Morenu peligrosu

M.ª ESTHER GARCÍA LÓPEZ L.lucir un cuerpu morenu de pías a cabeza foi una imposición de la moda dende fai unas décadas. Eso sí, un morenu distintu del que s'algamaba trabayando al aire l.libre; un morenu que siempre estremó a los aldeanos de la xente de la ciudá. Éstos, col pel.leyu más blancu ya más nietu que los l.labradores, negros ya escueiraos pola mor de tener que trabayar al escachón del sol pa realizar los duros l.labores del campu. Daquél.la, n'aldea, sobre too las mozas, tapábanse con pañuelos ya sombreiros, mangas l.largas ya manguitos pa que'l sol nun-yos viera la cara ya nun deixara la marca na súa piel. La moda yera tener el pel.leyu blancu.

Pero'l negociu del turismu, modelos, artistas, ya la publicidá que chega hasta los requeixos más escondíos, encomenzaron a poner de moda el color prietu. Cuerpu morenu dende la cabeza hasta las uñas de los pías. Al rodiu d'esta moda fueron inventándose tou tipu de potingues pa estimular la melanina ya acelerar el procesu del morenu. Las playas chenáronse de xente estumbarrada al sol. Traxes de bañu cada vez más pequenos, triquinis, biquinis, monoquinis, «fardagüevos» pa los homes ya playas nudistas pa los más atrevíos, pa que nun quede nin un puntu blancu no cuerpu.

Ya como siempre queremos más, chegaron darréu las l.lámparas de rayos UVA, como elementu pa ponese mouru nunas cuantas sesiones. Caras, pero ensin nubes, ya amás permiten l.lucir color prietu de branu ya d'iviernu. Dalgunos, tol añu prietos como tizones. La moda esclavízanos. Ensin danos cuenta esíxenos abondos sacrificios, inclusive xugar peligrosamente cola salú. Tostámonos naquel.la caxona, como la d'un muertu, pero eso sí, con efeutos muito más rápidos que los del sol. Nunos días, el pel.leyu mouru, igual que si tuviéremos de vacaciones en cualquier «tostaderu» de los que tanto abundan polas playas d'outras costas onde'l sol ta aseguráu.

Pero como tolos escesos son malos, investigaciones científicas alértannos, dende hai tiempu, de que'l sol n'escesu, amás de ponenos morenos, pue producinos graves maluras na piel. Ya los últimos estudios preséntannos estas l.lámparas de rayos UVA como peligrosas pa la salú ya posibles causantes del cáncer de piel. Sicasí esto tien fácil solución: non usalas. Anque igual pa dalgunos ya difícil. Tanto como nos falan d'adicciones, seique'l «morenu» tamién puede crear adicción.

Cuadra bien aquí la sabia frase «el que xuega con fou, quéimase». De xuru, que'l vezu de dir tostase a «la l.lámpara» va dir desaniciándose. Agora la xente mirarase un pouco más ya polo menos espaciará'l sou usu.

Nada, nun hai corazón que descanse. Lo que ya bono un día, al siguiente ya malo pa nós. Ya güei enterámonos de contino de tolas gafuras que nos amagan por uquier. Nun nos deixan vivir tranquilos.