Lne.es » Nueva Quintana
 Noticia anterior   Noticia siguiente 

El póquer de la lliteratura asturiana

 07:24  
Enviar
Imprimir
Aumentar el texto
Reducir el texto
El póquer de la lliteratura asturiana
El póquer de la lliteratura asturiana  
 MULTIMEDIA

JOSÉ ÁNGEL GAYOL Como nuna partida de póquer, la lliteratura asturiana ta aportando a un cruce, a una mano decisiva onde toca facer apuestes fuertes. El megollu del asuntu, lo que nun sabemos, ye si seremos quién a manexar la partida con aciertu. Igual que nel Texas Hold'em, dalgunes cartes tan descubiertes, y cada xugador tien dos cartes na mano, tapecíes pal restu. Hai persones y personaxes que miren la llingua y la lliteratura asturiana colos güeyos d'un dos de diamantes (nun tenemos más que mirar pal Gobiernu), y otros sectores de la sociedá asturiana ufierten al xugador un as de tréboles (esa xente que va a los actos de la Selmana de les Lletres y amás sigue l'aldu azarientu de la nuestra lliteratura tol añu). En xeneral, les cinco cartes sobre la mesa nun amuesen bon aspectu, pero los xugadores de la lliteratura asturiana tienen una mano interesante: hai que xugala.

¿Quién arriesga les perres del tiempu nesta partida ensin fin? Xugamos los escritores, apostando por una lliteratura comprometida cola calidá, con procuru na gramática, léxicu y sintaxis. La lliteratura asturiana pasa, al mio humilde entender, por un diálogu reflexivo col papel y cola historia. Escribir ye un actu consciente con ún mesmu. Primero, escríbese pa ún, y dempués pa los demás. Ye lo más honrao. Nun esperar nada que nun seya la xera bien fecha, el trabayu de los vieyos, de los paisanos que pensaben que valía más facer daqué con xeitu qu'ensin xacíu. Los premios vienen solos. El tiempu dicta sentencia, pa mal y pa bien.

Fai falta un reflexón crítica na lliteratura asturiana. Yera interesante que s'organizara una xunta anual d'escritores, meses redondes cada poco, alderiques en radio y televisión, un circuitu de presentaciones de llibros al traviés d'un acuerdu ente les editoriales asturianes y un foru o un espaciu que sirviera pa esos actos? Fai falta crítica pública, xuicios sobre lo que s'escribe, onde la llectura afonde nel testu y sirva de regatu hacia ríos más bayurosos. Ye conveniente poner a la nuestra lliteratura en rellación coles lliteratures con nos arrodien, que salga del requexu y s'airée. L'airín llimpia la casa, mata los parásitos y permite almirar les perles que s'esmigayan pel suelu como si nun tuvieran valor.

Muncho de lo que s'escribe anguaño n'Asturies tien una importancia que nun rescampla más allá d'unos pocos iniciaos. Quiciabes convendría descubrir puertes que tan ensin abrir. Confieso que, dalguna vez, me preguntó daquién qué se podía lleer n'asturianu. Xente de la cai, xente que llee muncho, muncho de Dan Brown y Pérez-Reverte, eso sí. Xente d'infantería, qu'afita les editoriales con perres que pasen pol ésitu del últimu tomazu de Julia Navarro, perres coles qu'asoleyar los llibros que de verdá pagan la pena. Y nun sé qué dici-yos. Qué títulu pue conectar col públicu mayoritariu que solo espera de la lliteratura distracción ensin reflexón. ¿Ónde ta'l Tomate o'l Sálvame Deluxe de la lliteratura asturiana? ¿Ónde s'arrequexan esos llibros tan planos como necesarios? Na lliteratura asturiana toos queremos ser los Mesíes que salven l'asturianu, cuando la Lliteratura d'un país, la que lleva mayúscules, sálvase sola, y con solo trabayu, y más trabayu. Con graninos de sable llarimando sobre'l papel.

Nesta partida de póquer, los llectores xuegan les cartes más importantes. Escaecelos ye un fallu mui gordu. A veces tengo la sensación de que l'escritor n'asturianu piensa que tien más importancia que'l llector, tan avezáu ta a escribir pa otros escritores, pa escuchar les allabances d'otros del mesmu oficiu, como si vender solo zapatos a zapateros permitiera sobrevivir a un negociu. La lliteratura asturiana necesita la complicidá del llector, porque él guarda dos ases nes manes y otros dos nes mangues.

Pero lo más importante de too, ye que los xugadores somos nosotros. Somos xugadores. Entovía. Les cartes nun valen pa muncho, pero inda somos protagonistes de la nuestra partida. Depende de lo que faigamos p'abandonar el requexu nel que s'asitia la lliteratura asturiana agora qu'aportamos a un cruce de caminos desconocíos, a les apuestes de too o nada.

José Ángel Gayol

(Mieres, 1977) es escritor, crítico literario y editor (Editorial Universos).

En 2005 realiza la edición y el prólogo del volumen colectivo «Nuevas maneras de contar un cuento» (Llibros del Pexe, Gijón), en el que aborda un estudio sobre la noción de relato breve.

Con el velo de una sonrisa (Ed. Nobel, Oviedo, 2006) obtiene el premio «Asturias Joven» de Poesía 2005.

En lengua asturiana ha publicado la novela «Argonautes» (Ed. Ámbitu, Oviedo, 2007), y diversos artículos en prensa. Colabora habitualmente en diversas publicaciones como las revistas literarias «Clarín», «Reloj de Arena», «Formientu», o en el suplemento de cultura de La Nueva España, entre otros.

Es licenciado en Derecho por la Universidad de Oviedo.

COMPARTIR
 
  HEMEROTECA

HACE 25 Y 50 AÑOS

Portadas La Nueva España

Portadas de La Nueva España

Las portadas de hoy de La Nueva España hace 25 y 50 años

     CONÓZCANOS: CONTACTO |  LA NUEVA ESPAÑA |  CLUB PRENSA ASTURIANA |  PUNTOS DE VENTA |  PROMOCIONES    PUBLICIDAD: TARIFAS| AGENCIAS|CONTRATAR  
Lne.es y La Nueva España son productos de Editorial Prensa Ibérica
Queda terminantemente prohibida la reproducción total o parcial de los contenidos ofrecidos a través de este medio, salvo autorización expresa de La Nueva España. Así mismo, queda prohibida toda reproducción a los efectos del artículo 32.1, párrafo segundo, Ley 23/2006 de la Propiedad intelectual.


  Aviso legal
  
Otros medios del grupo Editorial Prensa Ibérica
Diari de Girona  | Diario de Ibiza  | Diario de Mallorca  | Empordà  | Faro de Vigo  | Información  | La Opinión A Coruña  |  La Opinión de Granada  |  La Opinión de Málaga  | La Opinión de Murcia  | La Opinión de Tenerife  | La Opinión de Zamora  | La Provincia  | Levante-EMV  | Mallorca Zeitung  | Regió 7  | Superdeporte  | The Adelaide Review  | 97.7 La Radio  | Blog Mis-Recetas  | Euroresidentes  | Lotería de Navidad