L´axenda escolar enllénase de teatru, músiques y lliteratura

Aurelio ARGEL


La Conseyería de Cultura y la Dirección Xeneral de Política Llingüística del Principáu d´Asturies presentaron ya el conteníu del programa cultural de l´Axenda Didáctica Escolar encaxelláu nes actividades pa escolinos del cursu 2009-2010.


Estes actividades van desendolcase nes estayes educatives d´Educación Primaria y Educación Secundaria nos colexos qu´imparten Llingua Asturiana y Gallego-Asturianu. Llabor piqueru nestes actividades va tenelu el teatru fechu n´Asturies o n´Asturiano porque cuéntase col nome de grupos con currículum bien prendío na escena de nueso: Teatro Margen, Quiquilimón, Yheppa, Higiénico Papel, Kumen, Asturmitomanía o Milio´l del Nido.


Pa los centros de Primaria la Música avérase a los escolinos colo que presenten el dúu «Mestura» (Marisa López y Luis Suárez) y colos conciertos de «Xentiquina» dirixíos por Nacho Fonseca y con discu novalín. «Poemes de Carambelu», discu y proyeutu de «Mestura» tien calter didácticu pa dir faciendo entrugues a los neños, interactuar con ellos y da-yos a conocimientu, coles lletres, del mundu mitolóxicu o de les actividades cotidianes del día ente día amás de facer manualidades, coreografíes y recitáos. Tamíen el maestru gaiteru Xuacu Amieva ufierta conciertos didácticos pa los neños.


Na estaya educativa de Secundaria, la Música vien col llabor de Anabel Santiago otra vuelta más. «Música y cantu tradicional d´Asturies"»ye´l programa col que presenta canciones tradicionales reellaboraes o creaes polos compositores del nomáu «Nacionalismo Musical Asturiano.1900-1936». Xosé Ambás, Lisardo Prieto y Diego Pangua (DRD, Felpeyu, N´Arba, Tuenda) var dir falando y dando conciertos alrodiu´l «Xénesis de la música folk n´Asturies actual. Dende la etnomusicoloxía hasta l´escenariu». Tina Cuadriello (Balandrán, Batulaxe) curdionera y profesora, acompáñase de les «Pandereteres de Fitoria» pa facer conciertu y ponencia del papel de la muyer na música tradicional asturiana na so hestoria. El grupu folk «Mezá» va facer mecigayu col soníu tradicional amestándo-y los soníos novalinos. Chus Pedro y Gabino Antuña, nomes cimeros na música d´Asturies nel llargor de trenta años con «Nuberu» presenten col pianu y la voz «Sones d´Asturies». Xune Elipe («Dixebra») va tratar el tema del «Rock nes aules» Xurde va con una parte teórica oral y con un taller pa guitarra elléctrica y karaoke de grupos de rock n´Asturianu. Toli Morilla va cantar y presenta-yos a los mozos los testos y nomes d´autores estremaos de la lliteratura asturiana cola «Actualidá poética escrita n´Asturianu». Técniques pal treslláu del testu pa da-y maneres de canción y conciertu coles pieces del so discu colos temes de Bob Dylan.


La Lliteratura pa Primaria preséntase col «Taller lliterariu infantil y xuvenil» de Iris Díaz Trancho y «Binoca» de Marisa López Diz. Argumentu, personaxes, llectura d´imáxenes, creaciones de los alumnos, fondos sonoros y conocimientu de dalgunes obres señalaés nesta estaya lliteraria n´Asturies. Pa Secundaria el «Taller lliterariu xuvenil» ta nes manes de Vicente García Oliva.


Tantu pa Primaria como pa Secundaria y Bachilleratu l´universu lliterariu y creativu del cómic preséntalu Chechu García que va face-yos repasu a los neños y mozos calcañando nel protagonismu hestóricu nel padremuñu y cultura d´Asturies de personaxes como Pinín, Telva y Pinón o Xuanón amás d´averalos al cómic d´anguaño con Gladius, La familia Castañón o Los Aguarones y de la presencia de l´Asturianu na creación al estilu manga xaponés.


El Teatru preséntase esti cursu nes actividades de Primaria colos mitos, la fantasía, la música y la maxa en «Vamos contar un cuentu» («Asturmitomanía»). «1001 Una odisea nel espaciu» son les Mil Una Nueches que traen «Higiénico Papel». «Serugues de cuentu» del «cocineru» Milio´l del Nido y el so ayudante mozu, «Turbina» enseñen les recetes de galletes más riques de tola fastera cantábrica. «Una lluna ente dos cases» ye la obra de «Quiquilimón» y la curiosa «@s» la de la compañía «Yheppa». «Sara nun tien pueblu" ye la que presenta «Teatru Kumen».


Na Educación Secudaria el Teatru presenta con Eladio de Pablo «Les rellaciones pelligroses». Humor pa los problemas xuveniles de güei coles rellaciones y pelligros que lleguen col bon o mal usu d´internet. Un sainete costumista nesti sieglu alrodiu´l sexu ente los mozos. Yá, dende cuartu cursu de la ESO «Fruta Prohibío» ye la versión de dramaturxia que presenta «Teatru Margen» y que ye´l treslláu de «La Señorita Julia» de Strindberg.