Castigu de muyeres

MILIO RODRÍGUEZ CUETO Perdí la voz. Arrigorriaga dixo que non, que nun me daba los doscientos riales comprometíos si la causa última de la demanda yera una muyer, y yo, fatu de mi, perdí la voz, nun supi alegar, nun fui quien a protesta-y: pegaba botes, como un pelele, nel asientu duru y gastáu del simón, notaba cada adoquín y cada irregularidá de la calzada nesi güesu contradictoriu del final del cuerpu que nos saca, al empar, llágrimes y rises (seguro qu'usté, señor marqués, nun ta ignorante d'esperiencia tala) y nin por eses me salía de la boca pa fuera un xemíu. ¡Piense usté qué situación más angustiosa! Porque l'alma d'un poeta destila palabres como los burros rebuznen: con espontaneidá y naturalidá inconsciente. Y ehí me podía ver usté a mi cola boca más abierta que los güeyos y ensin articular soníu. ¡Y yo quería falar...! Un algo racional quedábame enceso tovía nel furaquín más guardáu del entendimientu que m'aguiyaba: «¡Defiéndete! ¡Defiende los doscientos riales! ¡Defiende l'honor de Brunilda!» Pero la petición, si ya nacía raquítica, menguaba y apagábase según diba pasando pelos pericuetos misteriosos pelos que viaxen el pensamientu y la voluntá, qu'agora taben fechos muséu d'espantos petrificaos. Nun yera quien a retrucar. Arrigorriaga, confundiendo'l mio silenciu con aquiescencia o rendición, ratificóse de manera tan docta como cruel:

-Nun ye'l dineru, Alcantarilla: son los principios. Dígame usté: Arrigorriaga, tengo falta de doscientos euros pa paga-y al xastre, o pa enterrar un familiar... ¡o pa recortar con ellos muñequinos de papel y tiralos al Manzanares! Y yo dói-ylos al momentu, téngalo por seguro, porque lu aprecio. Pero esi mesmu apreciu que-y tengo ye'l que m'obliga a negá-ylos si me diz que son pa mercar una pistola cola que se pegar un tiru o, lo que vien a ser lo mesmo, pa nun sé qué negociu raru onde se treviesa una muyer de punteres como la fiera salta al camín, callandino, al llombu del escursionista confiáu. Porque les muyeres, amigu Alcantarilla, son males y nun nos convienen. Usté ye persona culta y ta de más que-y traiga a la cabeza la fruta envenenada d'Eva, el sal de la muyer de Lot, el vinu inmoral de les fíes, el güertu de Jezabel, el llargueru d'Herodías, los trapinos de Salomé, les tisores de Dalila, la llingua de la muyer de Putifar, la espada de Xudí, el telar d'Aracné, la llacuada de Circe, el mantu de Medea, la rede de Clitemnestra, los pruyimientos de Mesalina, el pan de sapu d'Agripinila, les uñes de Xulia Drusila, la capa de la bruxa Morgana, la caída de güeyos de la reina Xinebra, el pucheru de Celestina, l'aniellu güecu de Lucrecia Borgia, la bañera ensangrentada de la condesa Báthory o, pa qué vamos buscar alantrones, les cintes permasuñaes del corselete de Sabel II, que compadezo al probe Francisco de Asís, que debe ser l'únicu na corte que nun sabe cómo les desamarrar.

Avanzaba'l simón pela noche madrileña. El caballu rinchaba de ratu en ratu, el cocheru cantaba tol tiempu coples ramplones en rima asonante y yo seguía mudu y impotente pa contestar al discursu d'Arrigorriaga, pa defender que la mio Brunilda nada tenía que ver colos exemplos de perfidia qu'acababa d'enumberame.

-En cambiu -volvió él-, piense agora usté, Alcantarilla, por contraste coles trampes femenines, cuántos nobles casos d'amistá viril nos da la Historia. Piense nel abrazu francu de Yonatán y David, n'Alexandro y Hefestión conquistando Asia de la mano, nos trescientos hoplitas espartanos guardándose mutuamente les espaldes nes Termópiles, nel duelu d'Aquiles delantre'l cuerpu inerte de Patroclo, na feliz intimidá de Xulio César y el rei Nicomedes nel interior de los aposentos reales, na llealtá de los doce guerreros virtuosos d'Arturo (disculpando al inocente Lanzarote, que pecó de bobón), nos cariñosos conseyos del fiel Oliveros al valiente Roldán, na camaradería de los caballeros del Temple, nes llágrimes del duque de Buckingham na cabecera de la cama onde agonizaba'l rei Xaime I d'Inglaterra o, buscándolo otra vez en casa, na devoción fraternal que-y tien el consorte al so queridísimu primu don Carlos, que nin siquiera la sombra d'una corona en xuegu ye quien a escurecer.

Del pescante llegaba la voz mal entonada del cocheru:

Gran problema es en la Corte

averiguar si el consorte,

cuando acude al escusado,

mea de pie o mea sentado.

Pero la mía negábase a salir, afogada pol pánicu d'imaxinar a Brunilda, ensin rescate, víctima de la barbarie de los sos secuestradores manchegos.

-Asina que, amigu Alcantarilla, si me diz qu'esos doscientos euros que me pide son pa marafundialos nuna folixa con mozos del so gremiu, verá con qué alegría s'abre'l mio sacu, y hasta me diba sentir agraviáu si nun me llama a compartir la celebración. Pero, pa una muyer, non.

