Cuando falo de Belén estráñase la xente, porque inda hai munchos asturianos que desconocen la esistencia d'esti guapu llugar asitiáu nel conceyu de Valdés. El nome de Belén, según el doctor Xosé Lluis García Arias, autor del llibru «Toponimia asturiana, el porqué de los nomes de los nuestros pueblos», «podría tener un supuestu orixe antiguu rellacionable col cultu a Beleno, un Dios veneráu ente los celtes. O tamién podría xustificase como nome de persona d'un antiguu posesor de la tierra». Atendiendo al so significáu bíblicu, Belén vien de Bet-lehem, que significa «Casa del pan».

Belén ye la cabecera de la parroquia de La Montaña-San Salvador de Ríu Negru. Asitiáu a 17 kilómetros de L.luarca pola carretera que lleva a Villayón, ye llugar que merez la pena conocer pol so encantu natural. El patrón de la parroquia ye San Salvador, y la patrona ye la Virxe de Belén, Virxe que tien munchos devotos que la visitan non sólo'l día la fiesta, sinón otres munches veces a lo llargo l'añu. La fiesta celébrase'l primer domingu d'ochobre (esti añu'l próximu día 4), y a ésta acude muncha xente de los conceyos vecinos pa disfrutar d'una prestosu día con comida nel campu. Como nos volvimos un poco comodones, en vez de sentase nel prau, pue reservase mesa. Estes fiestes de Belén y Belenín, piesllen el ciclu festivu del branu nel conceyu de Valdés. Namás nos fai falta que'l Nuberu dormeza y nun nos mande agua pa esi día.

Esti llugar nun ta señaláu como llugar de pasu del Camín de Santiago, pero la so historia, la so maxa y la so situación, dícennos que pudo ser un ramal del Camín. Hasta Belén lleguen caminos que parten del conceyu de Tinéu y pasen pel picu L'Estoupu o per Capiel.lamartín. Y dende Belén hai caminos que cruzan les sierres, con tramos onde quedan restos d'una calzada empedrada, y llévannos a distintos puntos del conceyu de Villayón y de Navia, ente ellos a San Salvador de Piñera y a San Salvador de Loza. Ye mui probable que podamos documentar una posible ruta del Camín de Santiago que pasaría per Belén de La Montaña.

Pero güei lo que me presta, sobre too, ye falar d'esta fiesta que la xente de La Montaña espera con ilusión y qu'inda conserva l'aquel d'una fiesta de pueblu. Años atrás, encomenzaben una selmana antes los preparativos pa recibir a los invitaos que veníen «de sopas», tradición que se sigue manteniendo. Güei, colas comodidaes qu'hai nes cases, nun fai falta encomenzar con tanta antelación. Eso sí, los organizadores de la fiesta lleven unos cuantos díes estresaos, col envís de que too salga bien. Esposiciones de fotos, artesanía, conciertu, misa cantada, sesión vermú, ente otros actos, preséntennos una xornada festiva que se nos ofrez bien prestosa. Baille tarde y nueche pa favorecer la dixestión. Tampoco faltará la pólvora, nin el repicar de les campanes na procesión. Esperámosvos.