MARÍA ESTHER GARCÍA LÓPEZ
Dizse popularmente que «nun hai campana sin bruxa», ya pue ser que seya verdá. Por eso dacuando falla'l toque de campanas ou el campaneru, sin posible esplicación. El campanariu siempre foi ya ya un l.lugar especial nas ilesias, ya si se quier un pouco priváu. A él xube'l campaneru ya dacuando'l cura ya'l sacristán, ya del.los páxaros que faen al.lí no altu'l sou níu. Amás de los grandes ya vistosos níos de las cigüeñas, que nos sorprienden cuando cruzamos las chanuras de Castiel.la, tamién s'abel.lugan no campanariu las curuxas ya los esperteyos ya ocasionalmente las abeyas. Nel campanariu de Belén (Valdés) hai un enxame d'abeyas que se fixeron ocupas d'aquel l.lugar. Mirador dende onde acolumbran un guapu paisaxe, dende los montes hasta la mar, sin que naide las moleste ya al.lí tarán fabricando ricu miel. Habrá que buscar a dalgún curiosu pa esmelgar las abeyas del campanariu, que de xuru va ser más difícil que tocar las campanas. ya de pasu garrar l'enxame ya al.lugalu nun truébanu pa que nun cunda'l pánicu.
Na procesión de la fiesta de Belén esti añu nun sonaron las campanes, nun sabemos si pola mor de las bruxas ou pola presencia de las abeyas. Pero'l día Belenín outru campaneru xubió a tocar a gloria mientras salía la procesión. Él, amás de conocer bien l'arte de tocar las campanas, ya gran conocedor de las abeyas porque tien un bon cortín, ya taba entós preparáu por si-ys diera a éstas por engafase ya tuviera qu'improvisar ya ponese a garrar l'enxame.
Tol mundu conoz el l.linguax de las campanas, pero non tol mundu sabe tocalas, arte que nun ya nada fácil. Nos pueblos siempre hai dalgún campaneru ou campanera que las toca con arte ya sabe qué toques tiene que facer según la circunstancia. Ya necesario pasar el testigu a dalgún mozu pa que nunca s'escaeza'l l.linguax de la campana, tan útil n'outros tiempos pa comunicase ente los vecinos ya inclusive p'allonxar tormentas, dalgo qu'en Belén paez que nun tien efeutu, pues los rayos cayeron na torre en más d'una ocasión ya cheganon a causar grandes desperfeutos.
Ya importante que las campanas nun deixen de repicar. Bien ya verdá qu'agora cuando hai fueu l.lamamos al 112, ya yá nos solucionan el problema, ya pa l.lamar a conceyu utilizamos el teléfonu. Tamos muito bien comunicaos.
Sin embargu, magar la decadencia d'usu pola mor de la revolución teunolóxica, la campana ya inseparable del pueblu, forma parte entovía de del.os ritos relixosos, chora polos muertos ya al.légranos el corazón cuando toca a fiesta. La campana sigue teniendo un aquel especial ente los vecinos.
La historia ya del.las curiosidades sobre las campanas podrían chenar muitas l.linias, pero como l'espaciu nun me lo permite, las campanas volverán a ser tema d'outru próximu artículu.
