Atrevémonos a dicir

PEPE MONTESERÍN -¡A dormir, mio neña!


-¡Primeiro cúntame un cuentu!


-Ya mui tardi.


-Bueno, cúntame un rezu.


-Un rezu nun se cunta, un rezu rézase.


-Entós, enséñame a rezar.


-¡Virxen! Casi nun séi. ¿Suénate'l refrán "A Dios rogando ya col mazu dando"?


-Non.


-Pues quier dicir que, amás de rezar, o sea, de pidir las cosas gratis, tenemos que lluchar por ellas ya yo hai yá bien de tiempu que dexéi de rogar pa garrar el mazu.


-¡Quiero deprender a rogar!


-¿Tu sentisiti falar del Padrenuestru?


-¿De mio padre ou del tuyu?


-Yo nun lu tengo, mio neña, ya'l tuyu nun te quier, por desgracia; a mí sí, ya tamién por desgracia. El Padrenuestru refierse a un padre universal ya únicu.


-Pues de nengún de los tres tenía yo noticias.


-Bono: Yara un padre que santificábamos...


-¿Qué ya santificar?


-Dedica-y cosas ya tenelu presente, ya pa ello pidíamos-y que s'asitiara na Tierra.


-¿Ónde vivía?


-En Cielu, el sitiu más preciosu, que ta por enriba de las nubes más altas, onde unu ya feliz pa siempre.


-¿Ya vieno pa eiquí?


-Sí, pero tratámoslu mal ya foise. Agora dicímos-y que vuelva ya, si quier, que faga lo que-y preste, pero que nun s'escaeza de danos de comer tolos días, nin de perdonanos cuando nun nos alcordamos d'él, igual que nosotras perdonamos a los que nun s'alcuerdan de que tamos eiquí.


-¿Ya verdá que perdonamos a los que nun s'alcuerdan de que tamos eiquí?


-Non, mio neña, non. Yo nun lu perdono, nin por escaecete a ti nin por alcordase de mi, ya en pleitos ando, ya n'abogaos, dándo-y al mazu, pa que pague lo que te correspuende ya pa que nun apaeza por casa ya me llibren del mal.


-¡Ah!


¡-Nun se diz "¡ah!", mio neña, dizse "Amén".


-Amén.