Poesía con premiu: de Teodoro Cuesta a Elvira Castañón

Aurelio ARGELl


Caltiense entá abiertu el plazu pa poder participar nos concursos y convocatories lliteraries estremáes y pernomáes de la Lliteratura y les lletres asturianes.


Na estaya poética, el «XIX Premiu Teodoro Cuesta» de poesía piésllase el día 9 de Payares, que ye cuando se conmemora el 179 aniversariu del nacimientu de Teodoro Cuesta. Esti prestixáu concursu lliterariu cuenta col sofitu y entamu de l´Ayuntamientu Mieres y la Casa la Cultura y tién yá un llistáu de nomes ganadores de rellumbrón na Lliteratura n´Asturianu: Xuan Bello, Martín López Vega, Pablo Texón, Ánxel Llano, Berta Piñán, Xaviero Cayarga, Lourdes Álvarez o Xuan Santori y Marta Mori, d´exemplu.


Esti certame tá dirixíu a cualquier persona que presente un poemariu orixinal, inéditu y en Llingua Asturiana. Resérvase un únicu premiu de 4.000 Euros y dáse la posibilidá de poder quedar ermu si asina lo decidiera´l xuráu o promovese la so publicación. El fallu del xuráu va dase a conocer nel plazu d´un mes y mediu.Deben unviáse l´orixinal y cuatro copies ensin firma nin robla a la Casa la Cultura Teodoro Cuesta de Mieres y les bases tan na páxina web de l´Ayuntamientu.


Tamién, no que cinca´l llabor llitarariu poéticu, caltiense abiertu el plazu pal «XIX Premiu Elvira Castañón» que vien entamáu pol´Ayuntamientu d´Ayer. Nel, puen participase con obres de tema llibre escrites en Castellán o n´Asturianu . Tienen que tener un llargor de 250 versos de mínimu o 500 versos de másimu y pueden presentáse hasta´l 30 de Payares na Casa la Cultura de l´Ayuntamientu d´Ayer en Moreda conseñando nel sobre el nome del concursu poéticu.


Esti «XIX Premiu Elvira Castañón» cuenta con 1000 Euros pa la modalidá de Castellán y otros 1000 Euros pa la que s´escriba n´Asturianu.


Bien pronto, esti 22 d´Ochobre, pieslla´l plazu pal concursu de Rellatos Curtios «Manuel Nevado Madrid» pa obres escrites en Castellán o n´Asturianu que nun pasen de les 40 llínies de llargor con un testu que tien qu´arratigase necesariamente al mundo mineru, esto yé, falando alrodiu de los personaxes, l´ambientación o, d´argumentu enteru d´esta temática minera sin quedase namás nel tarrén asturianu.Puede escribise de l´asuntu mineru de cualquier requexu del mundo nel que se cuente con esti llabor duro.