques que naguaba'l rei David pol agua del pozu de xunto la puerta de Belén...! Pero, ¿pa qué queremos ponenos melancólicos nin señardosos? Val más apretar los llabios y sescudir los disgustos como pulgues mal agarraes, o como almes ruines mangaes en cuerpón epilépticu, y animase, y tirar p'alantre, que fue lo que fixi yo aquella tarde qu'entré nel carlismu, y siguir contando y oyendo, y por eso abrí la boca y dixi:


-¿Y si volvemos a la historia del poeta, don Bernardo?