Celestino Rozada Tamés, asturianada al pie del Cuera

Aurelio ARGEL


Diéronse reciente los premios prestosos y de rellumbrón pa les voces meyores de la asturianada alrodiu'l Memorial «Silvino Argüelles». La séptima edición del concursu fizo reconocimientu del llabor del mayestru gaiteru - grandón que ye- Berto Varillas y de les voces de Lorena Corripio, Rosario González, María Sánchez, Anabel Santiago, Marisa Valle Roso, Sergio Agüeros, Rogelio Suárez, Jorge Tuya, y José Manuel Robledo. Tamién pa la de Celestino Rozada.


El llabor aseláu y testón de la Fonográfica Asturiana presenta añu ente añu un bon ramascu de grabaciones novalines y d'acordamientu pa caltener la fondalada de títulos, nomes y cantares de palmíu del sellu y, permediáu 2009, fizo publicación de «Al pie del Cuera», segunda grabación de Celestino Rozada.


Celestino Rozada Tamés nació en Porrúa, el 18 de mayu de 1972 y dende bien pequeñu garró afición a escuchar y cantar tonada. Tuvo de finalista nes categoríes moces de los concursos de sonadía del momentu, como La Cerezal, La Nueva, Amieva o el «Ciudá d'Uviéu» hasta que marchó p'Alemaña pa trabayar nel aeropuertu d'Hamburgo y tornar dos años depués, otra vegada a Porrúa, pa trabayar pelos montes del conceyu colos madereros. Présta-y alcordase de l'anécdota na que cuenta que, tando trabayando en monte y cantando -porque Celestino cantábalo too: tonada, canción española, flamenco- vieno a buscalu una paisana pidiéndo-y por favor que nun cantara más per un tiempu. Esto nun yera porque Celestino lo fixera malamente, sinón porque la bona muyer tenía contrataos a dos pintores pa remocicar la casa y llevaben munchu tiempu yá de retrasu por cuenta de que, en cuantes qu'oyíen cantar a Celestino pel monte, asomábense a les ventanes y nun trabayaben en tol día. Celestino dexó entós de cantar... namás que per unos díes.


Nel añu 2006, Celestino Rozada conoz al gran mayestru estudiosu de la tonada, Javier «el d'Arroes» ya íguase una bona amistá. Esti mayestru aguíyalu pa siguir nos concursos de tonada por cuenta de la voz tan curiosa que gasta y del gran oyíu que tien pal aprendimientu. «El d'Arroes» grába-y dellos cantares p'ameyorar nel aprendimientu y, sobremanera, con pieces que nun se sienten davezu nos concursos.


De Celstino Rozada pue dicise que tien estilu propiu, encontáu na so potente, clara y guapa voz cola que dibuxa perbién los cantares. Domina tolos estilos del xéneru, sobre too aquelles pieces que s'acompañen con gaita como «La Carretera El Pedrosu», «Hay una línea trazada», «Puente de Ribadesella» y otres tamién clásiques como «Los xatiquinos». Esti mozu ye intérprete d'una seguranza tremenda; xube y baxa con dominiu absolutu y con espléndida pronunciación, y gusta na interpretación, dalgo colo que non munchos otros intérpretes puen enchipase. Rozada tien actuao per toa Asturies amás de facelo tamién en Barcelona y Santander, y ye miembru de l'Asociación d'Intérpretes de la Canción Asturiana.


Na temporada 2007-2008 algama'l primer premiu del concursu «Ciudá d'Uviéu» que cuenta col sofitu de LA NUEVA ESPAÑA nel teatru Campoamor (y Filarmónica) y que ye, quiciabis, el más representativu del momentu. Nel añu 2008 participó tamién nel concursu d'«El Comercio», en Xixón, onde llogró el trunfu absolutu con tou merecimientu. Dalgo qu'indica que, de siguir nesta llinia, Rozada va algamar tolos obxetivos nos que s'enfote.


«Al pie del Cuera» sigue'l camín derrompíu col so primer trabayu fechu nel 2008 na casa «Llacín» de Llanes onde taben recoyíos temes endenantes citaos, repertoriu habitual de Rozada xunta otros clásicos como «Cuando asomas a Porrúa» (creación suya), «Viva la xente minera» o «Soy pastor». «Al pie del Cuera» vien con catorce cantares de la tradición asturiana: «De lo más alto del Cuera», «Voi vender toes les vaques», «N'Asturies, asturianu», «Voy a Oviedo pol Padrún» o «Toca la gaita, gaiteru», daqué colo que cuenta Rozada col mayestru Vicente Prado «el Pravianu». Dalgunos otros cantares tan fechos por xente de la canción como Socorro Noriega («Adiós al Valle de Viango») y Narciso Fernández Arduengo («Amieva, tierra querida») o por Nacho Fonseca que-y bautiza'l discu con lletra y música.