Lne.es » Nueva Quintana
 Noticia anterior   Noticia siguiente 

Les dos vides de Marianita Alvarado

 07:24  
Enviar
Imprimir
Aumentar el texto
Reducir el texto
Les dos vides de Marianita Alvarado
Les dos vides de Marianita Alvarado  

ELISABET FELGUEROSO LÓPEZ Si tuviera en Barcelona nuna tarde señardosa d'abril del añu 1899, ya'l cielu cayera plomizu como un suañu d'ausencies esguedeyando la nueche, quiciás, azogada por un orpín empeñáu en texer telina húmeda nes cabeces distraíes que cruzaren la ciudá, emburriaría la puerta d'un concurríu establecimientu na cai Montsió, ya ellí, Marianita Alvarado tendría topetao de bruces con aquel rapaz non mui altu, peináu con raya al llau y dueñu d'un poderosu flequillu que'l pasu'l tiempu de xuru fairía despaecer. La tazuca fumeante de café, que'l mozu llevara na mano, finaría empapando'l xerséi prietu de cuellu vueltu ya'l pantalón mal plancháu d'él, mentanto pente los grandes güeyos buxos de Marianita asomare una disculpa. Pablo, qu'asina se llamaría el rapaz, nun acertaría a soltar la mala pallabra que se-y vendría a la boca al recibir la quemazón derramada del café; sabría, ensin tenela visto enantes, que yera imposible ensuciar l'aire que envolvía a aquella muyer de piel almendrao, ya naguando por secar colos llabios la lluvia que prendía en rizu la negrísima melena de Marianita, ufriríase a acompañala a una zona alloñada del baruyu la puerta. Ella, anque llevare poques selmanes na ciudá, reconocería un acentu foraneu nes pallabres del rapaz sintiéndose cómpliz al momentu. Ye cierto que, si'l pá de Marianita Alvarado sopiera que la so única fiya, heredera de la fortuna Alvarado, educada nos meyores colexos d'Europa nun ánimu de arranca-y cualquier rastru indíxena de la Guatemala natal, taba alternando como una burguesa descarada nun ñeru d'intelectuales llamáu Els Quatre Gats, entraría alloriau con una bocanada de rabia, convirtiendo el llocal nun llumaral. Pero Marianita nun pensaría nesos momentos en so pá, pensaría nel mechón rebelde de Pablo resbalándo-y pel arcu la ceya ya naquellos deos xesticulando nerviosos, que pronto diben facer llazu colos suyos nos paseos por Montjuic.

La vida xurdiría como llambriáu multicolor delantre'l pasu firme de Marianita Alvarado de tar aquella tarde en Barcelona. Poco tardaría en saber de la pasión de Pablo, del so talentu arrollaor, quedando atrapada pol Universu de dibuxos imposible que-y mostraba, fascinada poles servilletes escaecíes en bolsu la gabardina qu'entafarraba col perfil maya de la rapaza. Yá s'arreglaría ella pa xuntar pieza a pieza una historia que contar nes cartes qu'unviaba tres vegaes al mes, tres l'abandonu de la casa de tía Cecilia ya'l trasladu a París. Arístedes Alvarado, lleería les cartes con arguyu nel patiu la casona de branu, creyendo lletra a lletra aquella primer espístola escrita pol Conde de Nonell na que-y pidiera permisu pa que Marianita viaxare a París a acompañar la enfermedá de la so fiya Agnes, collacia la ñena Alvarado nos años del colexu inglés. Ya el poderosu Alvarado, cegáu pola so afán de nuevu ricu, famientu por rellacionase cola aristocracia, nun aldovinaría l'engañu tres d'aquella pluma, nin llegaría a descubrir que'l Conde de Nonell nun yera si non el pintor Isidro Nonell, amigu de Pablo, ensin más títulu que'l so talentu nin más afán qu'ayudar a la pareya na so aventura parisina.

