Cuando les tradiciones reten a la muerte, bien taríen desaniciaes. Dicen los espertos en vampiroloxía que n'España hai más de 500 «vampiros nacíos» (non lliterarios). Dempués de sentir esta tertulia sobre vampiros a les dos de la mañana, casique nun podía dormir. Quiciabes porque tamos, en ciertu mou, sensibilizaos con histories macabres qu'oyemos a diario nos medios de comunicación. Ta visto que too ye posible. Cada vez una entérase de más coses rares, y voi cayendo na cuenta de que lo que yá paez esceicional ye ser «normal» nesti mundu de bichos raros qu'anden sueltos per uquier. Ente nós hai exemplares de tou tipu, vampiros de sangre y d'enerxía, estraterrestres que cualquier día llévennos hasta Marte o hasta la Lluna, bruxes y bruxos, lladrones d'altor, timadores, trafulleros, terroristes, maltratadores, violadores y too tipu de diaños que conviven con nós. Namás fai falta mirar unos minutos dalgunos canales de televisión y darréu nos ponemos al corriente de toles gafeces que nos amaguen.

Volviendo a los vampiros que paez que caleyen ente nós con apariencia de «normales», seique tarán encantaos de ver tantes escenes sangrientes na tele. Estos díes d'atrás los Sanfermines regaron les calles de sangre. Un muertu, venti cornaes, milenta revolcones, cien rotures de miembros... Da lo mesmo les cifres. Los Sanfermines son unes fiestes tan afitaes ente'l públicu, que ye como si yá se considerase normal tolo que pase. Nesti eventu, de riesgu, por mui guapu que nos lo pinten, la sangre tiñe les calles de roxu y fainos escalafrianos. La muerte va de collacia colos participantes y darréu dexa sentir la so presencia. Sangre fresco en direutu. Sangre de los mozos que cuerren allocaos delantre de los toros engafentaos. Accidentes y muertos provocaos, y hasta xustificaos pol placer de disfrutar d'emociones fuertes. Conseyos y midíes de seguridá. Pero'l riesgu en sí ye lo qu'anima y alloquez a tolos que cuerren, al debalu, delantre los toros, inda sabiendo que la carrera pue tener fatales consecuencies. Y asina, ensin reparu, na televisión amuésennos les escenes más dures, recreándose col morbu, nesta fiesta qu'abre la puerta a la muerte. La muerte en primer planu, ente'l recuentu de firíos, corniaos, pisaos y demás. Y ¡que siga la fiesta! Cola mayor naturalidá. El que pagó cola suya, mala suerte. Pal añu que vien más toros a la calle y miles de mozos, y non tan mozos, correrán alloquecíos delantre'l toru. Histeria coleutiva, alimentada con alcohol, sueñu y euforia. Los presentadores de televisión siguirán xustificando la muerte y amosándonos a cámara lenta les imáxenes más tráxiques.

Y dexando aparte la lleenda de los vampiros, cola qu'encomienzo'l testu. Ye preocupante que nos mostremos impasibles ante socesos de tal calter. Cuando les tradiciones reten a la muerte bien taríen desaniciaes.

Aprovecho pa felicitar al Ayuntamientu de Castrillón por declaranos conceyu antitaurinu.