La Nueva España

Bimenes convoca el XI Concursu de gaiteros

El certame ta abiertu a instrumentistas menores de ventiún años, que deberán emplegar la gaita tradicional

11.05.2010 | 10:03
Aitor García, gaiteru de Bimenes.
Aitor García, gaiteru de Bimenes.

Aurelio ARGEL


El XI Concursu de gaiteros mozos de Bimenes tien ya fecha celebración. Será el sábado 3 de xunetu (18.30 hores) y ta abiertu yá el plazu d'apunte. Se celebrará en Rozaes (Bimenes) encaxetáu nes actividaes de la XIV Fiesta de la oficialidá de la llingua asturiana. La semifinal va facese'l sábadu 26 de Xunu na Casa la Cultura de Bimenes, dende les once de la mañana. Nel casu de que'l númberu de gaiteros apuntaos fuera mui altu, continuarase pela tarde a la hora que señalaren los miembros del xuráu. Si el númberu ye menor de diez, tolos apuntaos pasarán direutamente a la final nel día señaláu. El concursante tendrá de presentase, como mínimo, trenta minutos enantes del entamu. Semifinal y final tan abiertes al públicu.


Van poder concursar tolos gaiteros y gaiteres (a mou personal) con menos de ventiún años al día 30 de xunu de 2010. Los datos personales y de contautu, amás d'una fotocopia del DNI, señalando nel sobre que ye pal concursu de gaiteros, hai qu'unvialos al Ayuntamientu de Bimenes, na cai Martimporra, col código postal 33527. El plazu y tiempu pa la receición d'inscripciones zárrase'l 21 de xunu a les 12 hores. La relación de participantes fadráse pública'l día 22 de xunu, nun actu abiertu na Casa Conceyu de Bimenes, a les doce la mañana, hora na que se sortea tamién l'orde pa la semifinal y/o final.


Pa la semifinal los concursantes tienen qu'interpretar un tema de llibre elleición. Pa la final (con seis gaiteros si el númberu d'inscritos ye mayor de diez) el gaiteru o la gaitera tendrá d'interpretar dos temes ensin añedíos nin supresiones. Ún, de llibre elleición y otru d'esta llista: «Muñeira de Remis», «Floréu de Remis», «Diana floriada de Veriña», «Fandandu puntiáu», «Muñeira Barganaz», «Xota'l centru», «Muñeira Lliberdón», «Alborada'l paxarín», «Xota l'Oriente», «Carretera d'Avilés» y «Saltón».


Los concursantes han d'emplegar la gaita tradicional asturiana d'un solo roncón en cualesquiera de les sos modalidaes. Tamién ye obligatoriu pa la final l'usu del traxe tradicional asturianu.


El xuráu desígnalu l'Ayuntamientu y tará compuestu por miembros cualificaos. Va presidílu l'alcalde del Conceyu Bimenes o la persona na que delegue. El so fallu sedrá inapelable y afítense un primer premiu de 300 euros y troféu, un segundu premiu de 200 euros y troféu y un tercer premiu de 100 euros y troféu.

Compartir en Twitter
Compartir en Facebook
Enlaces recomendados: Premios Cine