Aurelio ARGEL
L'escritor Miguel Solís Santos fizo presentación recién del so llibru «L'Hestoria d'Avilés». Esta ye la tercer edición d'una hestoria avilesina qu'entamara coles idees y debuxos del so autor nel añu 1984 pa dir asoleyándose nel añu 1985 na revista «El Bollo» pa les fiestes d'esi mesmu añu. A la metada'l tiempu diba espublizase la edición del añu 1992.
Preguntábase Solís Santos cómo yera Avilés enantes del sieglu XIX, enantes de les primeres asemeyes y fotografíes, enantes de la hestoria que se sabe bien; cómo yeren los caminos, les cases, el puertu, la ilesia yá vieya. Y entamó a escribir y pintar esta hestoria que fuera llibru de rescample nel tarrén de les historietes y de los historietistes d'Asturies. Yera un llibru-álbum fechu pa la enseñanza y bien didácticu, orixinal y inéditu. Solis trataba la hestoria d'esta villa n'Asturiano y con debuxos tratando de dexar reflexu dAvilés y de la so xente. Enagora, na tercera edición del llibru, lautor malpenes camuda el sellu personal col qu'entamara esti llabor. Vése la evolución normal d'un cuartu sieglu de puxu lliterariu y artísticu bien palmiáu qu'apaez na editorial Careaga Digital.
Dende los tiempos de la Prehistoria nos entamos del llibru pasose tamién a la hestoria política, social y del día ente día de la villa y la xente. Tiempu pa debuxar y dir falando de la depuración de la ría, de lo que s'atopaba na rodiada del castiellu Gauzón, de les fiestes, del deporte, de la «Marcha de fierro», de l'ameyoramientu urbanísticu, de l'espoxigue cultural n'Avilés y tamién yá del Centru Niemeyer por dicir ún de los exemplos novalinos de la tercer edición d'esti añu. «La Hestoria d'Avilés» dexa-y al llector curiosu 52 páxines con 226 viñetes. Venticinco son novalines pa esta tercer edición qu'amesta cinco páxines.
Miguel Solís Santos ye autor de rellumbrón na lliteratura d'Asturies y n'Asturiano. Tuvo venceyáu a la hestoria de «Conceyu Bable» y nos entamos de los años ochenta espublizó'l llibru de rellatos «Ástor o un ensayu pa una nueva mitoloxía». Algamó'l Premiu Diputación d'Asturies.
Quiziabes la primer novella contemporánea de la lliteratura n'Asturiano seya la so obra «Les llamuergues doraes» qu'apaeció casimente al tiempu qu'apaecía la primer «Hestoria d'Avilés». «El trunfu pretu» ye otra obra d'esti autor qu'algamara tamién el Premiu Narración Llarga Xosefa Xovellanos.