Y sescudió la cabeza, neciu, y yo ensin voz, ensin razones, ensin espíritu, ensin fuerza, ensin esperanza, ensin vida.

-Mire usté, Alcantarilla, mire usté -apuntó pal esterior del coche: pasábemos per delantre fachades nobles con arquería, palacetes que tapaba la sombra protectora de xardines privaos a los que'l farolín del coche sacaba palideces fantasmales y transitories-. ¿De qué industria-y paez a usté que saldría la piedra d'eses dignes residencies: de la criticonería, los caprichos, los mimos, los celos, les envidies, les mentires, les floxures y otros mil vicios y debilidaes femeninos, o de la decisión, l'atrevimientu, la intelixencia, la industria, la constancia, l'esfuerzu y el trabayu masculinos? Que non, Alcantarilla, que non: que pa una muyer nun-y doi los doscientos riales. Mire usté, mire qué magnífiques construcciones. ¿Alguna d'elles la llevantaríen los peines, cepillos, perfumes, limes o afeites de cualquier tipu de les dames que les ocupen indolentemente, como parásitos infecciosos? ¡Nomenón, Alcantarilla, nomenón! Los patios y xardines esquisitos d'esa villa surdieron de los desvelos astilleros de don Alfredo de Colondres y Vegallana; y esa otra quinta, abrazada por arbolíu y canalinos rumorosos, ye frutu del bon facer de don Narciso Vilches y les sos mañoses importaciones americanes; y esi palacete, sobriu pero nobilísimu, construyóse gracies a los sacrificios heroicos del valiente y marcial coronel don Hipólito Gutiérrez de las Navas, y... ¡Gutiérrez de las Navas!

Como si m'espetaren un pinchu nel puntu más sensible del carrastiellu, blinqué nel asientu y, agora sí, volvióme por fin la voz:

-¿Cómo diz, Arrigorriaga? ¿De quién ye esa residencia?

-¿Cuála, esa que tien una fontica con dos amorinos echando agua peles pirulines cándides? Del coronel Gutiérrez de las Navas, ya-y digo. ¡Pero mire, por Dios, qué xardininos tan recoyíos y discretos la envuelven, con tanta sebe cómplice pal que busque escapar de miraes fisgones! Casi apetez parase a velo más de cerca... ¡Cocheru!

-Mándeme usté.

-¿Cuántu tiempu lleves aguantando les riendes esta tarde, galán?

-Equí sentáu comí, caballeru, y tovía nun me pasó más alimentu del gañote p'abaxo, que por eso canto, pa da-y ocupación y distraelu.

-Pues eso ta mui mal. Saca la bestia a un llau y vamos espurrir les piernes tu y yo pente esta floresta escura, que tamién traigo un poco fame y, ente los dos, igual atopamos algo que llevar a la boca.

Rara proposición yera aquélla, porque nun suel colgar fruta de los árboles pelaos de febreru, pero'l rapaz debió entender que lu convidaben a una fonda, porque dixo, con un quésiyo insinuante na voz, medio cortés y medio burlón:

-Soi probe y comer siempre ye un gastu. Pero, si al señor-y pesen les monedes en bolsu, yo ayúdolu a descargales y como lo que me ponga delantre.

Paró'l simón a un llau de la cai. Posáronse los dos, gayoleros y confianzudos, desentendíos de mi, y, del bracete, metiéronse pal xardín, pente una mata de pláganos fradaos, pa detrás d'una sebe alta y mesta de mirtu, y perdílos de vista. Nun los eché en falta, señor marqués, nin m'ofendió gota que nun me convidaren a aquella cena improvisada, porque, ¿cómo diba entrame nada en cuerpu, pasando les angusties que pasaba? Naquella hora negra, nun había pa mi más mundu que la fachada del palacete del coronel Gutiérrez de las Navas... del home de la mio amada Brunilda. Aquellos muros atesoraben los espeyos que se regalaben coles perfecciones del so reflexu, los sillones nos que depositaba, con delicadeza infinita, les sos gracies curvilinies, les alfombres que casi nin raspiaben los sos pies eterios, los cubiertos que teníen la felicidá d'asomase a los sos llabios sensuales, el colchón que guardaba la impresión levísima del so cuerpu, les enagües que... ¡Ah, y toos aquellos obxetos, sensibilizaos milagrosamente pol tratu cotidianu cola diosa, taben condenaos a languidecer y amustiar y volver a la so insignificante condición inicial de muebles insensibles porque Brunilda nun diba volver a casa, y mía yera la culpa, sólo mía, que yo yera l'instigador irracional d'un secuestru que tenía por beneficiarios únicos los apetitos brutos y monteses de los Izquierdo! ¡A eso me llevare buscar al Diablu por celestín del mio deséu! ¡A eso me llevare ser probe y nun tener doscientos riales!

Poséme del coche y, atontolináu pola conciencia culpable, encaminéme pa la residencia de Brunilda. Gruñía y insultábame, baxo les mios pisaes, la grava del caminín d'aquel Gólgota personal. Busqué nel porche protección de la pureza acusadora de la lluna, posé la cabeza contra'l granu fosco de les columnes y, inconsciente, como'l soldáu que, únicu superviviente de la batalla, busca desesperáu, pente los cadáveres amontonaos nel campu, un enemigu que lu mate y lu redima de la vergüenza de la cobardía, alcé una mano y piqué a la puerta.