Tomás de la Güeria, curdioneru históricu d´Asturies

Aurelio ARGEL


El trabayu discográficu que tien de protagonista al veteranu músicu Claudio Tomás Zapico Gutiérrez (Tomás de la Güeria) presentase esti xueves nel Alyuntamientu de Xixón. Esti discu doble tá encaxetáu na coleición «Fontes Sonores de la Música Tradicional Asturiana» del Archivu de la Música Tradicional del Muséu del Pueblu d´Asturies dende la que se repasen les vides y el llabor d´homes y muyeres imprescindibles n´el caltenimientu y conocencia del raigañu musical asturianu o de dellos conceyos con bailles concretos. Yá pa´l domingu 4 d´Ochobre a les siete de la tarde, na Casa la Cultura de Mieres, va facese una fiesta d´alcuentru musical que ye homenaxe y alcordanza pa esti músicu que morrió´l día seis de Mayu de 2008. Van tocar munchos músicos (solistes o por pareyes) de grupos folk y de la música de raigañu que trabayen el curdión, anguaño bien avaloráu que llámase n´Asturies «la curdión de botonera o curdión», «la curdión de botones o de formes», «el curdión», «l´acordión», «l´alcordión o la butuneira» en dalgunos llugares del Navia-Eo.


Fernando Ornosa, responsable de la coleición musical, matiza que yé más vieya nel tiempu que la cordión pianu o la cromática, que foi la que pasaron a usar munchos cordioneros tradicionales nel llargor del sieglu XX. Calcaña Ornosa n´el testu que Tomás de La Güeria foi tan bona persona como bon músicu y el sentimientu d´esti discu xúntase al caltenimientu d´un repertoriu que sirve pa´l consuelu de la perda del últimu gran instrumentista de la cordión de botones que pasó enforma desapercibíu. Casimente que yeren pocos folcloristes y estudiosos de la música asturiano los que-y prestaron atención.


Claudio Tomás Zapico Gutiérrez (Tomás de la Güeria) naciere l´ocho d´Avientu de l´añu 1923 en La Güeria, Urbiés (Mieres) y ye nome de rellumbrón nel raigañu cultural y musical d´Asturies. Diendo al entamu de los años 80 del sieglu XX, trenta años p´atrás, nun había, ente los nuevos músicos del folk y tradicionales, munchos que tocaren o pensaren nel curdión de botones y los vieyos, o ya dexaren de tocala o taben casimente que trescordáos. Col llabor de Nel Expósito («Felpeyu») dende´l grupu de Folklor Riscar d´Uviéu pasa depués a otros grupos y diríen saliendo otros hasta llegar anguañu al gran nivel que tien n´Asturies esti instrumentu musical de grandes intérpretes. Vale d´exemplu el segundu llugar nel Concursu Internacional del Festival Intercélticu de Lorient qu´algamaron delles vueltes n ´estos años David Varela («La Bandina») o Marcos Alonso («Blima»).


Esti discu preséntase en un CD doble pola importancia de tener un repertoriu completu y orixinal d´un instrumentu de la tradición musical asturiana del que nun hai nada espublizao y del que -calcaña Ornosa- «llaceriosamente yá nun vamos a ser quien pa poder asoleyar testimonios de primera mano como ésti que enagora presentamos. El valir d´esti discu ye poder amosar a Tomás Zapico y la so historia, la so técnica, los sos comentarios y cantares y la so imaxe nun vídeo que ye yá un documentu irrepetible pa la cultura musical tradicional d´Asturies». El testu presenta les pallabres de Xosé Ambás nel momentu mismu de trabayar y falar con Tomás de la Güeria, poco más de dos años p´atrás.


Pasudobles tradicionales, tangos, valses, sambes, pieces vieyes y a lo suelto, la l.lixera y les muñeires, aguilandos y asturianaes «dexáronme - diz Ambás- impresionáu y esi mesmu dia falé con dellos curdioneros de la nueva xeneración pa conta-yos el descubrimientu». El día 14 de xineru de 2008 Tomás de la Güeria grabó nel Taller de Músicos de la Fundación Municipal de Cultura de Xixón y amañose tamién un homenaxe nel Festival Tolo d´Asturies de la Felguera col curdión protagonista.


Tomás de la Güeria ye nel cordión diatónicu p´Asturies lo que ye Remis Ovalle pa la gaita o «La Busdonga» pa la tonada. El so nome caltiense como el de dellos que cita Nel Expósito nel testu «La curdión n´Asturies: Hestoria d´una recién llegada». Adelino «l´Arbéu», d´Ouviñana; Melchor Cosmen, del Puertu L.leitariegos o «Florín de Carrespientes» en Mieres son historia tamién de la música tradicional del curdión n´Asturies pero -calcaña Nel Expósito- «Tomás ye la maya de la cadena que xunta la tradición del instrumentu cola xeneración novalina de curdioneros mozos, dándo-yos tou un llargu saber axuntáu nel repertoriu espuestu nestos discos».


«Soi de Llangréu», el cantar y el curdión en «Qué lleves en esa saya» o «Buenos Aires», «Pastor que tas nel monte», «En la provincia de Soria», «Adiós Pampa mía»; «Samba Vasca», «Jota Vasca», «Por una triste peineta», «Samba de Valín», «L´Aguinaldu», «Vengo de moler, morena», «Tengo de subir al árbol» o la «Marcha Real» son dellos títulos que tan presentes nel trabayu que tien amestao el CD cola entrevista y los testos y aemeyes perimportantes de Nel Expósito, Xosé Ambás, Fernando Ornosa, Rmasés Ilesies y que tien rexistru de grabación de René de Coupaud y Juanjo Mintegui pal sellu Fono Astur.