RAMÓN SORDO SOTRES
Ello é que los nombres de los sitios más curiosos muchas veces son tamién los más polémicos. Asina pasa colas peñas más nombradas de Cangues y Valdeón; al respetive d'ellas equí vienen los topónimos que mi dixeren cientos de pastores colos que jablé:
La pica de 2.478 metros d'altura qu'é la más elevada del conceyu asturianu de Cangues conocíase nos municipios d'Asturies como Peñe Santa o Peña Santa, anque nel d'Amieva tenía otros llamatos. Y los pocos pastores que taban en cuenta de que detrás d'ella pinábase una muchu más ancha, pero que vista del Norte taba mui atapada pola otra, estremaban el topónimu: Peña Santa d'Asturies era la de 2.478 (nombre qu'udíase pocu, pa mí porque dicíase tamién el mui sintíu Peña Santa) y Peña Santa de Castilla la otra de 2.596 metros, pos Castilla é como, sin precisión, llamaban a Lleón, provincia onde, nel conceyu de Valdeón, pínase esta más alta.
Los lleoneses de Valdeón y Caín dában-y otros nombres a las dos peñas: a la más grande y alta (la de 2.596 metros), metía nel conceyu de Valdeón, los vecines de los seis pueblos d'esti conceyu llámaban-y Torre Santa o Peña Santa, mentres que los pastores de Caín (amás de los d'Oseya y Soto en Sayambre) sólu dicían esti segundu nombre: Peña Santa.
La de 2.478 metros, qu'é una pica muchu menos destacada cuando la ven dende'l Merudía o el Saliente, recibía tamién el nombre de Torre de Santa María, que jásemi era un topónimu de Caín.
Vo dicir tamién qu'al respetive de los nombres antigos de los montes del poniente de los Picos d'Uropa o d'un cachu grande d'ellos, pamí que:
1) Los pastores que trabayan nelli casi no-y dan dengún.
2) Llamában-y Peña Santa, Peñe Santa o los Picos de Peña Santa en dellos pueblos d'Amieva, Cabrales, Llanes, Onís y Parres.
3) Vecines d'Amieva, Cabranes, Casu, Ñava, Parres, Piloña, Ponga, Uviéu, Villaviciosa, conceyos que tan al Poniente d'el ríu Sella, llamában-y los Picos de Cornión o variantes asemeyadas. Al saliente del Sella, sólu sintí esti topónimu nos pueblos de San Tiso (nel norte del conceyu de Cangues) y Vis (Amieva).
Esto era asina, como mi lo cuntaren a mí y como yo vos lo cunto, pero caltenelo hoi (no siendo Peña Santa de Castilla, qu'ofiende a los lleoneses) tien que caltenelo la xente, los hombres y las muyeres de los pueblos, las villas y las ciudaes, los pastores, los montañeros y los que quieren que no se pierda lo antigu y que los llamatos de la vieya lluenga de la Tierrina sigan diciéndose. ¡Jastasagora!
