«Amigos de Cudillero»

M.ª ESTHER GARCÍA LÓPEZ Nun hai dulda que Cuideiru ya l.lugar d'inspiración, l.lugar qu'invita a soñar, l.lugar que desata la pluma de los poetas ya'l pincel de los pintores. Cuideiru ya pintura. Cuideiru ya poesía. Asina ente colores ya versos, ente rimas ya pinceles, la pluma de María Zamarreño, alumna del IES Isla de la Deva de Piedrasblancas, pintó un caligrama. Un paisaxe de ficción que podemos contemplar l.liendo'l guapu cuentu visual, onde el.la describe d'una manera mui particular la mar ya'l paisax d'esti requeixu encantáu que ya Cuideiru.

Asina, de la mano d'esta xoven escritora, cheguéi'l sábadu al palaciu de la Magdalena, en Soto'l Barcu, pa celebrar la Fiesta L.literaria de la Mar, qu'organiza con tantu esfuerzu ya dedicación l'asociación «Amigos de Cudillero». Nesta fiesta que ya se convertíu en fiesta tradicional, pues l.lieva 38 años celebrándose, la l.literatura tien un l.lugar importante. D'una parte, pol prestixosu concursu l.literariu que tolos años convocan, ya d'outra, pol cuadernu l.literariu que, por encargu, escriben pa la ocasión distintas personalidades del mundu de la cultura.

Cuando nun actu como esti, la l.literatura ya protagonista, reina, de xuru, el bon gustu ya la esquisitez, ya nun lo digo polos manxares que nos sirvieron pa cenar, que bien merecen chufase, dígolo, sobre too, polos manxares l.literarios que pudiemos saboriar. A esti banquete l.literariu fui, como dixi, de la mano la mia alumna María Zamarreño, ganadora del concursu l.literariu «Cudillero, el pescador y la mar». María tomóu la palabra ya l.leunos el caligrama, tituláu «Colores», un cuentu visual, nel que l'autora representa la más guapa marina pintada con palabras.

La nueite festiva bril.lóu tamién pal mundu del teatru, representáu por Arturo Castro, quien recibió ente rel.lumos la insignia d'oru de l'asociación.

Ya mui prestoso, vivir por unos momentos ente colores ya l.luces, música ya emoción, ya poder escaecese de la negrura que nos pintan a diariu n'outros foros.

Negru nos pintóu'l panorama José María García, autor del cuadernu l.literariu qu'escribió pa la ocasión, quien fixo un «repasu», col sou particular estilu críticu, pol mundu de la política ya de la sociedá asturiana ya española. Bien ya verdá que nun nomó a naide en particular, pero nas suas palabras yera fácil identificar a los aludíos. Hubo silenciu ya tamién aplausos, ante las sinceras palabras del periodista, que foi presentáu con galanura por Sabino Fernández Campo.

Pa volver a suvizar l'ambiente disfrutamos d'unos entremeses musicales a cargu del «Ochote Asturias», que remataron el cuadru «Colores» con unos guapos sones.

Ya después de saboriar los menús l.literarios ya gastronómicos, tuviemos qu'ayudar a María a portiar el carráu de l.libros colos que foi obsequiada. Menos mal que la bayurosa cena aportóunos enerxía pa tresportar toa aquel.la l.literatura regalada.