Lolo de Cabranes, voz de saber y sabor

AURELIO ARGEL GONZALO BENGOA «Sabor asturianu» últimu discu de José Manuel Robledo presentose aseláu y ente amigos fai dalgunos díes. Esti títulu d'estrena apégase tamién a los trabayos novalinos que presentaren Celestino Rozada Tamés y Collado Vidal na Fonográfica Asturiana.

José Manuel Robledo García («Lolo») lleva toa la vida viviendo nel Conceyu Cabranes. Ñació en Mases el 26 d'Agostu de 1954, fíu de Esteban (mineru) y d'Aurina (llabradora) y ye'l caberu d'ocho hermanos. A los nueve meses la familia treslládase a vivir p'Arboleya onde Lolo queda hasta l'añu 1979. Alláncase n'El Cantu dempués d'amaridase cola so muyer, Alicia Suárez Corripio. Esti matrimoñu tien una fía única, Almudena, que caltién perbona aptitú pa cantar.

De la so ma, herieda Lolo la prestosura y queriencia pola canción. En cuántu qu'entamaben dalgunes xuntances o fiestes mandábenlu cantar y asina, nel añu 1997 na Ca'Joselu de Santolaya, oyolu el mozu gaiteru Óscar Fernández que-y cala perbona aptitú y piensa que tién que preparase pa cantar daqué. Esti gaiteru de rellumbrón -y tamién cantante seriu- fala col so pá, Narciso Fernández, p'apuntar a José Manuel Robledo nel primer concursu de la canción asturiana «Conceyu d'Amieva» na modalidá d'aficionaos onde asoléyase como campeón nel añu 1998. Piensa Robledo daquella nel entamu de la so carrera formal y de xeitu; apúntase y participa casimente quen toos los concursos que s'antroxen n'Asturies.

Nel añu 1999 queda segundu na modalidá de «canción a la gaita» nel concursu d'Amieva y segundu tamién -esi mesmu añu y nel mesmu concursu- na modalidá llibre de paisanos. Esti añu queda décimu nel concursu «Ciudá d'Uviéu» nel teatru Campoamor tamién na modalidá llibre de paisanos y na mesma estaya, queda cuartu nel concursu de Xixón.

Nel añu 2000 gana'l primer premiu nel «Concursu d´Amieva» na especialidá de cantar a la gaita y asegunda esti resultáu a manera de campeón nos dos años siguientes.

Nel añu 2002 llogra'l trunfu nel «Concursu de La Nueva de Llangréu» na modalidá absoluta y yá nel añu 2003, el Centru Asturianu de Madrid otórga-y el «Urogallo de bronce» de la tonada asturiana.

«Lolo de Cabranes» enfilera yá tiempos de trunfu y nel añu 2004 algama'l gallardón «Campeón de Campeones» nel «Concursu d´Amieva» y el títulu de campeón nel «Concursu y Muestra de Folklore Ciudá d'Uviéu» nel teatru Campoamor. Nel añu 2005 asegunda otra vegada esti primer premiu nel «Concursu de La Nueva» y nel de Rioturbio, que tamién llogra nel añu 2006 talamente como'l primer premiu del Concursu d'Avilés. Diben seguir llegando hasta la dómina d'apaición del discu «Sabor asturianu» dalgunos reconocimientos más pa la voz de «Lolo»: segundu n'Amieva nel 2007 y nel 2009; sextu nel teatru Campoamor nel añu 2008 y cuartu, nesti concursu, nel 2009 tamién.

Otros reconocimientos especiales pa la voz y llabor musical de Robledo y que s'amesten al que-y dieren nel Centru Asturianu de Madrid son el «Diploma de l'Axencia Asturiana d'Emigración» nel añu 2005 y la so presencia na riestra de nomes entecoyíos como ganadores del Memorial «Silvino Argüelles» pa los años 2004, 2006, 2008 y 2009.

Anguaño, talántase a Lolo de Cabranes como ún de los meyores cantadores a la gaita nos últimos años. De les sos actuaciones señálense les que ficiera en Santu Domingu, Bélxica, Madrid, Barcelona, Torrevieya, Benidorm, Galicia, Cantabria o Lleón. Nel Principáu d'Asturies, amás de los concursos y muestres, rescampla la que ficiera nel so conceyu col gaiteru Óscar Fernández antre los Príncipes d'Asturies cuando se-y diera a Torazu el gallardón de «Pueblu exemplar» d'Asturies de 2008.

Pa «Sabor asturianu», que se grabara nos estudios Groove Audio Sistemas «La Nozal» de Llanera, Robledo encaxeta nel repertoriu de diecisiete cantares, pieces afarto de reconocimientu popular y del raigañu asturianu: «Qué tienen los mío calzones», «La Paxarina», «Hermosa villa de Mieres», «Neña Galana», «Baxaba Barrial de Casu» o la dialogada con Almudena Robledo «Esta noche fui de ronda».

Dalgunos cantares del trabayu cuenten tamién coles igües que fizo Fernando Malva coles programaciones amás de tocar la flauta duce, les guitarres y la percusión. Claro ye que non podía faltar l'acompañamientu del gaiteru Óscar Fernández, ún de los ganadores p'Asturies del trofeo internacional «Macallan/McCrimmon» del Festival Intercélticu de Lorient fai yá dalgún tiempu. Esti mozu toca la gaita en «Con sidre per un centollu», «L'aire me apagó la vela», «De xunta Pravia» o «Toca la gaita, gaiteru» y otres y canta a duu con Lolo en «Xunci les vaques, Ramona» y «Que vivan los asturianos». «Sabor asturianu» amésta-y a la riestra de títulos tradicionales les lletres propies del mesmu Lolo («Cabranes queda en el mediu») y la que-y ficiera Narciso Fernández Arduengo nel cantar «¡Viva Asturias!».

José Manuel Robledo («Lolo de Cabranes») ta pensando enagora en recuperar dalgunos rexistros de cantares grabaos fai dalgún tiempu y presentalos en CD nel sellu Fonográfica Asturiana col que publicóse esti prestosu «Sabor asturianu».