Pue que l'amor de Marianita y Pablo nun fuera resistir eternamente, pero, ¿qué amor ye'l que nun s'agota? ¿cuál ye'l qu'atopa l'agua na que no se marchita? Los meses de París seríen un llatíu constante pal pechu la moza. Y yá pasáu'l tiempu, nos últimos años de vida, reposada na mecedora del patiu la casona de branu, echaría la mano al so moñu fartucu canes, alcordándose de la melena prieta que-y tocaba l'hombru cuando Pablo la pintara en cuadru con un abanicu. Zarraría los güeyos, baxando la mano, alcontrando carne fofo onde tuvo'l pechu turxente qu'avergoñada dexó escapar d'embaxo la tela blanco porque yera asina como él la quería ver. Lluéu, la lluna collorada nel ocasu xunetu recordaría-y el so pezón escuru, que Pablo acariciaba pa poder pintalu espiertu, ya soltaría un sospiru señardosu enllenu de paz.

Pero Marianita nun ta na ciudá de los prodixos, nin ye l'añu 1899, nin pisó enxamás les aceres abarrotaes d'un llugar estranxeru. Nun pueblín remotu del Quiché, llevántase cada mañana bien ceo, arrodiada por quince rapacinos enllenos de miseria y col alma rota de tanto parir. Lleva sobre'l so cuerpín escuru'l pesu d'un home que tien mayestría en dar palos, y malpenes dexa escapar en dalguna ocasión una sonrisa esmellada a edá temprana. Hai díes que, cuando ta sola, ya'l sol llámbe-y les mexelles nel pasar pela caleya, alcuérdase de la cooperante que tuvo un mes en ca les monxes, y d'aquella tarde na que se contaron delles histories. Nun pue dicir cómo foi que la rapaza, estudiante d'arte n'España, entamó apasionada a falar de la vida d'un pintor que almiraba, sacando al ratu un llibrín gastáu del bolsu, nin acierta a saber qué foi lo que diera pie a que-y amosara un debuxu en concreto del tal Pablo Picasso. Por embargu, tien presente'l pesar que-y prendiera'l rostru énte'l retratu d'aquella muyer morena vistía de blanco con un pechu al aire. Pué que pasaren seis años, nun faló con naide del debuxu, pero entovía güei sueña pasaos imposibles nos que foi ella esa muyer a la qu'un home amó bella, desnuda, llibre. Ya'l pasu polvorientu sobre la caleya abandonada, Marianita Alvarado siéntese desfacer en pincelaes quimériques que la enllenen de lluz.

COMPARTIR
 
  HEMEROTECA

HACE 25 Y 50 AÑOS

Portadas La Nueva España

Portadas de La Nueva España

Las portadas de hoy de La Nueva España hace 25 y 50 años

     CONÓZCANOS: CONTACTO |  LA NUEVA ESPAÑA |  CLUB PRENSA ASTURIANA |  PUNTOS DE VENTA |  PROMOCIONES    PUBLICIDAD: TARIFAS| AGENCIAS|CONTRATAR  
Lne.es y La Nueva España son productos de Editorial Prensa Ibérica
Queda terminantemente prohibida la reproducción total o parcial de los contenidos ofrecidos a través de este medio, salvo autorización expresa de La Nueva España. Así mismo, queda prohibida toda reproducción a los efectos del artículo 32.1, párrafo segundo, Ley 23/2006 de la Propiedad intelectual.


  Aviso legal
  
Otros medios del grupo Editorial Prensa Ibérica
Diari de Girona  | Diario de Ibiza  | Diario de Mallorca  | Empordà  | Faro de Vigo  | Información  | La Opinión A Coruña  |  La Opinión de Granada  |  La Opinión de Málaga  | La Opinión de Murcia  | La Opinión de Tenerife  | La Opinión de Zamora  | La Provincia  | Levante-EMV  | Mallorca Zeitung  | Regió 7  | Superdeporte  | The Adelaide Review  | 97.7 La Radio  | Blog Mis-Recetas  | Euroresidentes  | Lotería de Navidad