Berta Piñán y Miguel Rojo ganen el Premiu de la Crítica d´Asturies

A. A.


Entregáronse la pasada selmana nel Centru Cultural Caxastur d'Uviéu los Premios de la Crítica a los meyores llibros de l'añu pasáu. L'Asociación d'Escritores d'Asturies fizo entrega de los gallardones d'esta edición númberu diez a Berta Piñan y Miguel Rojo. Na modalidá de Lliteratura Infantil y Xuvenil, Berta Piñán algamo'l premiu cola obra «Les coses que-y presten a Fran» como meyor llibru n'asturiano. Miguel Rojo presentara en castellán «El viaje de Tin y Ton», que tién tamién edición billingüe y debuxos de María Díaz.


«Les coses que-y presten a Fran» vien espublizáu na Editorial Trabe. Fala d'un neñu y les sos maneres especiales de vivir y de sentir a les que-y pon los debuxos Lucía Bande. «El Viaje de Tin y Ton» tá editáu por Pintar-Pintar y cuenta l'historia prestosa y curiosina de dos pulgues enfotaes en camudar la so vida y la so condición social.


Berta Piñán publicara recién na editorial Trabe, pal públicu más mozu, el llibru «L'estranxeru». Na editorial Pintar-Pintar espublizara tamién recién el llibru «Arroz, agua y maíz» col qu'algamó el Premiu «María Xosefa Canellada» también na modalidá de Lliteratura Infantil y Xuvenil convocáu pola Conseyería de Cultura y Turismu del Principáu d'Asturies. Orixinalidá y tratamientu de temes universales que traten de lo social yé lo que fizo pesu nel xuráu pa da-y esti premiu a esta autora asturiana de palmíu. Esti llibru vien coles ilustraciones peguapes d'Elena Fernández pa vistir los poemes nos qu'apaez l'hestoria d'un neñu d'Ucrania o la d'otru neñu de Bangladesh.